Almendrako ibilbidea - Turismoa Vitoria-Gasteizen

Erdi Aroko Almendrak hiriko historian zehar ibilaldiak egiteko aukera eskaintzen du, eta bidez batez, eraikin zibilak, jauregiak, dorretxeak eta tenplu ederrak, arte gotiko, errenazentista, barroko edo neoklasikoaren lekuko interesgarriak, ezbairik gabe, ikustekoa.

Ibilbidea

Turismoa - Ibilbideak - Erdi aroko almendra

Google Maps-en ikusi(Beste leiho batean irekiko da) | bozgailua Alde Zaharraren zehar ibilbidea

Abiapuntua: Andre Maria Zuriaren plaza.

  1. Aihotz plaza
    Hiriko antzinako ordezkariek aihotz baten gainean egiten zuten beren karguen zina, eta, hain zuzen ere, aihotz horri zor dio plazak izena. Bada, San Migel elizaren kanpoaldeko absidean ikus daiteke armaren erreplika (plaza ixten duen absidean). Begiratu iezaiozu gaur biltzarretarako egoitza den Goiuri jauregi ederrari (1542). Bertako balkoi-galeria eta iparraldeko fatxadan dagoen Salinatarren heraldika nabarmentzen dira.
  2. Arkupeak
    Sinbolo neoklasiko hau Justo Antonio Olagibelen lana izan zen, eta Erdi Aroko hiriaren eta zabalgune garaikidearen arteko malda saihesteko eraiki zen. Bi tarte dauzkate: Hegaleko arkupeak eta Judizioko arkupeak.
  3. Kordoi etxea
    Sarrerako arkuan azaltzen den frantziskotarren kordoiagatik hartu zuen izen hori. XV. mende amaierako jauregi honek XIII. mendeko Erdi Aroko dorrea gordetzen du, izar-itzurako ganga ikusgarriarekin.
  4. Arrieta-Maeztutarren jauregia
    Bendaña jauregia ere esaten zaio, eta XVI. mendearen hasieran eraiki zuten, Erdi Aroko dorre baten inguruan. Begiratu dorre zilindrikoari eta arku hirukoitzak dauzkan barrualdeko patioari. Karten Fournier Museoa dago bertan, Bibat museoaren barruan.
  5. Santa Ana kantoia
    «Zeru eta izarrez estalita» izeneko horma-irudia ikusi ahalko duzu hemen, hots, Santa Anak San Joakini eman zion musuaren interpretazio modernoa. "Hiri margotua" muralen ibilbidearen adibide bat da hori.
  6. Gurutze Santuaren komentua
    Sortu zenetik (1547) bizi dira bertan klausurako moja dominikanoak, eta Pasioaren monumentueszena aurki daiteke atarian.
  7. Gobeo-Caicedo etxea
    Herreraren Barrokoaren adibiderik argienetakoa da, eta, bertako fatxadan, bolekin apaindutako balkoiak, hegal-erlaitza eta Hurtado Mendozatarren armarri handia gailentzen dira.
  8. Kristo Santuaren kapera
    XIV. mendeko tailu gotiko zoragarria gordetzen du barruan, San Ildefontsoren Kristoa, zeinak debozio handia piztu baitzuen Santiago bidea egiten zutenen artean.
  9. Santa Maria Katredala
    Hiriko tenplu enblematiko hau XIII. mendekoa da, eta muinoaren tokirik garaienean dago; bada, hiriaren historia gordetzen du bere harrietan. Tenpluaren zaharberritze-prozesua jendeari irekita egon da, besteak beste Ken Follet edo Pablo Coelho idazleen inspirazioa izan den eraikinaren sekretuak ezagutzeko aukera emateko. Bisita gidatua guztiz irisgarria eta oso gomendagarria da.
  10. Eskoriatza-Eskibel jauregia
    1530aren eta 1541aren artean eraiki zuten, eta Gasteizko Errenazimenduko pieza giltzarria da.
  11. Montehermoso jauregia
    1520an eraiki zuten jauregi errenazentista hau, eta monarkiari ostatu emateko erabili zen, hiria bisitatzera etortzen zenean. Halaber, apezpiku-egoitza izan zen, eta, gaur egun, abangoardiei zuzenduriko kultura-zentroa da.
  12. Harresiak.
    XI. mendean eraiki zuen Nafarroako Antso IV.a erregeak, eta Gasteizko herrixka gotortu zuen. Antzinako harresiaren zati batean ibil zaitezke, eta horma-atalaren tarte bat nahiz dorreetako bat behatu.
  13. San Pedro eliza
    XIV. mendean hasi ziren eraikitzen, XIII. mendeko parrokia baten gainean, harresiari atxikita. Euskadiko eskultura-multzoen artean, nabarmenenetako bat da eliza honen antzinako aurrealdea (Errementari kalea).
  14. Iruñatarren dorretxea
    Otxanda Andrearen dorre gisa da ezagunagoa, eta XV. mendearen hasierako etxe gotorra zen. XVI. mendean berreraiki zuten, eta dorrea 1970ean gaineratu zioten. Gaur egun, Natura Zientzien Museoaren egoitza da.
  15. Alameda markesaren etxea
    1731ren eta 1735aren artean eraiki zuten, eta estilo barrokoko jauretxea da. Begiratu iezaiezu arkitektura-motiboak imitatzen dituen dekorazio piktoriko bitxiari eta eraikinaren izkinako armarri handiari.
  16. Alava-Eskibel jauregia
    XVI. mendekoa da, eta askotan birgaitu dute; hala ere, Alabatarren, Mendozatarren, Miñanotarren eta Eskibeldarren lau armarriak kontserbatzen ditu oraindik.
  17. Farolen museoa
    Museo berezi honetan gordetzen dira Andre Maria Zuriaren jaien harira duela 100 urtetik baino lehenagotik abuztuaren 4ko prozesioan eramaten diren beira polikromatuzko 271 pieza ederrak.
  18. Buruileria plaza
    Erdi Aroko nekropoli zaharra da, eta izen hori eman zioten, antzina oihalak eta zapiak saltzen baitzituzten bertan; izan ere, garai hartan, "buruileria" esaten zieten toki horiei.
  19. Portaloia
    XV. mendearen amaierako eraikin hau merkatarien ostatua izan zen, eta sekulako atea zeukan sarreran, gurdiak sartzeko. 1957an zaharberritu zuten, eta, gaur egun, jatetxea da.
  20. Andatarren dorrea
    XV. mendean altxatu zuten, eta Gasteizko eraikuntza zaharrenetako bat da. Hiriko babes-sistemaren zati izandako eraikin gotikoa da.

https://www.flickr.com/photos/vgturismo/sets/72157664486813118(Beste leiho batean irekiko da)

Lotutako informazioa

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren postontziaren bidez.