Haurrei, nerabeei eta familiei zuzendutako gizarte zerbitzuei buruzko ohiko galderak

1.  Zer egin dezaket, baldin eta familian seme-alaben inguruko arazorik badut?
Arazo edo zailtasunen berri eman dezakezu zure helbidearen arabera dagokizun Oinarrizko Gizarte Zerbitzuan(gizarte etxean dago). Bertan, aldez aurretik hitz ordua eskatu behar duzu, Gizarte Langile batek hartuko zaitu eta zure egoera baloratu ondoren orientazioa emango dizu, eta beharrezko jotzen badu Udaleko Haurtzaro eta Senitarte Zerbitzuarekin harremanetan jarriko zaitu.
2.  Gurasoek behar bezala zaintzen ez duten haur baten kasuaren susmoa dut, baina ez nago seguru; zer egin dezaket?
Ezagutzen duzun egoera haurrarentzat arriskutsua den edo ez argitzeko orientazioa behar baduzu, jo ezazu zure inguruko Oinarrizko Gizarte Zerbitzura; bertan hartuko zaituzte, eta informazioa eskatuko dizute, babesgabezia egoera den baloratzeko, eta horrela bada, kasu horietarako dagoen prozedura martxan jartzeko.
Ezagutzen duzun egoerak haurra babestuko premiazko eskuhartzea behar duela uste baduzu, jo ezazu Udalaren Gizarte Larrialdietarako Zerbitzura(San Antonio kalea, 10; telefonoa 945 13 44 44).
3.  Nire semea edo alaba nerabearekiko elkarbizitza eutsiezina da; zer egin dezaket?
Arazo edo zailtasunen berri eman dezakezu zure helbidearen arabera dagokizun Oinarrizko Gizarte Zerbitzuan(gizarte etxean dago). Bertan, hitzordua eskatu behar duzu gizarte langile batekin egoteko, eta berak orientazioa emango dizu baita, beharrezko jotzen badu, Udaleko Haurtzaro eta Senitarte Zerbitzuarekin harremanetan jarriko ere. Zerbitzu horretan zuri eta zure seme edo alabari laguntzeko zerbitzuak dituen baliabide egokiak zeintzuk diren baloratuko dute.
4.  Denbora librerik badut, eta hirian seme-alabak zaintzeko laguntza behar duten familiei lagundu nahi diet; zer egin behar dut?
Jo ezazu Haurtzaro eta Senitarte Zerbitzura(telefonoa 945 16 13 79) edo 010 telefonora; bertan, Familietan Aldi Baterako Laguntza Emateko "Orain" Programari buruzko informazioa emango dizute. Programa horretan laguntza ematen duten familia-taldean parte hartu ahalko duzu, haur eta nerabeei arreta eman, behar puntualetan edo aldi baterako, horien gurasoek haien ardura hartu ezin duten bitartean.
5.  Ze programa ditu Haurtzaro Zerbitzuak familiei laguntzeko?
Familiek seme-alabei arreta eta hezkuntza ematerakoan izan ditzaketen beharrizanak eta oztopoak identifikatzen ditu Haurtzaro eta Senitarte Zerbitzuak eta, hartara, guraso diren aldetik dagozkien erantzukizunei aurre egiten laguntzeko baliabideak ezartzen.

Balioespen eta esku-hartze programa hauek ditugu:
- Pausoka programa: haurren babesgabetasuna dela eta ikerketa- eta ebaluazio-aldian dauden familiei psikologia eta heziketa sostengua eskaintzen zaie.
- ASASI programa: laguntza psikologia sexu gehiegikerien kasuetan.

Haurren ongizatearen aldeko baliabideak sustatzeko asmoz:
- Gurasoei orientazioa eskaintzeko lantegiak: Senidegune, jardunbide egokiak, familia-dibertsitatea...
- Haur eta nerabeentzako lantegiak: emozioak, jardunbide egokiak...

