Lakua-Arriagako autokarabanen aparkaleku berria ireki da, sarbide-kontrolarekin eta zerbitzu berriekin

2024ko irailaren 5ean argitaratua

Doakoa izango da kobratzea ahalbidetuko duen ordenantza fiskal espezifikoa onartu arte.

  • Erabiltzaileek PVerde APPa deskargatu beharko dute
  • Egonaldiaren gehieneko denbora jarraian 72 ordukoa izango da aste berean

Uda honetan gure hirira autokarabanaz etortzen direnek Lakua-Arriagako aparkalekuko instalazio berrituak erabili ahal izango dituzte. Obrak epe barruan amaitu dira, eta erabiltzaileek zerbitzu berriak eta sarbide-kontrola izango dituzte bertan. Hala, alkateorde eta zinegotziak, Beatriz Artolazabalek, azaldu duenez, “espazio hori gaizki erabiltzea saihestu ahal izango da. Txandakatzea bultzatu nahi dugu, eta aparkaleku luze eta iraunkorrekin amaitu. Turismo mota hori gero eta gehiago dago modan, eta pertsona asko etortzen da hiria ezagutzeko asmoz. Aparkaleku berri honek beharrezko zerbitzu guztiak eskaintzen ditu, erakargarriagoa da eta, gainera, garraio publikoaren bidez oso ondo komunikatuta dagoen eremuan dago”.

Sarreran, QR kode bat duen kartel bat jarri da eta bertan bistaratuko dira aparkalekua erabiltzeko arauak. Horietako bat da, hain zuzen ere, aparkalekuan egoteko gehieneko denbora: aste berean 72 ordu jarraian. Horri esker, “aparkalekuak behar bezala txandakatuko direla eta modu ekitatiboan banatuko direla bermatuko dugu”.

Ibilgailuen sarrera eta irteera mugatzeko, sarbide-langak eta matrikulak irakurtzen dituzten kamerak jarri dituzte. Erabiltzaileek PVerde doako aplikazioa deskargatu, Vitoria-Gasteizko eremua bilatu eta egonaldia erreserbatu beharko dute. Iristean, eremua berriro hautatzean, sarrerako hesia ireki egingo da.

Zerbitzu honetarako ordenantza fiskal espezifikorik ez dagoenez, oraingoz doakoa izango da eta ez du inolako kosturik izango erabiltzaileentzat. Irailetik aurrera, ordenantza idatzi eta oposizioarekin negoziatuko da, gero onartzeko. Aldi baterako ordainketa-zerbitzurik ezin denez izan, hornidura elektrikoko dorreak ez dira aktibo egongo.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.