Vitoria-Gasteizko Eraztun Berdea - Ibilbide berdeak
Olarizu - Mendi-hegaleko larretik paseatzen
Gasteizko herritarrek ondo ezagutu eta maite dute Olarizu, aspalditik elkarrekin topo egiteko eta herri-erromeriak ospatzeko lekua baita.
Larre egindako zelaiek, muinoak eta hiria hurbileko herriekin eta Gasteizko mendiekin lotzen dituzten bidexka ugariek osatzen dute gunea, baina horiez gain, gaur egun badira beste eremu eta ekipamendu batzuk, hala nola, baratze ekologikoak, lorategi botanikoa eta Olarizuko etxaldea; horiek guztiek erakargarriago bihurtu dute eremua.
Fitxa teknikoa
Luzera: 4 km | Denbora gutxi gorabehera: ordubete | Pista mota: hiri-ibilbidea, toki-errepidea eta bide-zorua | Nola iritsi:L2, Zumakadi kaleko 29. zk.ko eta Zumakadi kaleko 61. zk.ko geltokiak; L3 y L9, Zumakadi kaleko 76. zk.ko eta Zumakadi kaleko 94. zk.ko geltokiak
Egin klik irudiaren gainean tamaina handiagoko PDF bertsioa ikusteko.
Ibilbidea
- Adurtza auzotik hasiko gara, Iturritxu kaletik, alegia, Eraztun Berdearen Biraren 22. kilometrotik hurbil, Armentiatik Olarizura eta Salburura doa.
- Eraztunaren Birari jarraituz, eskuinerantz joango gara Jauregilanda kaletik, eta hegoalderantz jarraituko dugu zenbait industria-pabiloiren eta kirol eta hezkuntza-instalazioren artean. Tarte honek badu bidegorri bat bereizita.
- Ezkerrean Olarizuko aintzira ikusiko dugu; Olarizuko lorategi botanikoko eremu bat da. Parkearen eremu zabala okupatzen du, eta oso gomendagarria da bisitatzea.
- Berriz ibilbidera itzuliko gara eta hurrengo bidegurutzean ezkerrera jarraituko dugu, Olarizuko etxalderantz. Tarte hau, ertzetan zuhaitzak dituen errepide txiki bat da, eta ibilgailuak igarotzen dira. Bidexkatik ere jarrai dezakegu, Olarizuko baratzeetara hurbildu, eta handik Olarizuko muinora igo.
- Zuhaitzen artean doan errepidea etxaldeko aparkalekuan amaitzen da. Hor ibilbidetik irten eta Olarizuko muinora igo gaitezke. Bestela, beste ibilbide batzuetatik ere jarrai dezakegu, adibidez, GR 25 ibilbidetik edo Betoñu Haitzeko basabidetik.
- Gure bidea jarraituko dugu eta Eraztun Berdearen Bira ezkerrean utziko dugu. Lorategi botanikoaren zuhaiztian sartuko gara. Jaitsiko gara zelaietara, Olarizuko ibilbidera iritsi arte. Ibilbide horretatik jarraituko dugu. Iturritxu kalera iritsi baino lehen, ezkerrerantz joango gara, zuhaitzak dituen eremu berde batetik, eta hasierako puntura iritsiko gara
Interesguneak
- Olarizuko lorategi botanikoa
Olarizuko lorategi botanikoko landare bizien bilduma nagusia Europako basoen zuhaiztia da. Eremu horrek 30 hektarea ditu, eta 523 zuhaitz, zuhaixka, sasitza eta landare igokarirentzako egokitu da; horiek guztiak, Europa kontinenteko baso nagusietako landaretza-mota garrantzitsuenak dira, esaterako, artelatzbasoak, sabina-basoak, hariztiak, izeidiak etab. Olarizuko aintzira (Europako ur-habitatekin loturako landareak ditu), orkideen eta geofitoen zelaiak eta Olarizuko behatokia ere han dira, eta arabar muinoetan eta kareharrizko harkaitzetan berezkoak diren landareak dituzte. - Olarizuko baratzeak
1998. urtean egokitu zituzten zenbait nekazaritza-finketan eta hondakinez okupatutako zelaietan. Gaur egun, denontzako eremua da, eta baratzezaintza ekologikoarekin, lorezaintzarekin eta frutagintzarekin lotutako zenbait jarduera gauzatzen dira. Baratzetarako eremua, fruta-arboletarako eremua, baso-hazitegia, zenbait negutegi, udalerriko basoen zuhaiztia, putzua eta eraikin bioklimatikoa daude. - Olarizuko muinoa
709 metroko garaiera du. Gailurrean, hormigoi armatuko gurutze handia nabarmentzen da; 10 metroko garaiera du. Hiriaren eta lautadaren bista panorámico ederra eskaintzen du. Gailurretik hurbil, Kutzemendi aztarnategia dago; Burdin Aro osoan eta erromanizazioaren hasiera arte okupatuta egon zen herrixka baten arkeologia-aztarnak ditu. - Olarizuko etxaldea
1727. urtekoa da. Jatorrian, Olarizuko larrean bazkatzen ziren herri-abereak gordetzeko erabiltzen zen. Abere horiek hiriko harategietara eramaten zituzten. Ondoren abandonatu zuten, eta 1987. urtera arte biltoki moduan erabili zuten. Urte horretan hasi ziren zaharberritzen. 1995ean, Vitoria-Gasteizko Udaleko Ingurugiro Gaietarako Ikastegiaren egoitza eta Eraztun Berdearen heziketaeta informazio-ekipamendu nagusietako bat bihurtu zuten. Liburutegia, erakusketa-azoka, hitzaldietarako aretoa eta beste zenbait gela ditu. Bestalde, eguzki-panelak eta biomasako galdara ditu. Horrez gain, Olarizuko lorategi botanikoko landareen material genetikoen biltegia han dago. - Betoñu Haitzeko basabidea
Antzina, bide horrek Arabako Errioxa eta Gasteiz lotzen zituen; horretarako, Gasteizko mendiak zeharkatzen zituen Betoñu haitzeko mendatetik. Ibilbide garrantzitsua izan zen merkataritzarako eta abereak, ardoa eta beste nekazaritza-produktu batuk trukatzeko. Gaur egun, paseatzeko ibilbide berde moduan egokituta dago; oraindik ere zenbait tarte harriztatu ikus ditzakegu; izan ere, zenbait mendez handik gurdiak beteta igarotzen ziren.
Deskarga
Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.