Ahultasun-egoeretan sostengu emateko eta tresnak emateko, programa hauek ditugu:
- Orain programa: seme-alaben zaintza eta zenbait jarduera —beren prestakuntza osatzeko, enplegu bati eutsi edo enplegua lortzeko, osasuna berreskuratzeko, etab.— bateratzeko arazoez gain, baliabide ekonomikorik edo senideen edo gizarte laguntzarik ez duten gurasoei zuzendua.
- Prólogo programa: gurasoei familiak dituen gabeziak konpontzeko gaitasunak eskuratzen laguntzeko esku-hartzea, hazkuntza jokabide ezegokiak finkatu eta kroniko bihurtzea eragozte aldera.
-Egokitzen programa, gurasokidetasun positiboa lantzeko: banantze edo dibortzio egoeran dauden gurasoentzat. Familian ingurune segurua sortzeko trebetasun eraginkorrak lantzea da helburua, gurasoen arteko banaketa gertatu ondoren seme-alabek moldatu eta egoki hazterik izan dezaten, baita gurasokidetasun positiboa sustatzea eta umeei emozioak kudeatzen laguntzea ere.
- Familientzako sostengu psikologikoa.

Familiak babesteko baliabideak, psikologia eta heziketa sostengua emateko:
- Gizarte eta hezkuntza zentroak: haur eta nerabeei ematen zaie laguntza hezkuntza esku-hartze indibidualaren bidez, zentroan bertan, eta aldi berean, familiarekin lan egiten da zailtasunak gainditzeko.
- Lanerako prestakuntzarako gizarte eta hezkuntza zentroa: 16 eta 18 urte bitarteko nerabeei zuzendua, horien gizarte- eta lan-integrazio osoa ahalbidetzeko.
- Familiak babesteko Salburua programa: gizarte eta hezkuntza arloetako esku-hartze programa da, non diziplinarteko lantalde batek gaitzeko estrategiak jorratzen dituen guraso eta haur eta nerabeekin.
ADA programa (Laguntza eta Garapen Egokituko Programa): hainbat baliabide biltzen ditu (hezkuntza sostengua, familia zein norbanakoentzako terapia, autolaguntza taldeak eta abar), familien beharren arabera.
- Bidatu programa: 8 urtetik beherako seme-alabak dituzten ama bakarrei zuzendua, guraso-trebetasun nahikorik ez badute eta sostengu txikia edo batere ez badute.
6.  Zer da haur eta nerabeen parte hartzerako LAGUNKIDE programa? Nola har dezaket parte bertan?
Haurtzaro eta Senitarte Zerbitzuko programa Gasteizko udalerriko haurrek eta nerabeek beren eskubide zein betebeharrak ezagutu ditzaten saiatzen da, eta aldi berean gizarteak aintzat har ditzan lortzen du, haiei dagozkien gaietan parte hartzen dutela ikusita.
16 urtetik beherakoei zuzendutako programa da.
Hainbat modutan hartu daiteke parte:

  • Eskubideen Batzordeak
  • Arte-forum saioak
  • Hirikoak
  • Haurrentzako parte hartzeko foroak
  • Parte hartzeko web-gunea
  • Zabalkunde eta sentsibilizazio jardunaldiak
  • Haur eta nerabeen eskubideei buruzko hitzarmenaren urtemuga ospatzeko jaia
7.  Emozio Lantegiaren berri izan dut, nori zuzendua dago?
Emozio lantegien helburua emozioen mundura hurbiltzea da, horiek adierazi eta sozializatzeko espazioak eskainiz. Hartzaile mota desberdinei zuzentzen zaizkie lantegiak:

3 eta 18 urte bitarteko haur eta nerabeei zuzendutako emozio lantegiak (lantegi bakoitzaren adin zehatzak kontsultatu):
• Nola bideratu nire emozioak.
• Enpatiterapia – besteen lekuan jartzea.
• Lagunek gogaitzen nautenean, planto egiten dut.
• Nik neure burua estimatzen dut, zuk zeure burua estimatzen duzu...
• Erlaxatzen ikasi.
• Emozioen mundua (mindfulness).

