Kulturaren Plan Estrategikoa 2024-2028
Kulturaren Plan Estrategikoa 2024tik 2028ra bitartean udaleko kultura-politiken norabide estrategikoa markatzen duen dokumentua da, Gasteizko kultura-eragileekin egindako partaidetza-prozesu baten emaitza.
Misioa
Batez ere tokiko esparruan, baina Europari eta nazioarteari begira, helburu hau duen estrategia zehaztu du: kultura-politika berritzailea, inklusiboa eta berdintasunezkoa bultzatzea, gizarte-testuinguru berri batetik sortutako erronkei aurre egiteko gai izango dena, eta kultura-ekintzari, sektorearen beharrei eta hiriko publikoari erantzuteko ausardia, konpromisoa eta lidergoa eskatzen dituena, lankidetzan eta etengabeko ebaluazioan oinarritutako kudeaketa aurreratuko prozesuen bidez.
Ikuspegiak, bestalde, honako asmo hau jasotzen du: Gasteiz Europako erreferentziazko hirietako bat bihurtzea kulturaren esparruan, tokiko talentua sustatuz, ondare artistikoa babestuz, diziplina anitzeko sorkuntza bultzatuz eta ikusleen aniztasuna sustatuz, berrikuntza, lankidetza, eraginkortasuna eta gobernantza ona abiapuntutzat hartuta.
Horrela, plangintza estrategikoa bideratzen duten zeharkako ardatz batzuk finkatu dituzte: euskara zaintzea eta bultzatzea, genero-berdintasunarekiko konpromisoa, jasangarritasuna, eta inklusioa eta aniztasuna.
Erronkak
- Hiriko kultura-ekintzari eta sektorearen eta publikoaren beharrei erantzungo dieten kultura-ekipamenduen optimizazioan aurrera egitea. Proiektu bultzatzaileak: Iradier Arena eta Principal Antzokia eraberritzea.
- Kulturarako sarbide unibertsala bermatzea, aniztasuna eta kulturartekotasuna errespetatzen dituzten politika inklusiboen bidez eta ikuspegi sortzaile, berdinzale, eraginkor eta berritzaile batetik abiatuta.
- Eragileen, erakundeen eta sektoreen artean lankidetzarako eta ezagutza transferitzeko prozesu aurreratuak bultzatzea.
- Gasteiz erreferente kultural gisa kokatzea, berezitasunari eta nortasun propioari balioa emanez.
- Partaidetzarako lidergo-eredua ezartzea, barne-komunikazioa erraztuko duena eta prestakuntzaren, trebakuntzaren eta aitortzaren alde egingo duena.
Lerro estrategikoak eta helburuak
- Lehenengoa kultura-jarduera bultzatzean oinarritzen da, eta honako helburu hauek ditu: sorkuntzarako laguntza-programak garatzea, Pilar Arostegi Udal Artxiboaren eta Montehermoso Kulturuneko dokumentazio-zentroaren jarduerari ikusgarritasuna ematea, Udalak tokiko kultura- eta sormen-sektoreari ematen dion laguntza indartzea, eta udal-programazio kulturalarekin lotutako berrikuntzarako, partaidetzarako eta deszentralizaziorako oinarri berriak sortzea, besteak beste.
- Bigarren ildoa kulturarako sarbide unibertsalaren ingurukoa da, eta kulturara sarbidea erraztea, herritarren parte-hartzea eta inplikazioa hobetzea eta kultura-komunikazioko estrategia berria garatzea ditu ardatz.
- Hirugarrenik, sailen, erakundeen, erakunde publiko eta pribatuen eta kultura-eragileen arteko lankidetza indartu nahi da. Horretarako, adibidez, erakundeen, hiriko kultura-ekintzan zuzenean edo zeharka esku hartzen duten sailen eta eragile pribatuen arteko koordinazioa eta lankidetza bultzatuko dira.
- Laugarren ildoari dagokionez, Gasteiz Europako kultur erreferente gisa kokatzea eta udalerriko ondare artistikoari balioa ematea du helburu.
- Azkenik, Kultura Zerbitzuko unitateen arteko koordinazioa indartuko da, eta Udal Folklore Akademia “Luis Aramburu” Udal Musika Eskola erakunde autonomoan sartuko da. Era berean, “Jose Uruñuela” Udal Dantza Kontserbatorioaren ikasketa arautuak Eusko Jaurlaritzaren mendeko ikastetxe publikoen sarera gehituko da.
- Horren guztiaren helburua izango da Kultura Zerbitzua modu eraginkorrean antolatzea (horixe bera da, hain zuzen ere, azken ildoa).
Ekintzak
Helburu horiek lortzeko, hainbat ekintza eta ekimen proposatzen dira eta, horien artean, hauek azpimarratu behar dira: Iradier Arena bultzatzea eskaera soziokulturalari erantzuteko; Principal Antzokia eraberritzea irisgarritasuna eta funtzionamendua hobetzeko; eta Publikoen Plana diseinatzea, gazteak, aniztasun funtzionala eta kulturartekotasuna ardatz izango dituena.
Urteko planak
Plana hedatu eta ezarri ahal izateko, urteko kudeaketa-planak egingo dira, zehaztutako erronkak betetzeko garatu beharreko lanak eta esku-hartzeak modu zehatz eta eraginkorrean zehazteko. Kudeaketa-plan horiek funtsezkoak izango dira plan estrategikoaren jarraipena eta ebaluazioa egiteko.
Ebaluazioa
Plan honen azken maila ekintzak behar bezala gauzatzen direla egiaztatzeko erabiliko diren 195 adierazleren bidez egingo den ebaluazioa da. Era berean, urteko jarraipena egingo da jarduera-memoriei esker, bi urtez behingoa, esku-hartzeen emaitzak islatzeko eta etorkizuneko plan estrategikoan txertatu beharreko doikuntzak zehazteko, eta 2028an amaierako ebaluazioa egingo da, Plan Estrategikoaren emaitza orokorrak zehatz-mehatz aztertzeko eta sortutako inpaktu kualitatiboa eta kuantitatiboa zehazteko.
Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.