Atzera egiteko eskubidea edo kontratua baliorik gabe uztea
- Zer da
- Atzera egiteko eskubidea: aurreikusitako kasuak
- Atzera egitearen ondorioak
- Baliatzeko legezko epeak
- Araudia
Zer da
Atzera egiteko eskubidea, hain zuzen ere, kontsumitzaile edo erabiltzaileak gauzatutako kontratu bat indarrik gabe uzteko duen ahalmena da, erabaki hori justifikatu beharrik gabe, horretarako ezarritako epean beste kontratugileari horrela jakinaraziz eta inolako penalizaziorik gabe.
Atzera egiteko eskubidea gauzatzeagatik kontsumitzaile eta erabiltzaileari penalizazio bat ezartzen dioten baldintzak baliogabeak dira.
Balio osoz gauzatutzat joko da honela egiten bada:
- atzera egiteko agiria bidalita
- jasotako produktuak itzulita
Garrantzitsua da kontsumitzaileari azpimarratzea atzera egiteko eskubide hori gauzatu izana egiaztatuko duen modu batez egitea komeni dela, kontsumitzaile edo erabiltzaileari dagokiolako eskubide hori gauzatu duela eta noiz gauzatu duen frogatzea. Beraz, hori egin izana egiaztatu dezakeen modu batez egitea gomendatzen dugu (esaterako, burofax bidez, jaso izanaren agiria duen posta ziurtatu bidez eta abar)
Atzera egiteko eskubidea: aurreikusitako kasuak
Atzera egiteko eskubidea honako kasu hauetan baino ez da izango:
- Legez edo arauz horrela aurreikusitako kasuetan.
- Eskaintzan, sustapenean, publizitatean edo kontratuan bertan horrela aitortua dagoenean.
Lege batzuek eskubide hori gauzatzeko aukera ezartzen dute, eta hurrengo kasu hauetan onartzen dute:
- Urrunetik egindako kontratuak
- Establezimendu komertzialetik kanpo egindako kontratuak
- Bidaia konbinatuen kontratuak
- Urrunetik merkaturatutako finantza-zerbitzuen kontratuak
- Ondasun higiezinen txandakako aprobetxamendu-kontratuak
Atzera egiteko eskubidea baliatzearen ondorioak
Legeak atzera egiteko eskubidea aitortzen duenean, enpresaburu kontratugileak idatziz jakinarazi beharko dio kontratu-agirian, modu argi, ulergarri eta zehatzean, kontratuan atzera egiteko eskubidea duela, eta zer betekizun eta ondorio dituen eskubide hori baliatzeak, jasotako ondasun edo zerbitzua itzultzeko moduak barne. Horretaz gainera, atzera egiteko agiri bat eman beharko dio, halakotzat garbi aurkeztua, bidali behar zaion pertsonaren izena eta helbidea eta dagokion kontratuaren eta dagozkion kontratugileen datuak daramatzana.
Enpresariak 69.1 artikuluan ezarritako informazio- eta dokumentazio- betebeharra bete badu, aurreko paragrafoan aipaturiko epea kontratuaren xede den ondasuna jasotzen denetik hasita kontatuko da, edota kontratua egiten denetik hasita, kontratuaren helburua zerbitzuak ematea denean.
Enpresariak ez badu bete atzera egiteko eskubideari buruzko informazio- eta dokumentazio-betebeharra, eskubide hori hasierako atzera egiteko epea amaitzen denetik hamabi hilabetera iraungiko da, kontratuaren xede den ondasuna entregatu zenetik edo kontratua egin zenetik kontatzen hasita, kontratuaren helburua zerbitzuak ematea denean. Hiru hilabeteko epe horretan betetzen bada informazio eta dokumentazio-betebeharra, une horretatik aurrera hasiko da atzera egiteko eskubidea baliatzeko legez ezarritako epea.
