Egitekoa eta mugarriak - Bizikidetza eta Aniztasuna

Norabide

Egitekoa

Bizikidetza eta Aniztasun Zerbitzuak lan-arlo hauek jorratzen ditu:

  • Dibertsitate funtzionala
  • Bakea eta Giza Eskubideak
  • Kulturartekotasuna
  • Memoria Historikoa

Zerbitzuaren zeregina hiriari eta Udalari tresnaz hornitzea da, zenbait kolektibo aniztasunaren inguruan -dela funtzionala, ideologikoa zein kulturala- sentiberatu, ikusarazi eta partaidetzan inplikatzearen bila, betiere aniztasuna hiria dinamismoz, berrikuntzaz eta sormenaz (hots, aniztasunaren kulturaz) janzten duen balio gisa onartu eta aintzatesteko testuinguru baten baitan.

Pertsona guztiak gara anitzak -zentzu bakar batean baino gehiagotan-, kontresankorrak zentzu askotan, eta desberdinak gure artean; hori oinarri hartzen badugu, elkarbizitza harmoniatsu, emankor eta esker onekoa eraikitzeko urratsak eman ahalko ditugu. Abiapuntu gisa, elkarbizitza ikasi egiten dela ulertzen dugu, egintza borondatezko eta kontzientea dela, bai eta batez ere guztion artean ehuntzen ditugun adostasunak garatzearen eta praktikara eramatearen emaitza dela.

Bizikidetza eta Aniztasun Atala 2015eko uztailean jaiotzen da eta Alkatetzaren eta Erakunde Harremanen Sailaren baitan dago.

Mugarriak

2016ko martxoaren 21ean, Gasteizko Udala osatzen duten alderdi politiko guztiek, izenburu honekin: "Gasteiz, bizikidetza-hiria. Gasteizen bizikidetzaren aldeko konpromisorako akordio politikoa" izeneko printzipio-adierazpena aurkeztu zuten publikoki. Bertan adostutako konpromisoen artean, honako hauek daude:

  • "Hiria bizikidetzaren ardatz nagusia dela azpimarratzea. Lankidetzan, elkarrengandik ikastean, elkarrekikotasunean eta, batez ere, pertsonen arteko interakzioan oinarritutako komunitatea."
  • "Gatazkak bizitza sozialak berezko dituen ezaugarritzat hartzea, eta haiei modu baketsuan ekitea."
  • "Herritarrek parte hartzeko eszenatokiak eta erakunde esparruak ezartzea, hiri espazioak eta sozialak, pertsonek eta taldeek zein hiri motatan bizi nahi duten erabaki dezaten."

Erakunde-adierazpen hori aniztasunean oinarritutako bizikidetzaren aldeko apustu irmoa eginez amaitzen zen, bide-orri hartuta Bizikidetza eta Aniztasun Plana, zeina 2018ko urtarrilaren 24an aurkeztu baitzen Europa biltzar jauregian.

2019ko martxoaren 21ean, Arrazagatiko Diskriminazioa Desagerrarazteko Nazioarteko Eguna dela baliatuz, Gasteizko Udalak udal-zentroak 'Diskriminaziorik gabeko Guneak" izendatu ditu. Horretarako, 45 udal zentrotan xaflak jarri ditu Giza Eskubideen Aldarrikapen Unibertsalaren 1. artikuluan oinarritutako testuarekin.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.