Gizarte-etxeen eta kirol instalazioen sareari buruzko informazioa

Haren egitekoa da herritarrei elkartzeko, informatzeko, prestatzeko, orientatzeko eta aisialdirako leku irekiak ahalbidetzea, aisialdiko ohitura osasungarriak sortzen eta bizi-kalitatea hobetzen laguntzeko.

Zeregin hori betetzeko, zerbitzu, programa eta jarduerak diziplina anitzetan eskaintzen dira. Elkarte, talde edo erabiltzaileei zuzenduta daude.

Lau dira gizarte etxeen helburuak:

1. Udalaren gizarte politikan diharduten sailek informazio, prestakuntza, kultur, gizarte, kirol eta aisialdi arloetan garatzen dituzte zerbitzuak, programak eta jarduerak antolakuntza unitate bakarrean integratzea, horiek sustatu eta herritarren behar zein eskaerei egokitzearren.
2. Udal zerbitzuak auzoetara hedatzea, herritarrek gertuago izan ditzaten; hartara komunitatearen beharrak, asmoak eta aukerak hobeto ezagutzea eta gehiago kontuan hartzea lortuko da, eta horiei azkarrago erantzun ahalko zaie.
3. Zerbitzu, programa eta jardueren kalitatea ezin hobea izan dadin lortzea, herritarren asmoekin bat etor daitezen; erabiltzaileen gogobetetasuna bilatuko da, dauden baliabide guztiak arrazionalizatuz eta koordinatuz.
4. Elkarteek, banakoek eta gizataldeek parte hartzeko prozesuak sustatzea, haien eskaerak eta ekimenak ezagutu eta bideratzeko, banakoek eta taldeek hiriko gizarte, kultura eta kirol prozesuen barruan egon daitezen.

• Hiriko gizarte etxeen proiektua 1979-1983 legegintzaldian eratzen hasi zen.
• 1983-1987 udal agintaldian gauzatu zen.
• Lehen gizarte etxea 1985ean zabaldu zen, Sansomendi auzoan, eta ondoren Abetxuko Landatxo eta Ariznabarrakoak etorri ziren. Ekipamendu soziokulturalak ziren, fisikoki kirol instalazioetatik bereizita.
• 1989an Iparralde gizarte etxea inauguratu zen; han kirol eremua eraikin berean integratuta zegoen, eta geroztik zentro integratuaren eredu horri jarraitu zaio. Horren ostean Europa, Judimendi, Lakua, Hegoalde eta Aldabe gizarte etxeak eraiki ziren.
• 2006an Europa gizarte etxea itxi egin zen, bere instalazioak biltzar jauregiri emanez. Gizarte etxe honen ordez Pilarreko gizarte etxeak eta San Andres kiroldegiak ireki zituzten ateak.
• 2010ean Ibaiondoko gizarte etxea ireki zen.
• 2015ean, Salburuko gizarte-etxea.
• Eta 2017an, Zabalganekoa zabaltzearekin batera, sarea osatu da 14 gizarte-etxerekin eta horietako 8 integratuak dira.
• Horiei hirian banatuta dauden kirol instalazio ugariak gehitu behar zaizkie.