FotoArte lehiaketa

FotoArte lehiaketaren edizio berria jarri du abian Gasteizko Udalak. Ohi bezala, lehiaketak artea edozein fasetan erakusten duten irudiak bilatzen ditu: prestakuntza, sorkuntza, erakusketa edo kontsumoa.

Edizio honetan bereziki ospatuko dugu historikoki gehien lagundu duen erakundeetako baten urteurrena: Gasteizko Arte eta Lanbide Eskola. ALEk 250 urte bete ditu, eta, ospakizun hau dela eta, Foto Arte-rekin elkarlanean arituko da, Bertako Artistarentzako sari berezi batekin eta hainbat jarduera osagarrirekin.

Parte hartzeko epea 2025eko otsailaren 18tik martxoaren 18ra izango da (biak barne).

Oinarriak 2025

1.-Gaia

FotoArte lehiaketaren bidez jarduera artistikoa irudikatzen duten argazkiak saritu nahi dira. Horretarako, gai bat aukeratzen da edizio bakoitzean. 2025ekoa "Arteak eta ofizioak" izango da.

2.- Parte-Hartzaileak

Espainiako lurraldean bizi diren 18 urtetik gorako pertsonek parte hartu ahal izango dute lehiaketan.

3.- Lanak Aurkeztea

Parte hartzaile bakoitzak gehienez bi lan aurkeztu ahal izango ditu; berak egindakoak eta beste lehiaketa edo proiektu batean saritu gabekoak. Bi baino gehiago aurkeztuz gero, azken biak bakarrik hartuko dira kontuan.

Edozein teknika edo prozedura onartzen da: digitala nahiz laborategikoa, koloretan nahiz zuri-beltzean.

Ez dira onartuko adimen artifizialaren bitartez egindako obrak.

Argazkiak JPG formatuan aurkeztuko dira eta alde handienak 2000 pixeleko neurria izango du.

Aurkeztutako proposamenek ezin izango dute egilearen izenik izan, ezta bestelako bereizgarri pertsonalik ere. Artxibo digitalaren IPTC metadatuetan ere ez da datu pertsonalik agertuko. Lanak ez dira onartuko baldintza horiek guztiak betetzen ez badira.

Parte-hartzeko formularioa

4.- Lan Hautatuak Eta Sarituak

Epaimahaiak 32 lan aukeratuko ditu jasotakoen artean. Horietatik hautatuko dira saridunak. Udalak talde-erakusketa bat antolatuko du aukeratutako 32 lan horiekin, 2025eko bigarren lauhilekoan, Gasteizko gizarte-etxeetako erakusketa-geletan eta Udalaren webgunean.

Gasteizko Udala arduratuko da lan hautatuak argazki-paperean inprimatzeaz. Horretarako, antolatzaileek lanak fotoarte@vitoria-gasteiz.org e-postara bidaltzea eskatuko diete egileei, fitxategiak transferitzeko aplikazio baten bidez (adibidez: WeTransfer). Argazkiek 300 ppi-tko bereizmena izango dute eta, gehienez, 1 GB-eko tamaina. Era berean, inprimatuko den irudiaren neurria aukeratu beharko dute, betiere jakinda gehieneko tamaina 40 x 50 cm-koa izan daitekeela eta kontuan hartuta passe-.partout-aren neurriak 60 x 50 cm-koak izango direla.

5.- Lanak Onartzeko Epea

Lanak onartzeko epea 2025eko otsailaren 18tik martxoaren 18ra izango da, biak barne.

6.- Sariak

• Lehenengo saria: 1000 €

• Bigarren saria: 700 €
• Bertako artistaren saria: 400 € + Arte eta Lanbide Eskolan urte bateko beka akademikoa
• 2 accesit: 150 eurokoa bakoitza

Sari bakoitzaren zenbatekoari zerga-legerian aurreikusitako atxikipenak ezarriko zaizkio.

Bertako artista saria Gasteizen bizi, ikasi edo lan egiten duten pertsonek aurkeztutako lanen artean hautatuko da. Saridunak egoera hori justifikatu beharko du.

(*) Arte eta Lanbide Eskolan ikasteko urtebeteko beka doako matrikula da, baldintza hauekin:

• Arte eta Lanbide Eskolak 2025-26 ikasturtean eskaintzen dituen diziplina guztietako edozein tailerretan erabili ahal izango da.
• Saritutako pertsonak egingo du tailerra, ezin da transferitu.
• Inola ere ezin izango da ikastaroaren balioa duen zenbatekoa eskudirutan eskatu.
• Ikastaroan sartzeko baldintzak (baleude) Eskolako matrikulazio araudian deskribatutakoak izango dira.