Atzera egiteko eskubidea baliatzeak ez dio inolako gasturik ekarriko kontsumitzaile eta erabiltzaileari..
Urrunetik egindako kontratuetan, ondasuna edo zerbitzua itzultzearen kostu zuzena bere gain hartzeko galdatu ahal izango dio enpresaburuak kontsumitzaile eta erabiltzaileari.
Atzera egiteko eskubidearen lehen ondorioa elkarri prestazioak itzultzea da.
Era horretan, enpresak diru-kopuru horiek lehenbailehen itzuli beharko ditu, eta, kasu guztietan, atzera egin ondorengo 30 egunen epean. Epe hori igarota kontsumitzaile eta erabiltzaileak ez badu zor dioten kopurua berreskuratu, hura halako bi eskatzeko eskubidea izango du; gainera, sortu zaizkion kalte eta galeren kalte-ordaina ere eman beharko zaio, aipatutako kopurutik gorako partean.
Atzera egiteko eskubidea baliatu den kontratu baterako kontsumitzaile eta erabiltzaileak ordaindu beharreko prezioa guztiz edo partez kreditu bidez finantzatu bada, kreditu hori enpresaburu kontratugileak emana izan edo hirugarren batek aurrez enpresaburu kontratugilearekin ados jarririk emana izan, atzera egiteko eskubidea baliatzeak aldi berean kreditua desegitea ekarriko du, kontsumitzaile eta erabiltzailearentzako inolako penalizaziorik izan gabe.
Kontsumitzaile eta erabiltzaileak ez du batere dirurik itzuli beharko ondasunaren balioa gutxitu delako, baldin eta hitzartutakoaren araberako erabileraren ondorioz edo ondasunaren izaeraren ondorioz gertatu bada hori, edo zerbitzua erabili duelako.
Gainera, ondasunean egin dituen beharrezko gastu erabilgarriak ordainarazteko eskubidea izango du.
Kontsumitzaile eta erabiltzaileak ez da utziespen-eskubidea baliatzeko aukerarik gabe geldituko nahiz eta kontratupeko prestazioa itzuli ezinik gertatu, galdu duelako, desegin delako edo bestelako arrazoiren batengatik.
Kasu horietan, itzuli ezina kontsumitzaile eta erabiltzaileari egozteko modukoa denean, prestazioak utziespen-eskubidea baliatzeko unean izango lukeen merkatu-balioaz erantzungo du kontsumitzaile eta erabiltzaileak; balio hori erosketa-balioa baino handiagoa bada, berriz, erosketa-balioaz erantzungo du.
Enpresariak kontratu nagusian atzera egiteko eskubideari dagokion informazioa eta dokumentazioa helarazi beharra bete ez duenean, kontsumitzaile eta erabiltzaileari bere gaietan eskatu dakiokeen eginbidea gorde duenean bakarrik egotzi ahal izango zaio itzultzeko ezintasuna.
| Kontratu motak | Epeak |
|---|---|
| Urrunetik egindako kontratuak | 7 egun baliodun |
| Establezimendu komertzialetik kanpo egindako kontratuak | 7 egun natural |
| Bidaia konbinatuen kontratuak | Edozein momentutan. Ikusi ondorioak |
| Urrunetik merkaturatutako finantza-produktuen kontratuak | 14 egun natural, bizi-aseguruetan izan ezik, eta horrelakoetan, 30 egun natural izango dira |
| Higiezinak txandaka aprobetxatzeko kontratuak | 10 egun kontratua sinatzen den egunetik |
| Kontsumorako kredituen kontratuak | Kontratua sinatu osteko 14 egun naturalak |
Araudia:
Azaroaren 16ko 1/2007 Legegintzako Errege Dekretuaren 68tik 79ra bitarteko artikuluak, Kontsumitzaileak eta Erabiltzaileak Babesteko Lege Orokorraren testu bategina eta beste lege osagarri batzuk onartzen dituena
Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.