Udaleko hezkuntza jarduerak – Ezagutu arreta-defizitaren eta hiperaktibitatearen nahasmendua

Educación para la salud

2023-2024 ikasturtea / Gaia: Bizikidetza eta aniztasuna

Izena eman online

Deskribapena

Arreta-defizitaren eta hiperaktibitatearen nahasmendua (ADHN) neurogarapenaren nahasmendu bat da, haurtzaroan sortzen dena eta bizitzan zehar eragiten duena. Osasunaren Mundu Erakundearen arabera, mundu osoan, eskola-adineko haurren % 3-7ri eragiten die, eta helduen % 4ri. Gaur egun, ez dakigu zein diren arreta-defizitaren eta hiperaktibitatearen nahasmenduaren zuzeneko eta berehalako kausak. Zenbait ikerketa zientifiko eta teoria saiatu dira haren jatorria azaltzen, eta ziur asko transmisio genetikoko nahasmendua dela onartu da oro har. Garunaren garapenean jaio aurretik gertatutako kalteen ondorioz ere ager daiteke, eta, neurri txikiagoan, jaio ondoren sortutako garuneko lesioen ondorioz.

Jatorria edozein dela ere, jarduera sozial, akademiko edo laboralaren narriadura klinikoki esanguratsua ekar dezake, hau da, sintomek nabarmen eragin dezakete pertsonaren bizitzan. Barkleyren arabera (1995), eskola-adinean ADHNa diagnostikatu zaien haurren % 80k baino gehiagok nahasmendua izaten jarraituko dute nerabezaroan, eta % 30-65ek, baita helduaroan ere. Nerabezarora hurbildu ahala, neurri handiagoan edo txikiagoan jokabide oldarkorrak edo desafiatzaileak agertzen direla ikus daiteke (gezurrak, lapurreta txikiak, autoritateari aurka egitea, etab.). Haur eta nerabe horien % 20-60k jokabide antisozialak edo nahasmendu disozialak ditu. Autoestimu txikia ere ager daiteke, tristura, kasuren batean depresioa eta etorkizuneko arrakastarekiko mesfidantza (Barkley, 1995).

Azpimarratu behar dugu abordatze terapeutikorako aukera gehien duten patologia psikiatrikoetako bat dela. Izan ere, kasuen % 75-90ek positiboki erantzuten die tratamenduei. Hori hala izanik, zailtasun eta ondorio larriak ez dira sortzen tratamendurik ez dagoelako, baizik eta nahasmendu horri buruzko kontzientziarik ez dagoelako, eta gaian adituak direnengana iristeko mugak daudelako. Ez dugu ahaztu behar nahasmendu horrek, diagnostikatutako pertsonari ez ezik, haren ingurune osoari ere eragiten diola, eta esku-hartze on batek pertsonaren orainaldiko eta etorkizuneko aurreikuspena hobetu dezakeela, baita alboko kalteak saihestu ere.

Baloreak

Inklusioa.

Helburuak

  • ADHNari ikusgarritasuna ematea, ikusezina dena ikusaraztea.
  • Neurodibergentzia ezagutaraztea.
  • Lehen Hezkuntzako ikasleek eta haien familiek patologia horren ezaugarriak ezagut ditzaten, hobeto ulertu ahal izateko.
  • Familia barruan ADHNa duen kiderik ez dutenek jakin dezaten nolakoa den eguneroko bizitza patologia hori duen pertsona batekin.

Hartzaileak

Guraso elkarteak.

Antolamendua

  • Lekua: ikastetxea (ikasgelak ordenagailua izan beharko du).
  • Egutegia: 2023-2024 ikasturtea.
  • Ordutegia: Guraso Elkarteak eta ANADAHI elkarteak adostu beharreko egunetan.
  • Iraupena: ordubete.
  • Hizkuntza: gaztelania.

Parte hartzeko betebeharrak

  • Izen-ematea: izen-emate fitxa bat bete behar da ikasgela bakoitzeko.
  • Prezioa: doan.
  • Eskaerak bidaltzeko epea 2023ko azaroaren 30ean amaituko da.

Izena emateko fitxa udalaren web-orriaren bitartez bidaliko da. Eskariei erantzungo zaie, inskripzio-ordenaren eta aurrekontu-erabilgarritasunaren arabera.

Ikastetxeak jarduera horretan parte hartzen duela zabaltzen duenean, Udal eta Vitoria-Gasteiz Hiri Hezitzailea proiektua aipatuko ditu.

Izena emateko epea amaitu ostean, eta plaza guztiak bete ezean, izena emateko epe berri bat irekiko da.

Informazioa

Laguntzailea

ANADAHI – Arreta falta, Hiperaktibitatea eta Inpultsibotasuna duten Haur eta Helduen Elkartea

www.anadahi.org(Beste leiho batean irekiko da)

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.