Udaberriko programazioa Oihanederren
Neguko hotzak atzean utzi eta udaberrian sartzearekin bat, Oihanederrek urtaro berrirako prestatu duen kultur egitaraua abian jarri du. Gogotsu heldu dio ekainera bitartean luzatuko den hiruhilabeteko honi, eta horren adierazgarri da antolatutako ekitaldi andana.
20 jarduera inguru osatzen dute beren eskaintza, ia kasu guztietan nabarmendu daitekeen ezaugarri komun batekin: elkarlana. Oihanederrek 6 urte daramatza apiril, maiatz eta ekaineko hilabeteetan Gasteizko hainbat eragilerekin jaialdi ezberdinetan kolaboratzen, elkarlanean aritzen. Oihanederreko jardunaren eta helburuen oinarrietako bat izaki, urte hauetan guztietan horretan saiatu dira: Poetak Maiatzean, Zurrunbilo, IkerGazte, JalgiVoz eta Laburbira dira oihanedertarren etxean lekua izango dutenak oraingoan; eta horretaz gain, beste hilabete batzuen jarraipena izango dutenak: Begi-Belarri, Hitz Adina Mintzo, Eragiteko Janzten, Ahoskera Laborategia eta Batera deialdiko aurkezpen publikoak.
Jaialdiak, jardunaldiak, aurkezpenak, zinema zikloak, topaketak, mahainguruak, ikastaroak… eta guztiak kulturgintzako eta euskalgintzako beste eragile batzuekin elkarlanean antolatuak: GEU elkartea, Baratza, Parasite kolektiboa, Topagunea, UEU, Hunkitu arte elkartea, IKA, AEK, Gauekoak, ALEA, JALGI!VOZ festival… Dozena bat elkarte, talde, kolektibo, erakunde... eta hauetan guztietan norbanako euskaltzale eta kulturzale ugari temati; kultura segurua dela erakutsi nahi duten eragileak, euskal kultura balore segurua dela ozen aldarrikatu nahi duten eragile tematiak.
Beti bezala, Oihanederren webgunea izango da informazio iturri zehatza: eguneratuta egongo da, behin betiko informazioa emango du, eta pandemia egoerak sortzen dituen azken orduko egokitzapenak bertan eguneratuko dira. Bestalde, pandemia honek eragindako neurriak betetzen jarraitzea beharrezkoa da (higienea, segurtasun distantziak, edukieraren kontrola...). Segurtasun baldintzak bermatzeko neurriak guztion ardura eta erantzukizun bihurtu dira.
Aldez aurretik izen-ematea
Udaberriko programazioko jarduerak doakoak diren arren (ikastaro eta jardunaldiak izan ezik), gonbidapena aurrez eskuratu beharko da ohiko moduak erabilita (oihaneder@oihaneder.eus helbidera idatzita, telefonoz eskatuta (945 161830) edota Bibe plataformaren bidez). Ikastaro eta jardunaldietan izena eman behar da.
Zure iritziak axola digu
Nahi baduzu, iruzkinak egin ditzakezu.
Nahitaezkoa da identifikatzea.