Bide Helbide Elektroniari (BHE) buruzko ohar galderak

1.  Zer da?
Postontzi elektroniko bat da Bide Helbide Elektronikoa (BHE). Harpidetuz gero, bertan jasotzen dira, modu telematikoan, trafikoaren arloko komunikazio eta jakinarazpenak, paperezko jakinarazpenen ondorio juridiko berberekin.
Behin harpidetuz gero, jakinarazpen elektronikoak bakarrik bidaltzen dira, ez da gehiago posta arrunta baliatzen, eta, beraz, bizilekuz aldatuta ere, ez dago helbidea aldatu beharrik.
Trafikoaren arloko eskumenak dituzten administrazioek —Gasteizko Udalak, kasu— eskuragarri dituzte BHEko harpidetza-datuak, eta beren jakinarazpen-plataforma propioen bitartez helarazten dituzte jakinarazpen elektronikoak; Euskal Autonomia Erkidegon, PLATEA e-Administrazioko Plataforma Teknologikoaren bitartez.
Jakinarazpen elektronikoa burutzeko, abisu bat bidaltzen da posta elektronikoz, eta, nahi izanez gero, mezu bat telefono mugikorrera. BHEn harpidetzean eman behar dira helbide elektronikoa eta mugikorraren zenbakia —edozein unetan alda daitezke datu horiek harpidetzan—.
Mezu elektronikoa eta mugikorreko mezua ez dira jakinarazpenak, abisu hutsak baizik, eskura daitekeen jakinarazpen bat dagoela adierazteko.
Pertsona fisikoentzat borondatezkoa da harpidetzea, baina nahitaezkoa pertsona juridikoentzat, ibilgailu bat matrikulatu edo titulartasuna aldatu nahi dutelarik.
Bai BHEaren zerbitzua, bai abisu-bidalketak doakoak dira.
2.  Zer behar da harpidetzeko?
BHEan erregistratu edo harpidetzeko ziurtagiri digitala edo nortasun-agiri elektronikoa behar da, eta ordenagailu pertsonal bat, nabigatzailearekin —Explorer, 6.X bertsioa edo berriagoa, edo Mozilla Firefox 2.X bertsioa edo berriagoa—, baita gerora datuak aldatzeko ere.
Jakinarazpenaren abisua jasotzeko, helbide elektroniko bat eman beharra dago, eta, nahi izanez gero, telefono mugikorraren zenbakia.
Edozein unetan harpidetu daiteke.
3.  Nola kontsultatu eta aldatu datuak?
Ziurtagiri digitala edo nortasun-agiri elektronikoa baliatuz, noiznahi kontsulta eta alda daitezke harremanetarako datuak —helbide elektronikoa eta telefono-zenbakia—, abisuak ondo jasotzeko.
4.  Zein erakundek argitaratzen dute Bide Helbide Elektronikoan (BHE)?
Trafiko Zuzendaritza Nagusiaz gain, trafikoaren arloan eskumenak dituzten beste erakunde batzuek ere egin ditzakete jakinarazpen elektronikoak BHEaren bitartez, hala nola Kataluniako Trafiko Zerbitzuak, Eusko Jaurlaritzako Trafiko Zuzendaritzak eta sisteman sartzen diren udalek, Gasteizko Udalak, kasu.
5.  Iritsi al daitezke jakinarazpenak postaz, BHEan harpidetuta egonez gero?
Ez, BHEan harpidetuz gero, jakinarazpenak —Trafiko Zuzendaritza Nagusiarenak, Eusko Jaurlaritzako Trafiko Zuzendaritzarenak, Kataluniako Trafiko Zerbitzuarenak eta sistemari atxikitako udalenak, tartean Gasteizko Udalarenak— bide elektroniko horretatik eta horretatik bakarrik bidaltzeko baimena ematen da.
6.  Nola jakin daiteke pertsona juridiko bat BHEan harpidetuta dagoen?
BHEaren pertsona juridikoen kontsultaren(Beste leiho batean irekiko da) aplikazioaren bitartez egin daiteke kontsulta.
7.  Nola sar daiteke jakinarazpen elektronikora?
Euskal Autonomia Erkidegoan, honen bitartez sartzen da jakinarazpenetara: Euskal Administrazioaren jakinarazpen elektronikoen zerbitzua - Nire karpeta(Beste leiho batean irekiko da).
Administrazioak, interesdunari jakinarazteko, posta elektronikoz idazten dio, edo SMS bat bidaltzen.
Egiaztatu posta elektronikoko spam karpeta. Mezu horiek iruzurtzat jotzen dituzte zenbaitetan posta-hornitzaileek.
