Vitoria-Gasteizko Emakumeen Etxearen sortze prozesua

Vitoria-Gasteizko Berdintasunerako Zerbitzuak abian jarri zuen gure hirian Emakumeen Etxea sortzeko partaidetza-prozesua. Helburu nagusietakoen artean honako hauek nabarmentzen dira: askotariko emakumeen oinarrizko beharrak eta interes estrategikoak identifikatzea eta Etxearen funtzionamenduaren oinarriak jartzea. Prozesua, ikuspuntu feminista eta intersekzionaletik diseinatua, parte-hartzaileen jabetzerako eta ikasketa kolektiborako esperientzia izateko pentsatua dago.

Dokumentu hau , Emakumeen Etxea sortzeko prozesuaren Talde Eragileak egina, eta Talde Eragile Indartuak berretsia da, pasa den abenduaren 19an. Prozesuaren lehenengo etapan sortutako adostasunak biltzen ditu (2017ko urtarriletik abendura).

Prozesu parte-hartzailearen markoak ezartzen duen bezala, Udalak erantzun bat emango du "TEIan zehaztutako akordioak bereganatuz, betiere bideragarriak eta egokiak direnean, onartzen ez diren akordioen inguruko argudioak eskainiz".

Prozesuaren lehenengo fasean zehar, Talde Eragileak hainbat eraikin proposatu ditu, Emakumeen Etxea bertan antolatzeko aproposak direnak. Halere, Udalaren ustez, ez dira bideragarriak. Izan ere, ez dira udalekoak edo bere egoera ez da erabiltzeko modukoa eta birgaitze-lan handiak beharko lituzke.

Bukatzeko, 2018ko ekainean, Talde Eragileak onartu zuen Emakumeen Etxea Etxanobe jauregian (Santa Maria kalea, 11) irekitzea, irisgarritasuna hobetzeko lanak behin eginak, 179.069 eurotan, BEZ-a barne.

Egun, Talde Eragilea osatzen duten erakundeek eta Udaleko Berdintasunerako Zerbitzuak Etxearen kudeaketa partekatua bere gain hartuko duen Erakundeko Hitzarmena egiten ari dira.

Emakume afrikarren ahotsak proiektua Gasteizen Emakumeen Etxea sortzeko prozesuan kokatzen da. Medicusmundi Araba eta Manuel Iradier Elkarte Afrikanista aurkeztu zuten proiektu hori Mejorando Vitoria-Gasteiz Hobetuz programara.

Lehenengo etapa

• 0 fasea (urtarriletik martxora) - Lan-prozesuaren egiaztapen tekniko-politikoa.
• fasea (martxotik maiatzera) - Talde eragilea sortzea eta prozesua abiatzea.
• fasea (ekainetik irailera) - Errealitatearen lehenengo ezagutza (intersekzionalitatea erdigunean).
• fasea (irailetik abendura) - Parte hartzeko prozesuaren garapena.
• fasea (abendua) - Parte hartzeko prozesuaren amaieraren ospakizuna.

0 fasea - Lan-prozesuaren egiaztapen tekniko-politikoa. (2017ko urtarriletik martxora)

• Emakumeen etxea sortzeko prozesuan parte-hartzeko esparrua: partaidetza-esparruaren dokumentua . Parte hartzeko prozesua gidatuko duten xedeak eta printzipioak jasotzen ditu dokumentu horrek (Vitoria-Gasteizko Udalak ezarri ditu). Gainera, proposamen metodologiko bat jasotzen du.
• Berdintasunerako Elkargunea (2017ko apirilaren 3a) . Elkargune horretan, Emakumeen Etxea sortzeko prozesuan parte hartzeko esparrua aurkeztu du Berdintasunerako Zerbitzuak. Era berean, prozesua jorratzeko proposamenaren berri eman du. Ikuspegi feministak, ikuspegi intersekzionalak eta baterako ahalduntzeak zeharkatzen dute proposamena.

1. fasea - Talde eragilea sortzea eta prozesua abiatzea. (2017ko martxotik maiatzera)

• Talde eragilearen lehenengo saioa. Taldea eratzen duten elkarteek Vitoria-Gasteizen zer-nolako Emakumeen Etxea (filosofia, espazio fisikoak eta abar) nahi duten eta zein nahi eta zein beldur dauzkaten adieraz dezatela izan da saioaren helburua. Bestalde, intersekzionalitateari buruzko lehenengo hausnarketak egin dira. Generoaz gain, berdintasunik eza eragiten duten egiturazko iturriak identifikatu ditugu, eta beste elkarte batzuekin harremanak egiteko estrategiak pentsatu, Etxea beren aldarrikapen espezifikoei hurbiltzeari begira.

2. fasea - Errealitatearen lehenengo ezagutza (intersekzionalitatea erdigunean). (2017ko ekainetik irailera)