Edozein sari eman gabe geratu ahalko da, epaimahaiaren iritziz lanek behar adinako kalitatetarik ez badute.

7.- Epaimahaia

Gasteizko Udaleko Kultura Zerbitzuak izendatuko du epaimahaia, hiru pertsonak osatua. Argazkigintzari lotutako profesionalak izango dira. Epaimahaiaren erabakia apelaezina izango da.

Epaimahaiak lanen kalitate artistikoa eta teknikoa balioztatuko du, bai eta lehiaketaren gaiarekin duten lotura ere.

8.- Epaia

2025eko apirilaren 11n argitaratuko da Udalaren web-orrian (www.vitoria-gasteiz.org/fotoartelehiaketa). Bertan lan hautatuak, sarituak eta horien egileak emango dira jakitera.

9.- Sari-Banaketa

Sariak banatzeko ekitaldia Pilarreko gizarte-etxean izango da 2025eko maiatzaren 29an, 19:00etan. Ondoren, lan hautatuen erakusketa inauguratuko da, eta hasiera emango zaio Gasteizko hainbat gizarte-etxetan egingo den erakusketa-zikloari.

10.- Lan Hautatuak Jasotzea

Gasteizen bizi diren parte-hartzaileen argazki hautatuak Pilarreko gizarte etxean jaso ahalko dira, paperean inprimaturik, 2025eko irailaren 19tik aurrera.

Gainontzeko egileek postaz jasoko dituzte argazkiak, baldin eta kontrakorik adierazten ez badute. Lanak bidalitakoan, antolatzaileek ez dute euren gain hartzen lanak galdu edo hondatu izanaren ardura.

Saritutako argazkiak lehiaketa antolatu duen erakundearen esku geratuko dira, eta erabili ahal izango ditu bakarrik lehiaketaren eta bertan antolatzen diren jardueren sustapena eta zabalkundea egiteko, betiere egilearen izena aipatuz.

2025eko urriaren 20a baino lehen jaso ez diren argazkien jabegoa hartuko du Gasteizko Udalak, eta eskubidea izango du egokien iruditzen zaion helbururako erabiltzeko, betiere, egilearen izena aipatuz. FotoArte lehiaketarekin zerikusirik ez duten jardueretarako erabili nahi izanez gero, egileari jakinaraziko zaio. Irudiak eta horiek erabiltzeko eskubideak ezin izango dira hirugarrenen esku utzi, ezta saldu edo irabazi-asmoetarako erabili ere.

11.- Oharrak

• Lehiaketa honetan parte hartzeak berez dakar oinarriak oso-osorik onartzea.
• Parte-hartzaileak berariaz adierazten du bera bakarrik dela lehiaketara aurkezten dituen lanen egilea, eta bereak direla lan horien egile-eskubideak.
• Egileek mantendu egingo dituzte Jabetza Intelektualaren Legearen Testu Bateginean adierazitako eskubideak, eta haiek arduratuko dira lege horretan jasotako xedapenak betetzeaz eta nork bere irudia izateko eskubidea bermatzeaz. Arduratuko dira, halaber, lanak lehiaketa honen esparruan zabaltzen, erreproduzitzen edo editatzen direnean, horrek inoren eskubiderik ez kaltetzeaz. Hortaz, haiek izango dira legezko erantzule bakarrak, lege hori ez betetzeagatik gorabeherarik sortuz gero.
• Oinarri hauetan ezarritako baldintza guztiak betetzen ez dituen lan oro automatikoki lehiaketatik kanpo geratuko da.
• Lehiakide bakoitzak sari bakarra jaso ahal izango du.
• Antolatzaileen edo, hala badagokio, epaimahaiaren ardura izango da oinarri hauek interpretatzea eta bertan aurreikusi gabeko edozein gorabehera edo oinarriekiko edozein bat ez etortze ebaztea, lehiaketaren kalitatea eta gardentasuna bermatze aldera. Horretarako, behar izanez gero, epaimahaiak informazio gehigarria eska dezake zalantzak argitzeko, artxibo originalak, besteak beste.

Aurreko edizioak

Jarraian, 2024an saritutako lanak ikusi ditzakezu. Horiez gain, aurreko urteetakoak ere ikusi ditzakezu FotoArteko argazki-galerian.

https://www.flickr.com/photos/38143943@N08/albums/72177720316159430

Kontaktua

fotoarte@vitoria-gasteiz.org

vitoria-gasteiz.org/fotoartelehiaketa

Lotutako informazioa

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.