Abisua beti bidaltzen bada ere, komeni da aldian-aldian postontzi elektronikoan begiratzea — Euskal Administrazioaren jakinarazpen elektronikoen zerbitzua - Nire karpeta—, komunikazio edo jakinarazpenen bat ikusi gabe ote dagoen.
8.  Sar al daiteke ordezkariaren bitartez?
Bai. Inoren ordezkaria izanez gero, eta ordezkatuarentzako jakinarazpenak ikusi nahi badira, izena emanda egon behar da, ordezkari gisa, Euskal Administrazioaren jakinarazpen elektronikoen zerbitzuan(Beste leiho batean irekiko da).
Jakinarazpen elektronikoen euskal sisteman izena emateko, kanal elektronikoa balia daiteke, baina aurrez aurre ere egin daiteke, hitzordua eskatuta. Aurrez aurre egiteko aukera ordezkaritza-tipologia hauetara mugatuta dago: borondatezko ordezkaritza, ordezkatua pertsona fisiko bat delarik, eta pertsona juridiko edo entitate jakin baten ordezkaritzen kudeatzailearen izendapena.

Kanal elektronikoaren bitartez harpidetzeko, bai ordezkatuak, bai ordezkariak identifikazio elektronikorako bitartekoren bat eduki behar dute(Beste leiho batean irekiko da). Balia daitezkeen identifikazio elektronikorako bitartekoak egoitza elektronikoan onartzen diren berberak dira, hots, administrazio horren sinadura elektronikorako politikaren araberakoak.
Aurrez aurreko kanalaren bitartez izena ematekotan, horretarako formularioa jaitsi behar da, eta gero erregistroen arloan laguntzeko bulegoetakoren batean aurkeztu —Zuzenean bulegoetan, hitzorduarekin—. Kasu horretan, administrazioa arduratuko da aplikazioan harpidetzeaz.
Jakinarazpenaren hartzaile den pertsona edo entitateak ordezkari baten bitartez badihardu, ordezkari hori izango da abisua jasoko duena, jakinarazpen elektronikoa eskuragarri duela.
9.  Zer egin behar da, jakinarazpena irakurtzera sartzerik ez badago?
Ziurtagiri digitalarekin edo nortasun-agiri elektronikoarekin sartzerik ez badago, 945 01 68 38 telefonoan eska daiteke laguntza.
Gehienetan, ziurtagiri elektronikoa iraungi delako izan ohi da. Berritzen baduzu, edo berria eskuratzen, berriro izango duzu sarbidea jakinarazpen elektronikoetara.
10.  Zein egoeratan egon daiteke jakinarazpen elektroniko bat?
Hauek izan daitezke egoerak:
• Eskuratzeke, baldin eta hartzaileak postontzi elektronikoan jakinarazpena jaso badu eta eskuragarri badauka, onartu eta irakurtzeko edo ezesteko.
• Irakurria, baldin eta hartzaileak jakinarazpena eskuratu eta irakurri badu, sinadura elektronikoa tarteko.
• Ezetsia, baldin eta hartzaileak jakinarazpen hori ezestea erabaki badu berariaz, sinadura elektronikoa tarteko.
• Iraungia, baldin eta 10 egun naturaleko epea igaro bada, eskuragarri jarri zenetik, eta jakinarazpena irakurri edo berariaz ezetsi ez bada. Ezetsi izanaren ondorio legal bera du.
11.  Zer egin daiteke epearen hamar egun naturalak igaro badira, eta jakinarazpena iraungi?
Jakinarazpena iraungitzen delarik, 20 egun naturaleko epea hasten da, interesdunak egokitzat jotzen dituen jarduerei ekin diezaien: isuna ordaindu, alegazioak aurkeztu edo beste. Postontzi elektronikora sartzerik izango du, jakinarazpena irakurtzeko.
12.  Isun baten jakinarazpena edukiz gero, nola ordain daiteke, internet bidez?
Isunaren jatorria zein den begiratu beharra dago; izan ere, BHEa ez da bakarrik Gasteizko Udalaren trafikoaren arloko jakinarazpen elektronikoen postontzia, bertan jasotzen baitira, orobat, Trafiko Zuzendaritza Nagusiaren jakinarazpen elektronikoak eta zigortzeko eskumena duten beste zenbait administraziorenak ere. Jakinarazpena igorri duenaren egoitza elektronikoan edo bulegoan ordaindu behar da isuna.
Adibidea: Gasteizko Udalaren isun bat jasoz gero, Gasteizko Udalaren egoitza elektronikoaren bitartez egin behar da ordainketa.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren postontziaren bidez.