• Talde eragilearen bigarren saioa. Lan-prozesua eta kronograma adostu dituzte talde eragilea eratzen duten elkarteek. Hiriko elkarteen eta emakumeen ehunduraren gaineko diagnostiko modura, soziograma bat sortu dute. Sareak ehuntzeko orduan edo talde eragile indartuko kide izateko orduan aliatuak izan daitezkeen emakumeak eta elkarteak identifikatzeko balio izan du ariketa horrek.
• Talde eragilearen hirugarren saioa. Aliantzak eta sareak ehuntzeko fasea jorratze aldera, lan-jardunaldi trinkoa antolatzea erabaki dute talde eragileko elkarteek. Lan-jardunaldi horretan, ahalik eta emakume gehien eta emakumeen elkarte eta elkarte feminista gehien bildu nahi dira. Bertan, zuzenean jasoko dira askotariko sentsibilitateak, iritziak, irizpideak eta ekarpenak. Horrela, baterako eraikuntza-prozesuan aurrera egiteko saiakera egingo da. Beste alde batetik, zehaztutako eraikinik gabe Etxeak izan ditzakeen erabileren inguruan pentsatzea zaila dela azpimarratu dute talde eragileko elkarteek.
• Talde eragilearen laugarren saioa. Tejiendo redes / Sareak josten jardunaldia antolatu da. Talde eragileko kide bakoitzak egun horretan edukiko dituen rolak eta eginkizunak adostu dira, eta lan-eremuak ezarri:
  • Filosofia/printzipioak eta kanpo-komunikazioa.
  • Kokapena, eraikinak, espazioak eta zerbitzuak.
  • Kudeaketa-eredua, finantzaketa/aurrekontua eta Udalarekiko harremanak.
  • Beste kolektibo, elkarte eta emakume batzuekin lan egitea, hurbildu daitezen eta Etxea berena senti dezaten.

Tejiendo redes / Sareak josten jardunaldia: Lau ordu eta erdiko iraupena eduki zuen jardunaldi trinko horrek, eta hauek lortu genituen:

• Aniztasuna eta adostasun-oinarria areagotzea, parte-hartzaileen indar kolektiboa landuz.
• Emakumeen beste etxe batzuen esperientzietara hurbiltzea, kudeaketa-ereduaren, erabakiak hartzeko gunearen eta eguneroko funtzionamenduaren arloan ondo egin dituztenak, gaizki egin dituztenak eta dauzkaten erronkak ezagutzeko.
• Hurbilketak, harremanak eta elkarrekin eraikitzen hasteko moduak eratzen hastea, Etxearen konfigurazio kolektiboa ahalbidetu dadin.

3. fasea - Parte hartzeko prozesuaren garapena. (2017ko irailetik abendura)

• Talde eragilearen bosgarren saioa. Talde eragileak hala eskatuta, Jaione Agirre Berdintasuneko zinegotziak parte hartu du saioan. Bertan, Etxanobe etxeaz gain, Udalak, bideragarri iritzita, Emakumeen Etxea proiektuaren eskura jarri dituen erakinen berri eman du. Hauek dira: Etxezarra jauregia eta Renfe eraikina.
• Talde eragilearen seigarren saioa. Oinarrizko dokumentu baten gainean, zeina Emakumeen Etxearen sortze-agiria izango den, zenbait puntu adostu ditugu, eta eztabaidatzeko utzi aurkako jarrerak edo iritziak zituztenak. Elkarteak kezkatzen dituzten ekarpen eta gai giltzarriak identifikatu ditugu, bai horien gainean lan egiteko, bai ados jartzea lortzeko, bai agiri hori elikatzen jarraitzeko.
• Talde Eragilearen zazpigarren saioa. Oraindik ere, desadostasunak daude puntu batzuen inguruan, eta adostasun-bila jarraitzen dugu. Parte hartzeko ereduarekin eta eraikinari arreta emateko behar diren langileekin daukate zerikusia desadostasun horiek. Gainera, Etxerako hainbat izen proposatu ditugu, eta Talde Eragile Indartuaren lehenengo saioa prestatu dugu: zein metodologia erabiliko dugun eta elkarte bakoitzak gune horretan bere gain hartuko dituen rolak zehaztu ditugu.

Talde Eragile Indartua (TEI)

Talde Eragile Indartuaren lehenengo saioa. Egitura honek Talde Eragilearekin eztabaidatzeko eta hitz egiteko gaitasuna dauka, eta talde feministetako, berdintasunaren alde lan egiten duten eta irabazi-asmorik ez duten emakumeen elkarteetako eta genero-ikuspuntu markatuarekin lan egiten duten elkarte mistoetako emakumeek osatuko dute, bai eta udaleko talde politikoek ere, edota berdintasunean eta feminismoetakontzientzia eta eskarmentua duten emakume norbanakoek. Lehenengo saioan, Talde Eragileak hartu dituen erabakiak aberastu ditu, eta dokumentu batean jaso.

• Talde eragilearen zortzigarren saioa. TEIko lehenengo saioari buruzko parte-hartzea, garaipena eta ondorioak ebaluatu ditugu. Azpimarratzen dugu Emakume anitzek Gasteizek Etxe bat izatea nahi dutela, emakume guztien giza eskubideen erreferentea izango dena. Esparru horretan sortutako proposamenak baloratu ditugu eta haietako batzuk lan dokumentuan sartu ditugu.
• Talde eragilearen bederatzigarren saioa. TEIko bigarren saioa diseinatu dugu. Horretan, parte-hartzaileei TEk adostutako dokumentua berresteko eskatuko diegu, TEIko lehenengo saioan sortutako proposamenak behin sartuta. Dokumentu hori Etxea sortzeko prozesuaren lehenengo fasearen emaitza da eta prozesuan lagundu duten erakundeen akordioak biltzen ditu, Gasteizko Emakumeen Etxeak izan behar dituen oinarriei buruzkoak.

Talde Eragile Indartuko (TEI)

Talde Eragile Indartuaren bigarren saioa. Saio honetan parte hartu duten hainbat erakundetako emakumeek eta emakume indibidualek berretsi dute Gasteizko Emakumeen Etxea sortzeko oinarrizko dokumentua. Oro har, adostasun handia erakutsi dute, nahiz eta egon badauden puntu batzuk zehaztasun edo eztabaida gehiago eskatzen dutenak.

4. fasea - Parte hartzeko prozesuaren amaieraren ospakizuna. (2017ko abendua)

Lotutako informazioa

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.