Gauekoak-en proiektuen poltsa 2025

Proiektu bat duzu eta Gauekoak programaren baitan eskaini nahiko zenuke?

Gasteizko gazte, talde eta elkarteeek beren ideiak eta proposamenak aurkeztu ditzakezue Gauekoak-eko programazioaren barruan eskaintzeko. 16-30 urte bitarteko gazteei zuzendutako jarduerak izan behar dute.

Deialdi berria: 2025eko udaberri-uda

2025eko udaberri-udako programazioan gauzatu nahi diren proiektuak azaroaren 4tik 24ra bitartean aurkeztu beharko dira (biak barne). Epez kanpo bazaude, jarri gurekin harremanetan eta kontaiguzu zure proposamena helbide elektroniko honen bidez: info.gauekoak@gmail.com

Ondoren, 2025eko oinarri-arautzaileak dituzue:

1. Helburuak

Helburu nagusia gazteek, kolektiboek eta hiriko elkarteek eratutako proiektu poltsa bat sortzea da, eta honen bitartez, Gasteizko aisialdi eta kulturan hiriko gazteen parte hartze aktiboa bultzatzea, Gasteizko Udaletxeko Gazteria Zerbitzuko Gauekoak programazioaren barruan.

Helburuak honako hauek dira:

Aisialdirako aukera sortzaile, osasungarri eta parte hartzailea eskaintzea.
Pertsona eta kolektibo gazteen parte hartzea bultzatzea jardueren diseinu eta abiaratzean.
Hiriko gazteen eta kolektiboen arteko harremanak sustatzea, lan taldeak eta elkarlanak sor daitezen laguntzeko.
Gizartearen eraldaketarako prozesu inklusiboen garapena babestea.
Aisialdian euskararen erabilera sendotzea.

2. Hartzaileak

Gasteizko pertsona fisiko, kolektibo eta elkarteak aurkeztu ahal izango dira deialdi honetara. Taldean aurkeztutako lanak aintzat hartuko dira batez ere, gutxienez hiru pertsonako taldeetan.

3. Poltsaren iraupena

2025eko udaberri-udako programazioan gauzatu nahi diren proiektuak azaroaren 4tik 24ra bitartean aurkeztu beharko dira (biak barne). Hala ere, proiektu poltsa zabalik egongo da etorkizunerako proposamenak egiteko.

Esan beharra dago aurrekontu edo programazio mugak direla eta gauzatu ezin diren proiektuak etorkizunean finantzatu ahal izango direla.

4. Jarduera-eremuak

Edozein motako proiektuak aurkeztu ahal izango dira, betiere eremu hauetako batean oinarrituz:

Kultura.
Kirola eta kirol jarduerak.
Osasuna eta bizi kalitatea.
Ingurunea eta jasangarritasuna.
Sormena eta berrikuntza.
Informatzeko eta komunikatzeko teknologiak.
Hezkuntza librea eta aisialdi hezigarria.
Elkarkidetasuna eta sentsibilizazioa.
Kulturartekotasuna eta aniztasuna.
Genero berdintasuna.
Euskara eta euskal kultura.
Orokorrean, Gazteria Zerbitzuak kudeatzen duen beste edozein gai.

Gazteentzako eta udalerrirako proiektu erakargarriak izan behar dira.

5. Proiektu motak eta beren egitura

Lan metodologia

Proiektu bakoitzak jardueraren garapen-formatu egokiena aurkeztuko du lortu nahi diren helburuak eta nori dagoen zuzendua kontuan izanda. Horretarako, estrategia desberdinak erabili ahalko dira, hala nola, sare sozialak, informazio kanpainak, bisitak, ikuskizunak, topaketak, tailerrak…

Betiere, proiektuak metodologia aktibo, inklusibo eta parte hartzaile baten bitartez gauzatu beharko dira non erritmo desberdinak, lan prozesuak eta hartzaileen ezaugarriak kontutan hartuko diren. Modu honetan proposatutako jarduerak eta metodologiak ezarritako helburuak lortzeko estrategiari erantzun diezaion.

Gauekoak programaren laguntza

Laguntza ekonomikoaz gain, ‘Gauekoak’ programak beste baliabide batzuk jarriko ditu hautatutako proiektuen eskura:

Proiektuaren behin behineko diseinua lortzeko laguntza.
Espazio desberdinak erabiltzeko erraztasuna.
Ikus-entzunezko baliabideen mailegua.
Hedapena.

Egutegia

Proiektuak 2025eko udaberri-udako programazioan gauzatuko dira.

Giza baliabideak

Proiektu bakoitzaren ardura duen erakundeak eginkizun hauek bermatzeko konpromezua hartzen du:

Koordinatzaile bat izendatu ‘Gauekoak’ programarekin koordinatu eta erreferente bat izateko.
Arazoren bat sortzekotan, berehala jakinarazi beharko zaio Gauekoak programako lantaldeari.
Hasiera batean proposatutako pertsona ezingo balitz jardueraz arduratu, beste pertsona
batek hartuko luke bere lekua.
Proiektua garatu adostutako edukia eta epeetara moldatuz.
Gauekoak programaren irizpide eta argibideak momentu oro jarraitu.
Proiektuaren garapenean sortzen diren arazoen berri eman.

