Vitoria-Gasteizko Eraztun Berdea - Ibilbide berdeak

Vitoria-Gasteizko Eraztun Berdea

Banner

Zabalgana - Suspertutako natura-eremua

Ezer gutxi gelditzen da 1990eko hamarkadara arte hantxe zegoen legar-ustiategitik. Eremua birmoldatu, eta ekologia eta paisaia aldetik egokitu ondoren, Zabalganeko parkea, egun, natura-balore handiko espazio bat da, eta Zabalganeko auzoetatik hurbil dago.

Parkeko ibilbidea aniztasun handikoa da, 4 kilometro eskas baino ez baditu ere, larre zabalak, baso txikiak, aintzirak, muino eta mendixka txikiak eta erkametzen baso bat ditu. Baso horretan animalia eta landare anitz daude. Zenbait atseden-eremuri eta bidexken sare bati esker, leku horretan ondo baino hobeto ibil gaitezke; etxebizitzez, fabrikez eta laborantza-lurrez inguratutako benetako uharte naturala dugu.

Zabalganeko basoa

Fitxa teknikoa

Luzera: 3,7 km | Denbora gutxi gorabehera: 55 minutu | Pista mota: bide-zorua

Bidea egokia da haurren aulkietarako | Nola iritsi: L5c, Lermandabidea / Lotura eta Areatza / Mercedes geltokiak; L6, Giza Eskubideak / Mariturri geltokia

Egin klik irudiaren gainean tamaina handiagoko PDF bertsioa ikusteko.

