AMVISA - Futura Plana - Futura Planean garatutako jarduerak

AMVISAko Ustiapen eta Banaketa Arloak koordinatzen ditu Futura Planeko jarduerak, eta banaketa-sarearen kudeaketarekin lotutako helburuak lortzen ahalegintzen da; arlo horri berez dagozkion zereginez gain, honako jarduera hauek landu dira planean zehar:

Planaren berri emateko

• 7.500 liburuxka eta herritarrak sentiberatzeko 10.000 posta-txartel banatu dira.
• Udalaren esparruetan. 25 informaziogune ezarri dira (gizarte-etxeetan eta kirolguneetan); eta zentro bakoitzean erregistratutako kontsumoei buruzko informazioa eguneratu da aldian-aldian.
• Udalaren esparruetan eta hiriko ikastetxe guztietan herritarrak sentiberatzeko 2.500 kartel banatu dira.
• 64 diagnostiko berri egin dira, eta 38 jarduera egoki identifikatu dira. Udalaren instalazioetan, merkataritzaguneetan, industrialdeetan nahiz zerbitzuen sektorean uraren erabilerari eta kudeaketari buruz garatutako aholkularitza- eta diagnostiko-programak asmo argia du: sektore bakoitzeko kontsumoaren ezaugarriak zehaztea eta kontsumo hori murriztea, instalazioetan sor daitezkeen arazoak hautematea eta hiriko jarduera egokiak identifikatzea. Diagnostikoa egiteko bisiten ostean, hobetzeko zenbait proposamen biltzen dituen txosten bat ematen da. Parte-hartzaileak eta jarduera egokiak atalak horien zerrenda eta bakoitzaren deskribapena biltzen ditu.
• Ostalaritzako 680 establezimenduri aholkularitza eman zaie, 2010eko urritik 2011ko martxora bitartean sektoreari zuzendutako aholkularitza- eta informazio-kanpaina baten barnean. Aholkularitza hori erreferentziazko kontsumoei buruzko zuzeneko informazioa ematean eta uraren kudeaketa hobetzeko aukera emango duten gomendioetan oinarritu da, eta bezeroek kontsumo-elementuen erabilera hobea egin dezaten lagungarri diren materialak banatu dira, eta bainugelak ikuskatu dira; horren ondoren, erabiltzaileari bere egoeraren berri ematen dion txosten pertsonalizatua igorri zaio, eta hobetzeko har ditzaketen neurriak jakinarazi zaizkio.
• Hiriko hiruhilekoko eta urteko kontsumoen ezaugarriak biltzeko txosten teknikoak landu dira, eta, fakturazioan oinarrituta, etxeko kontsumoen jokabidea eta berdeguneen ureztaketa aztertu dira batez ere. Horrez gain, Futura Planak Ura Berrerabiltzeko Planeko eskarien ezaugarriak aztertzen lagundu du, udalerriko kontsumoei buruzko datuen eta informazioaren kudeaketaren esparruan.
• 115.000 informazio-orri banatu zaizkie abonatu guztiei, hiruhilekoko fakturarekin batera; AMVISAren eta Futura Planaren barneko jarduerei buruzko edukiak biltzen dituzte orri horiek.
• Futura Planak proposatutakoaren ildotik, 110. helburuaren berri emateko eta horretaz sentiberatzeko lanak egin dira; etxeko kontsumoa eguneko eta pertsonako 110etik behera murriztea du xede helburu horrek, hain zuen.

• Martxoaren 22a Uraren Mundu Eguna da, eta egun horretako ospakizunen ildotik, hainbat sentiberatze-kanpaina egin dira: komunikazio-kanpainak irratian eta markesinetan, kaleko jarduerak eta saio bereziak.
• Tanta Jokoa haurrentzako jolasa landu da, ezaguna den antzara jokoan oinarrituta. Uraren erabilerari buruzko irudiekin eta mezuekin moldatu da jokoa. Vitoria-Gasteizko Nazioarteko Jolas Jaialdiaren barnean AMVISAri gordetako esparruan erabili da.

• 2011. urtean Vitoria-Gasteizko uren kudeaketaz herritarrek duten ikuspegiari buruzko azterketaren koordinazioa, eta emaitzen analisia.

• Ingurumen gaiez kontzientzia hartzeko, ikasleei zuzendutako "Vitoria-Gasteizen, urak axola digu" programa garatu da, Vitoria-Gasteizko Udalaren eta MAPFRE Fundazioaren artean sinatutako hitzarmenari esker. Hiriko ikastetxeetako Lehen Hezkuntzako Hirugarren Zikloko ikasleei (5. eta 6. mailak) eta Bigarren Hezkuntzako Lehen Ziklokoei (1. eta 2. mailak) zuzentzen zaie. AMVISAk Ingurumen Hezkuntzaren esparruan landutako programa osatu egin da horrela. Honako jarduera hauek prestatu dira:
  • Uraren erabileraz sentiberatzeko xedea duen komiki batzuk banatu dira, MAPFRE Fundazioak sortutako Ekopatruilako pertsonaiekin.
  • Komikia (formatu digitalean) abiaburutzat hartuta, ingurumenaren esparruko hezitzaileen eskutik ikasgeletan lantegiak edo saioak egin dira.
  • Uraren erabilera eraginkorra bultzatzeko, eskolen artean kartel lehiaketa bat egin da.

Programan parte-hartzeari buruz datuak:

- 2010-2011 ikasturtean: 13 ikastetxe, 69 kontzientziazio saio ikasgelan, 1.700 ikaslek hartu zuten parte saioetan, eta 426 lan jaso ziren lehiaketan.

- 2011-2012 ikasturtean: 12 ikastetxe, 49 kontzientziazio saio ikasgelan, 1.200 ikaslek hartu zuten parte saioetan, eta 480 lan jaso ziren lehiaketan.

• AMVISAren diagnostikoen programarako edo webgunerako informazio eta sentiberatze material berriak lantzea.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.