6. Aurkeztu beharreko dokumentazioa

Hau izango da proiektu bakoitzak aurkeztu beharko duen dokumentazioa:

Eskaera-orria beteta. I. Eranskina Proiektuaren arduradun gisa agertzen den pertsonaren NANaren fotokopia erantsi beharko da.
Garatu beharreko jardueren proiektu xehatua. II. Eranskina
Proiektua 18 urtetik beherakoek aurkezten badute, III. eranskina osatuko da guraso edo tutorearen baimenarekin. III. Eranskina

Proiektuak aurkezteak esan nahi du erakunde eskatzaileak berariaz onartzen dituela oinarri hauetan ezarritako eskakizun eta arau guztiak.

7. Proiektuak aurkezteko lekua eta epea

Proiektuak aurkezteko epea azaroaren 4an irekiko da eta 24an amaituko da (biak barne).

Proiektuak pdf formatuan bidali beharko dira, posta elektronikoz, info.gauekoak@gmail.com helbidera, "Gauekoak 2025 proiektuen poltsa" gaiarekin.

Proiektuak egiteko edo eranskinak betetzeko zalantzaren bat izanez gero, gurekin harremanetan jar zaitezkete helbide elektroniko honetan: info.gauekoak@gmail.com

8. Ebaluazio irizpideak

Proiektuak irizpide hauen arabera ebaluatuko dira:

Proiektuaren berrikuntza metodologiaren eta helburuen arabera (originaltasuna) (20 puntu)
Hiriko beste eragile batzuekin lankidetzan aritzea (20 puntu)
Antzeko jardueren defizita hirian (10 puntu)
Gazteen inplikazioa eta parte-hartzea (15 puntu)
Genero-ikuspegia sartu eta sustatzea (10 puntu)
Euskaraz proposatutako eta garatutako jarduera izatea (10 puntu)
Zeharkakotasun kulturala, kulturartekotasuna, inklusioa eta kolektibo minoritarioen parte-hartzea sustatzea. (10 puntu)
Proiektuaren bideragarritasuna (5 puntu)

Gehiengo puntuazioa: 100 puntu.

9. Poltsaren eraketa

Puntuazio-irizpideak aplikatzetik proiektuen poltsa bat aterako da, eta lortutako puntuazioaren arabera ordenatuko dira proiektuak. Behin poltsa eratuta, Gauekoak programaren programazioaren beharrei eta interesei erantzungo dieten proiektuak hautatu eta martxan jarriko dira eskura dauden baliabideen arabera.

10. Aukeratutako proiektuak eta ordaintzeko modua

Poltsa eratu ondoren, proiektuak abian jarriko dira. Hautatutako pertsona fisikoak eta/edo erakundeak kontratatu ahal izango dira, betiere jarduteko gaitasuna badute, eta gaitasun hori indarreko Sektore Publikoko Kontratuen legerian ezaindarreko Sektore Publikoko Kontratuen legerian ezarritakoaren arabera egiaztatu beharko da. Gainera, zerga- eta gizarte-betebeharrak egunean izan beharko dituzte.

Ordainketa zatikatu ahal izango da, proiektu bakoitzaren ezaugarrien arabera, hala nola gauzatze-denbora eta aldez aurreko erreserba-beharrak. Kontratu bakoitzean dagokion modua ezarriko da. Nolanahi ere, faktura aurkeztu ondoren egingo dira ordainketak, teknikari arduradunaren oniritziarekin.

11. Pertsonen betebeharrak

Arduradunek betebehar hauek izango dituzte:

Aurreikusitako proiektua edo programa gauzatzearen ondoriozko erantzukizun guztiak bere gain hartzea.
Saria jaso zuen programa edo jarduera ez aldatzea aldez aurreko abisurik gabe edo Gauekoak lan taldearen adostasunik gabe.
Gauekoak lantaldeak proiektua gauzatzeko egokitzat jotzen dituen egiaztapenak, jarraipena eta jarraibideak onartzea.
Publizitatean, komunikazio-ekintzetan eta jendaurrean egindako laginetan adieraztea proiektua, programa edo jarduera Gasteizko Udalaren eta Gauekoak erakundearen laguntzarekin egiten dela.
Sexuan, jatorrian, erlijioan edo proiektu, programa edo jarduerarekin lotutako publizitatearen eta komunikazioaren hizkuntzan edo irudian oinarritutako bereizkeriarik ez egitea.
Proiektu, programa edo jarduerarekin lotutako publizitatean eta komunikazioan euskararen erabilera normalizatzeko irizpideei jarraitzea.