Mapa

Ibilbidea
  • Mariturriko bulebarrean parkeak duen sarrera nagusitik hasiko gara .
  • Ubide baten paretik (Zarauna errekak Zabalganeko auzotik igaro ondoren duen ura biltzeko zulatu zuten aipatutako ubidea) eta ezkerrean zabaltzen den Zabalganeko basoarekin paraleloan doa ibilbidea.
  • Atzean ezkerrerako desbiderapen bat utziko du; desbiderapen hori basora doa eta Eraztun Berdearen Birarekin elkartzen da. Eskuinean zenbait soro eta hiri- eta industria-eremu daude.
  • Goraldi leuna egin beharko dugu bidegurutze batera iritsi arte. Eskuinekotik jarraituko dugu, eta zenbait zuhaitz sakabanatuta dituzten zelaiak inguratuko ditugu; ezin hobeak dira atsedena hartzeko, jolasteko... Horrez gain, hainbat mahai eta iturri bat dituen txoko bat ere ikusiko dugu.
  • Aurrera jarraituko dugu, baina ez ditugu hartuko parkerantz doazen eskuineko desbiderapenak. Bidearen bi aldeetan Zabalganeko urmaelak zabaltzen dira, eta urmaelen gainean dagoen zurezko pasabidea zeharkatuko dugu.
  • Parkearen beste sarbide batera iritsiko gara; hor ezkerrerantz doan bide bat hasiko da, eta Zabalganeko zelaien eta urmaelen gainean dagoen talaian amaituko da.
  • Gure bidera joango gara berriz, eta metro batzuk ibili ondoren, bideak bat egingo du Eraztun Berdearen Birarekin; ZadorrarikArmentiara doa Bira eta, horretarako, Zabalganeko basoa zeharkatuko du iparraldetik hegoaldera.
  • Basoan sartuko gara, eta tarte batez Biraren puntu berdeei jarraituko diegu. Aurrerago eskumarantz joango gara Zuhatzura doan pasagune batetik; hortik eliza ikusiko dugu, jada.
  • Gero eta bista zabalagoa izango dugu; bidea ezkerreko zelaien eta eskuineko laborantza-lurren artean doa, eta atzealdean Gasteizko mendiak izango ditugu. Parketik irten baino lehen, eskuman Lezea urmaela ikusiko dugu.
  • Egokitutako aparkalekutik irtengo gara parketik, eta bidegurutzean eskuineko bidea har dezakegu Zuhatzu eta Sarbikotxeko hariztia bisitatzeko; bestela, ezkerrera joan gaitezke hasierako puntura iristeko.
  • Mariturriko bulebarrera iritsi baino lehen, eskuineko bidexka batek begiratoki batera eramango gaitu; begiratokian bi orientaziomahai daude, eta Arabako lautadaren inguruan dauden mendien bista panoramika bikainak eskaintzen dituzte.
Interesguneak
  1. Zabalganeko basoa
    Erkametzen baso naturala da, eta uhartebasoen berezko ereduetako bat da; Arabako lautadaren ezaugarri dira, eta zenbait baso-azalera zabal nekazaritzan erabiltzeko luberritu zirenean sortutakoak dira. Erlikia-balorea izateaz gain, ekologia-balore handia ere badu; izan ere, landa eremu oso sinplifikatua bada ere, babesleku bikaina da baso-landare eta -animalientzat.
    Basoan erkametza da nagusi; harizti mota bat da, eta basoko gehienek gazte itxura dute; hala ere, zenbait zuhaitzek heldutasunera iristen utziz gero agertzen duten itxura bikaina dute. Erkametzekin batera, astigarrak, elorri zuriak, ipar-orreak, elorri beltzak, beltxaleak eta beste arbustu arrunt batzuk ere badira. Animaliei dagokienez, erbinudeek, erbiek, untxiek eta azeriek, besteak beste, osatzen dute baso-komunitatea. Horrez gain, hegazti espezie anitz ere badira, esaterako, ikazkinak, txantxangorriak, mika arruntak, zozoak edo hotz ertainak.
  2. Zabalgana eta Lezea urmaelak
    Legar-ustiaketa zaharra berriztatzeko lanen ondorioz sortu zituzten Zabalganeko urmaelak. Lezea urmaela, berriz, erabiltzen ez zuten antzinako nekazaritzabaltsa bat zen. Jatorria ezberdina eta tamaina txikia badute ere, aintzira biak ur-mundu liluragarri baten habitata dira. Hegaztiei dagokienez, kopetazuria, uroilo arrunta eta basahatea ohikoenetako batzuk dira. Ur-gainean, ihien eta ertzetan hazten diren ezpata-belarren artean, igelak, zapatariak, ur-berdantzak, burruntziak eta sorgin-orratzak mugitzen dira.
  3. Zuhatzu
    Elizaren portikoa, erdi-puntuko arkuen bidez irekitzen dena, arabar arte neoklasikoaren adibide interesgarri bat da.
  4. Sarbikotxeko hariztia
    Zuhatzutik oso hurbil, beste uhartebaso bat osatzen duen hariztia dugu, Zabalganekoaren antzekoa. Harizti horrek, orain dela zenbait mende eremu horretan ziren eta egun arte bizirik jarraitzea lortu duten berezko landareak ditu. Hariztiak, Arabako lautadako beste uharte-harizti batzuekin batera, Espazio Natural Babestuen Europar Sarearen barruan (Natura 2000 Sarea) Garantís Komunitarioko Lekutzat (GKL) hartu dute.
Deskarga

Ibilbideak(Beste leiho batean irekiko da)Wikiloc(Beste leiho batean irekiko da)Naviki(Beste leiho batean irekiko da)PDF

Lotutako informazioa

  

Zure iritziak axola digu

Lagun iezaguzu hobetzen. Informazio hau baliagarria gertatu zaizu?            

Nahi baduzu, iruzkinak egin ditzakezu.
Nahitaezkoa da identifikatzea.

Gaia publikoa izatea aukeratzen baduzu, gainontzeko herritarrek zuk idatzitakoa eta udalak emandako erantzunak irakurri ahalko dituzte; baita iruzkinak egin ere. Gaia pribatutzat jotzen baduzu, zuk bakarrik izango duzu gai horretarako sarbidea eta udalak emandako erantzunak irakurtzeko aukera. Gaia idaztean identifikazio kodea emango zaizu.

Aldartea

Harremanetarako beste kontaktu bat: