Vitoria-Gasteiz Film Office - Vitoria-Gasteizen filmatzea

Atal honetan, hiriko filmaketa planifikatzeko informazio guztia aurkituko duzu, bai eta behar diren filmaketa-baimenei buruzko informazioa ere.

Eremu publikoa erabiltzea

Eremu eta jabetza publikoetan grabatzeko eskaerak doan izapidetzen ditu Vitoria-Gasteiz Film Office zerbitzuak; hala nola, parkeetan, lorategietan eta eraikin historikoetan filmatzekoak.

Prozedura:

1. Filmaketa-baimenaren eskaera egiteko inprimakia betetzea eta Vitoria-Gasteiz Film Office zerbitzura bidaltzea hori (filmoffice@vitoria-gasteiz.org), 10 laneguneko gutxieneko epean.
2. Gidoiaren sinopsi laburra, lan-plana eta aseguru-polizaren kopia aurkeztea.
3. Eremu publikoan filmatzeko unean, behar bezala babestuta eta seinaleztatuta egon beharko dute material eta kable guztiek, oinezkoen segurtasunari begira. Gainera, aurretik jakinarazi beharko da, babes- eta segurtasun-neurri egokiak hartu ahal izateko.
4. Hiri-altzarietan aldaketarik egin nahi bada, jakinarazi egin beharko da, aldatu nahi den elementua zein den adieraziz eta horren argazkia, kokalekua eta toki horretako filmaketa-datak erantsiz.
5. Ahal den neurrian, eremu publikoa osatzen duten elementu guztiak errespetatzen saiatu behar da, eta, filmaketa-egun bakoitza amaitzean, egoera ezin hobean utziko da. Hau da, topatutako egoera berean.
6. Inguruko herritarrak edota saltzaileak ohartarazi behar badira, ekoizleak jakinarazpena jarri beharko du eragindako zenbakietan, 5 egun lehenago.

Seinaleztapena eta trafikoa ixtea

1. Ekoizleak behar bezala seinaleztatu beharko du filmaketan okupatzen duen eremua, oinezkoentzako eta ibilgailuetarako tokia utziz. Garrantzitsua da eskaeran argi eta garbi adieraztea toki guztiak, mapak edo horietarako estekak sartuz, behar bezala egokitu ahal izan daitezen.
2. Ikusgarritasun txarra dagoenean, trafikoa ixten denean edo gauez filmatzen denean, behar den seinaleztapenaz eta argiztapenaz gain, txaleko islatzaileak eraman beharko ditu taldeak.
3. Trafikoa ixtea eskatu nahi den guztietan, ahalik eta gehien zabaldu beharko da 7-10 eguneko gutxieneko epea. Mozketa aldizkakoa izatea aholkatzen dugu, eta puntako orduetatik edota asteburuetatik kanpo egin dadila, ibilgailuen trafikoa ez asaldatzeko.
4. Trafikoa itxiko den egunen eta ordu-tarteen berri emango zaie auzotarrei, eta, beharrezkoa balitz, baita filmaketa-egunetan eremuan aparkatzeko ezintasunaren berri ere. Era berean, Trafiko Arloak hala eskatzen duenean, tokiko komunikabideetan jakinaraziko da, VGFO zerbitzuarekin koordinatutako iragarkiaren bidez, ekoizlearen kargura.

Su-armekin edota lehergailuekin filmatzea

Filmaketan su-armak edota lehergailuak erabiltzen badira, arauzkoak eta jaurtigairik gabekoak izan beharko dira. Era berean, dokumentazioa eguneratuta eduki beharko dute, eta horren kopia bidali beharko zaio VGFO zerbitzuari.

Edonola ere, eta filmaketa hasi aurretik beti, segurtasun-taldeei (poliziari, suhiltzaileei eta larrialdietako zerbitzuei) jakinarazi beharko zaie, prebentzio-kontuengatik.

Segurtasun-zerbitzuen edota larrialdietako zerbitzuen simulazioa

Segurtasun-zerbitzuak edota larrialdietako zerbitzuak simulatzen dituzten uniformeekin edo ibilgailuekin filmatu baino lehen, Vitoria-Gasteiz Film Office zerbitzuari jakinarazi beharko zaio aurretik.

Aseguru-polizak

Filmaketa hasi aurretik, erantzukizun zibileko polizaren kopia aurkeztu beharko da, filmaketaren bitartean eragin daitezkeen kalte-galerak estali ahal izateko.

Lotutako informazioa

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.