Gurasoentzako emozio lantegiak:
• Emozioak familian.
Irakasleei eta haur eta nerabeekin lanean diharduten profesionalei zuzenduriko emozio lantegiak:
• Emozioak lantzen.

Guraso eta seme-alabei zuzenduriko emozio lantegiak:
• Emozioak lantzen.
• Emozioak eta mindfulnessa.
8.  Hiru urte baino gutxiagoko haurra dut, eta nire ardura, esperientzia eta abarrak beste guraso batzuekin konpartitu nahiko nituzke; nola egin dezaket?
Haurtzaro eta Senitarte Zerbitzuak badu heziketarako gune bat, Senidegune programa, non 0-3 urte bitarteko haurren gurasoek (edo laster guraso izango direnek) hainbat gai lantzen baitituzte seme-alabekin batera, jolasen bidez; besteak beste, harremana, komunikazioa eta maitasuna.

Halaber, esperientzia eta ikasketak beste guraso batzuekin konpartitzea ahalbidetzen du gune horrek. Gizarte etxeetako ludoteketan eta Lehen Hezkuntzako hainbat ikastetxetan garatzen da programa, baita hiriko osasun zentro batzuetan ere. Hiru hilabeteko lantegiak dira. Zozketa eta izen-ematea gizarte etxeetan, udalaren web-orrian eta 010 telefono zenbakian egiten dira. 4 eta 5 urteko seme-alabak dituzten gurasoei ere zabaldu zaie programa.

9.  Hiru urtetik beherako semea/alaba dut, eta haren heziketari buruzko zalantzak sortzen zaizkit. Laguntza nahi nuke; nora jo dezaket?
"Jabetu zaitez seme-alabak hezteko duzun gaitasunaz" doako programak tresnak eta jarraibideak eskaintzen dizkie gurasoei haurrak hazi eta hezteko dituzten gaitasunak eta hobetu beharreko alderdiak identifikatzeko. Programa gurasotasun positiboan oinarritzen da, amek zein aitek seme-alaben erabateko ongizatea kontuan har dezaten haiek heztean.

Xehetasun gehiago nahi izanez gero, Haurtzaro eta Senitarte Zerbitzura dei egin dezakezu (945 161379) edo mezu bat idatzi helbide honetara: infanciayfamilia@vitoria-gasteiz.org.
10.  Nire seme/alaba nerabeak iseka eta mehatxu egiten dit eta arazoak ditut egoerari aurre egiteko. Non aurki dezaket laguntza?
"Gurasoen aurkako indarkeria egoeretan garaiz esku hartzeko programak" familiei harremanak hobetzen eta gatazka bideratzen laguntzen die familiei. Horretarako, taldeko saioak egiten dira nerabeekin eta gurasoekin, baita familia bakoitzarekin ere.
12 eta 17 urteko seme-alabak izanik egoera hori pairatzen ari diren familiei zuzendua dago.

Argibide gehiago behar izanez gero, deitu 647304752 zenbakira. Ordutegia: 10:00etatik 13:00etara eta 16:00etatik 19:00etara, astelehenetik ostegunera, eta 10:00etatik 13:00etara, ostiraletan.
Hitzordua eskatu nahi baduzu, dagokizun Oinarrizko Gizarte Zerbitzura deitu edo jo dezakezu, 09:00etatik 14:00etara.

Zein dagokizun ez badakizu, 010 doako telefonoan galde dezakezu, 8:00etatik 20:00etara, edo udalaren web orria (www.vitoria-gasteiz.org) kontsultatu. Egoera larria bada, Gizarte Larrialdietarako Zerbitzura (945 13 44 44) dei egin dezakezu.

Lotutako informazioa

  

Zure iritziak axola digu

Lagun iezaguzu hobetzen. Informazio hau baliagarria gertatu zaizu?            

Nahi baduzu, iruzkinak egin ditzakezu.
Nahitaezkoa da identifikatzea.

Jasotako iruzkinak

  • Si no escolarizas un hijo me lo quitan? y si soy gitano no? La manga de ustedes es estrecha o ancha con según quién?

    PutinReloaded Oso haserre 2018/01/22 15:26:32