Index Anillo Verde de Vitoria-Gasteiz

Olarizuko arboretoaren lehen fasearen egokitzea

Helburuak
Vitoria-Gasteizko lorategi botanikoaren atal bat izango den arboretoan Europako eskualde bakoitzeko zuhaitz eta zuhaiska landarediaren adierazgarri izango den lagin bat osatu nahi da. Bere helburua kontinenteko landaredirik bereizgarriena kontserbatzea eta bere ezagutza zabaltzea da, batez ere Iberiar Penintsulakoa.

Arboretoaren azalera osoa 48 hektareatakoa izango da eta ondoko 5 faseetan garatuko da:

• Europako baso mediterraneoak
• Europako baso epel submediterraneoak
• Europako baso epelak
• Europako baso borealak
• Europako baro subalpetar eta oromediterraneoak

1. fasearen deskribapena: Europako baso mediterraneoak
Lehen fasea, baso mediterraneoak landu dituena, parkearen ekialdean kokatuko da, 1,26 hektareatako azalera batean. Proiektu honen baitan eskualde mediterraneoko baso nagusien zuhaitz, zuhaiska, mulu eta lianak landatu dira. Horrez gain, lurra egokitzeko, bilduma bisitatzeko eta etorkizuneko mantenimendua ziurtatzeko lanak egingo dira.

Azken emaitza gisa, baso naturaletan dagoen zuhaitz, zuhaiska eta lianen espezie eta ale banaketa bera erdiestea espero da. Espazio honen osaketan baso mediterraneoak ulertzeko hainbat maila sortu dira, bakoitza parkearen toki espezifiko batean, paisaiak, landarediak eta asoziazioak azaltzeko:

• Paisaiak. Bisitariak eskualde mediterraneoaren aniztasuna hauteman ahal izan dezan, proiektatutako zona zeharkatzen duen ardatz edo bide nagusi bat marraztu da. Bideak gora egiten du, paisaia mediterraneo nagusietako basoak ikustea ahalbidetuz: karraskalak, artadiak, artelatz-basoak, abariztiak, basolibadiak eta makiak, pinudi xerofitikoak, izeidi xerofitikoak, intsentsu-sabinen basoak eta ibaiertzetako landaredia.
• Landarediak. Baso mediterraneoen aniztasuna hobeto ezagutu nahi duenarentzat, bigarren mailako bide bat prestatuko da. Irisgarritasun unibertsaleko lurrezko bidezidor bati jarraituz, gune honetako landaredi mota guztiak zeharkatuko dira. Landaredi esaten denean, baso mota bakoitzerako hautatu den ordezkaritza biogeografikoa ulertu behar da. Adibidez, artelatz-basoen kasuan, artelatz-baso korsikar-toskanarrak, iparlusitaniarrak, hegomendaldeko iberikoak eta katalan-probentzarrak aurkituko ditugu.
• Asoziazioak. Basoen konplexutasunean murgildu nahi duen bisitariak bigarren mailako bidea utzi eta zidor estuak jarraituz, interpretazio plazetara iritsi ahal izango du. Leku hauetan landaredi mota bakoitzaren asoziazioen osaketa azaltzen da, asoziazioen arteko ezberdintasunak behatu ahal dira eta asoziazio bakoitza osatzen duten espezieen bilduma bizian landare bakoitza identifikatu ahal izango da. Esaterako, artelatz-baso iparlusitaniarren kasuan ondoko asoziazioen landareak ikusi ahal izango dira: Rusco aculeati-Quercetum suberis, 7 espezie; Physospermo cornubiensis-Quercetum suberis, 13 espezie.

Egindako lanak
Ondoren arboretoaren lehen fasean egin diren lanak deskribatzen dira modu laburrean:

• Aldez aurreko lanak. Zorupeberriketa bikoitza egin da, belaunaldiz belaunaldi egin diren goldatzeek konpaktatu duten lurzoru geruza hausteko eta horrela sustraien barneratzea errazteko.
• Lur mugimenduak. Bideen oinarrizko sareak irisgarritasun unibertsalerako egokia den malda (%6koa baino txikiagoa) eduki behar duenez, hainbat lur erauzketa eta lubeta egin dira eta arekak (0,5 m sakon diren zangak) definitu dira ura biltzeko.
• Lurraren prestaketa. Zuzenketa orokorrak egin dira. Besteak beste, landare lurra, harea edo zohikatza gehitu zaio lurrari bere egitura hobetzeko. Egungo substratuaren ehundura eta pH-a komeni ez zaien asoziazioak doazen tokietan zuzenketa espezifikoak egin dira.
• Oinarrizko bide sarea. Bide eta sarbideen sarea oinarrizko azpiegituratzat hartzen da. Printzipioz, zabor-legarrez eraikitako bide eta sarbideen sarea da, baina gainerako zonak hiritartu ahala, zoladuraz estali ahal izango dira.
• Landaketak eta ongarritzeak. Landaketarako 53 lursail definitu dira, guztira 212 espezietako 16.470 ale landatzeko. Landareak ahalik eta tamaina handienekoak dira, ordezkatutako basoen egoera heldua ahalik eta azkarren erdiesteko; hala ere, espezie bakoitzari dagokionez, neurri askotako aleak eskatu dira, landaketaren ondoren sortuko den landare komunitatea adin talde heterogeneoduna izan dadin.
  Ongarritzeari dagokionez, analisi edafilogikoen emaitzek erakutsi zuten zenbait gabezia zeudela lurzoruan, eta landarediaren garapen optimoa lortzeko gabezia horiek konpentsatu egin beharko zirela. Leku hauetan erabiltzen den ongarria nitrogenoan oso aberatsa da, fosforo aberastasun ertainekoa eta potasio apur bat daukana.
• Mantenimendu lanak. Landaketen mantenimenduari dagokionez, hainbat sastraka garbitze egiten dira berez sortzen diren landareak ezabatzeko, eta landareak ureztatzen dira defizit hidrikoa dagoen sasoietan.

Azken eguneratzea: 2008/03/27