Ingurugiro Gaietarako Ikastegia – BIOTraCes europar proiektua
Europar Batasunak finantzatutako BIOTraCes (2022-2026) proiektua biodibertsitatearen oso aliatu indartsua izango da datozen urteetan. Proiektuaren helburua Europa osoan biodibertsitatea bultzatzea da. Ikertzaileek bederatzi azterketa kasu garatuko dituzte Europa osoan, naturarekin, gizartearekin eta tokiko politikarekin lotutako gaiei heltzeko. Emaitzak Aldaketa Eraldatzailearen Teoria batean laburbilduko dira, gizartearen eta naturaren arteko elkarreragina sakon ulertzeko.
Zer da Aldaketa Eraldatzailearen Teoria?
BIOTraC proiektuko ikerketa taldeak aztertuko du nola balio sozialek, hala nola kulturak, erlijioak eta ekonomiak, botere blokeoak eta palanka efektuak sor ditzaketen. Hori izango da Europa osoan biodibertsitatearen galera dramatikoa eragin duten jokabide jarraibideak ulertzeko oinarria.
BIOTraCes Wageningen Environmental Research erakundeak koordinatzen du. Rosalie van Dam doktoreak zuzentzen du taldea. Europako Itun Berdearen eta Nazio Batuen Garapen Iraunkorreko Helburuen ildotik, biodibertsitatea indartzea erabaki du: "BIOTraCesekin ezberdintasuna markatu nahi dugu. Biodibertsitatearen arloko politika publikoak, tokiko estrategiak eta enpresen kezkak integratzaileagoak, eraginkorragoak eta bidezkoagoak izan daitezen lagundu nahi dugu. " Helburu horiek lortzeko, BIOTraCesek Eragileen eta Alderdi Interesdunen kontseilu bat sortuko du, Europako biodibertsitatearen hobekuntzan ahalik eta eragin handiena sortzeko.
Vitoria-Gasteiz proiektuaren parte izango da, azterketa kasu gisa, eta eskola hezkuntzaren lehen etapetan biodibertsitatearekiko harremana hobetzeak gazteen taldeetan jasangarritasun balioetan dituen ondorioetan zentratuko da.
BC3 erakundea izango da Vitoria-Gasteizen egingo den lanaren arduradun nagusia, Gasteizko Udalarekin batera. Udala eskola jolastokien eraldaketa gidatzen ari da, ikuspegi parte-hartzaile berrien bidez, ikasleek lotura zuzenagoa izan dezaten hiri biodibertsitatearekin.
BIOTraCes siglak honako hau esan nahi du: Biodibertsitatea eta Aldaketa Eraldatzailea gizarte pluraletarako eta naturarentzat positiboak diren gizarteetarako. 48 hilabeteko iraupena izango du proiektuak, 2026ko azaroaren 30era arte. Aurrekontu osoa 4.620.652,50 eurokoa da. Europako bederatzi herrialdetako hamaika bazkidek (Stichting Wageningen Research, Goeteborgs Universitet, Centro de Estudos Sociais, Okologiai Kutatokozpont, Basque Centre for Climate Change, Mykolo Romerio Universitetas, Universita Degli Studi Di Catania, Universiteit Twente, Universitatea Babes Bolyai, European Science Communication Institute (ESCI) gGmbH eta Ingurugiro Gaietarako Ikastegia) lankidetza estua izango dute BIOTraCesen arrakasta lortzeko. Bederatzi kasuen azterketak biodibertsitatean eragin bereziki handia duten sektoreetan egingo dira. Elikagaien ekoizpena, nekazaritza, basogintza, uraren eta arrainen kontserbazioa eta urbanizazioa barne hartzen dituen esparru zabala hartzen dute. Ezaugarri bereizgarri bat ere badu BIOTraCesek: baztertutako taldeak eta talde erlijiosoak, generoa eta gazteria izango dira lanaren erdigune.
BIOTraCes sare sozialetan
https://www.linkedin.com/company/biotraces/
https://www.instagram.com/biotraces/
Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.