Hiriko 106 eskulturak geolokalizatzeko mapa interaktiboa estreinatu du Gasteizek
2024ko urriaren 30ean argitaratua
Gasteizko Udalak tresna berri bat estreinatu du: hiriko espazio publikoan kokatuta dauden 106 eskulturak jasotzen dituen eta GeoVitorian eskuragarri dagoen mapa interaktiboa. Proiektu horretan, Kulturaren eta Turismoaren zerbitzuek Edukien Unitatearekin lankidetzan jardun dute.
Mapa horrek, eskulturak geolokalizatzeaz gain, ‘Vitoria-Gasteizko kaleetako eskulturak’ liburutik ateratako argazkiak eta informazioa biltzen ditu. Argitalpen hori hiriko kaleetan kokatutako lan eskultorikoaren katalogo-inbentarioa da. Lan horiek ezagutaraztea eta eskulturen inbentario bat egitea du helburu, eta obra bakoitzaren eta inguruaren argazkiak, testurak, fitxa teknikoa eta kokapen-planoa biltzen ditu. Egungo liburua izenburu bereko jatorrizko lanaren (2022) berrargitalpena da. Ordukoa, Montehermoso Kulturuneak zuzendu eta argitaratu zuen 2022an.
Sonia Díaz de Corcuera Kultura eta Hezkuntza zinegotziak azaldu duenez, “Gasteizko kaleetan arte arloko bitxiak topa ditzakegu, eta tresna honek aukera ematen du horiek deskubritzeko; mapa interaktibo honen laguntzarekin hirian zehar ibiltzeko, eta gure kaleetako eskulturak ezagutzen joateko, haiei buruz ikasten dugun bitartean”.
Maria Nanclares Ekonomia Sustapen, Enplegu, Merkataritza eta Turismoaren zinegotziak, bestalde, nabarmendu du mapa berria “baliabide turistiko bat gehiago dela gure hiria bisitatzen dutenentzat. Gure gastronomia bikainaz eta gure natura pribilegiatuaz gain, ondarea da gure erakargarritasun nagusietako bat. Eta, orain, ondare hori sakonago ezagutzeko aukera dugu gure gailu mugikorren laguntzarekin”.
Datorren astean, baliabide berri horretarako sarbide zuzena txertatuko da GeoVitoria-Gasteizek duen Turismo menuan.
Eskulturen zerrenda datu irekien atarian
Aldi berean, Vitoria-Gasteizko Datu Irekien Atarian argitaratu da formatu berrerabilgarrian dauden eskulturen zerrenda, honako datu hauekin: Izenburua, Egilea, Kokapena eta Koordenatuak (Latitudea eta Longitudea).
Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.