Emakumeen Etxeko printzipioak eta historia

Printzipioak

Emakumeen Etxearen printzipioak prozesu parte hartzailean adostutako akordio markoan oinarrituta daude (2017ko abendua), egungo errealitatera egokituta:

  • Etxea inklusiboa, irekia eta plurala izango da.
  • Feminista eta feminismoaren sustatzailea hirian.
  • Leku segurua eta konfiantzazkoa emakume guztientzat.
  • Erreferentea feminismoaren eta berdintasunaren alde lan egiten duten pertsona, elkarte eta erakunde guztientzat.
  • Irisgarritasun unibertsalaren bultzatzailea.
  • Elkarrenganako topaketarako eta aintzatespenerako lekua, non balioa emango baitzaio sexu- eta orientazio-aniztasunari, aniztasun funtzionalari, jatorriari, kulturari eta klase sozialari.
  • Errespetu- eta ekitate-balioek zuzendutako espazioa, prestakuntza, prozesuak, sormena eta aisia barne hartzen dituena, betiere ikuspegi feminista eta intersekzionaletik.

Historia

Gasteizko Genero Berdintasunerako IV. Planak, "Ahalduntze Feminista" ildo estrategikoan, Gasteizko Emakumeen Etxea abian jartzea jasotzen du. Inplikatutako hainbat elkarte eta emakumerekin lankidetzan eta partaidetza prozesu baten bidez, hasierako proposamen bat adostu zen proiektua abiarazteko.

Emakumeen ahalduntze pertsonala eta kolektiboa bultzatzea zuen helburu; hausnarketarako, prestakuntzarako, parte-hartzerako eta eraginerako espazio eta prozesu feministak bultzatu eta sendotzea.

Hala, Sorginenea-Zure Etxe Feministak 2019an ireki zituen ateak. Gasteizko mugimendu feministaren aldarrikapen historiko bati erantzuna eman nahirik, eta hiriko emakumeen, lesbianen eta transen berariazko eskaerak kudeatzeko eta ahalduntzeko espazio bat izateko premiak bultzatuta. Etxeak ateak ireki zituenetik, horretarako berariaz sortutako Sorginenea elkarteak Udalarekin batera kudeatu zuen proiektua, lankidetza-hitzarmen baten bidez.

Hala ere, 2021etik aurrera, Sorgineneak uko egin zion proiektuaren kudeaketari, hausnarketa prozesu bati ekiteko. Horregatik, Gasteizko Udalak, Berdintasun Zerbitzuaren bidez, bere gain hartu zuen Emakumeen Etxearen kudeaketa aldi baterako.

Lotutako informazioa

  

Zure iritziak axola digu

Lagun iezaguzu hobetzen. Informazio hau baliagarria gertatu zaizu?

Nahi baduzu, iruzkinak egin ditzakezu.
Nahitaezkoa da identifikatzea.

Izartxoarekin markatutako eremuak derrigorrezkoak dira.