Basaldea - Proiektuaren informazioa

Testuingurua | Helburuak | Jarduera ildoak | Proiektua garatzeko faseak | Aurreikusitako emaitzak

Testuingurua

GasteizKO Eraztun Berdeak nekazaritza lurrek osatutako beste eraztun bat du inguruan, 11.000 ha-koa. Laboreak lautadan kokatzen dira, haranen behealdean, eta abeltzaintza, berriz, tarteko lurretan, basoetako malda handien eta soroen malda txikien artean. Horrela, baso-artzaintzako ekosistema askotariko eta konplexuak osatzen dituzte, ekologia eta paisaia aldetik balio handikoak.

Gasteizen gaur egun 462 ustiapen dago, ezaugarri hauekin:

  • 383 nekazaritza hutsekoak dira, 67 abeltzaintza ustiapenak dira, eta 12 mistoak.
  • Laboreen % 85,6 lehorrekoa da (% 70 zereala), eta gainerako % 14,4 ohiko labore ureztatuak dira, patata eta erremolatxa, esaterako (azken hori da nagusi, % 8 hartzen baitu).
  • Gasteizko ustiapenen nortasun juridikoari dagokionez, % 86,4 pertsona fisikoak dira, % 10,8 sozietate zibilak, eta % 2,8k beste izaera juridiko batzuk dituzte.
  • Alorrean diharduten pertsonen ezagugarriak:
  • Multzo handiena 65 urte edo gehiago dutenek osatzen dute.
  • Ustiaketa buruak gehien bat gizonezkoak dira (% 72,9); emakumeak, berriz, % 27,1 dira.
  • % 65,2k ez du beste irabazpiderik, edo erretiratua dago; % 31k beste irabazpide bat du, jarduera nagusitzatzat, eta % 3,9k bigarren mailako jardueratzat.
  • Negozioaren jarraipenari buruz galdetuta, % 93,2k adierazten du ustiapenaren buru izaten jarraitu nahi duela, % 4,6k ez du jarraitzeko asmorik eta ez du ondorengorik, edo ondorengotza zalantzazkoa da, eta % 2,2k ez du jarraitzeko asmorik baina badu ondorengorik.
  • Gasteizko nekazaritza eta abeltzaintza ustiapenen % 5,62k esku-lana behar duela adierazten du. Hau da, 26 ustiapen. Horietako 14tan esku-lana kontratatzeko arazoak dituzte.

Laburbilduz, Gasteizko nekazaritza ustiapenetan ere nabaritzen ari dira alor horretan gertatutako birmoldaketa prozesua; izan ere, azken 9-10 urteetan % 6 gutxitu da landutako lurren azalera: % 3 lehorreko lurretan eta % 22 ureztatutakoetan.

Udalerriko nekazaritza eta abeltzaintzaren azken urteetako egoera bi faktoreren emaitza da: Europar Batasuneko Nekazaritza Politikaren aplikazioa eta herritarren kontsumo ohiturak.

Hori dela eta, ekoizpen eredua gehiago bideratu da nekazaritza industriarako lehengaiak ekoiztera, bertako beharrizanak hornitzera baino.

Hala ere, azken urteetan zerbait aldatzen ari da:

  • Kontsumo ohiturak.
  • Bertakoari balio gehiago ematea.
  • Produktu fresko galkorraren kalitateari garrantzi handiagoa ematea.
  • Hirigintza hazkundeari buruzko ikuspegi berria.
  • Udaleko Azoka Plazan zuzenean saltzen duten ekoizleen kopurua handitzea.
  • Kontsumo taldeen ugaritzea, tokiko produktuei laguntzeko ekimenen bitartez (Slow Food, Uagalur edo Lur Lan).
  • Bereizgarri gisa produktu ekologikoa duten negozioak sortzen hasi dira (ENEEK-Euskadiko Nekazaritza eta Elikadura Ekologikoaren Kontseiluaren ekoizle erregistroan izena emanda dauden ustiapenak, sukaldariak...)

Bestetik, Araban nekazaritza ekologikorako erabiltzen diren landatutako lurren azalera handitzen jarraitzen du, eta urteko hazkunde tasa % 12 da. Gasteizko udalerrian, zehazki, zenbait ustiapen ENEEK-Euskadiko Nekazaritza eta Elikadura Ekologikoaren Kontseiluaren ekoizle erregistroan izena emanda daude. Beren "marka" tokiko produktu ekologikoetan oinarritu nahi duten sukaldarien eskaera ere indartzen ari da.

Kultura, jokabide eta erosketa ohituretan gertatzen ari diren aldaketa horiek pentsarazten dute ekoizpen ekologikoan eta gertutasunean oinarritutako nekazaritza eredu batek lan aukera berriak sortzeko bide eman dezakeela, hots, lan harrobia izan daitekeela. Administrazio publikoak ekimen horien guztien eragile eta bateratzaile bihur daitezke, eta hortxe du lekua nekazaritza ekologikoa sustatzeko BASALDEA proiektuak.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.