2025eko udako kanpaina Mendizorrotzan eta Gamarran

Udako kanpaina: maiatzaren 23tik irailaren 14ra, astelehenetik igandera, 08:00etatik 22:00etara.

Kanpoko igerileku olinpikoa eta haurrentzako igerilekua

• Maiatzaren 23tik uztailaren 27ra: astelehenetik igandera, 10:00etatik 21:30era.
• Uztailaren 28tik abuztuaren 31ra: astelehenetik igandera, 8:00etatik 21:30etara.
• Irailaren 1etik 14ra: astelehenetik igandera, 10:00etatik 21:30era.

Aquamendi igerilekua

• Maiatzaren 23tik ekainaren 12ra: astelehenetik ostiralera, 15:00etatik 20:30era; txirristak 20:00etan itxiko dira. Larunbat eta igandeetan, 10:00etatik 21:00etara; txirristak 20:30ean itxiko dira.
• Ekainaren 13tik uztailaren 27ra: astelehenetik igandera 10:00etatik 21:00etara; txirristak 20:30 itxiko dira.
• Uztailaren 28tik abuztuaren 31ra: astelehenetik igandera, 10:00etatik 20:30era; txirristak 20:00etan itxiko dira.
• Irailaren 1etik 14ra: astelehenetik ostiralera 15:00etatik 20:30era. Larunbat eta igandeetan, 10:00etatik 20:30era; txirristak 20:00etan itxiko dira.

Udako kanpaina: maiatzaren 23tik irailaren 7ra, astelehenetik igandera, 08:00etatik 22:00etara.

Familia-igerilekua eta haurrentzako igerilekua

• Maiatzaren 23tik uztailaren 27ra: 10:00etatik 21:00etara. Txirristak 20:30ean ixtea.
• Uztailaren 28tik irailaren 7ra: 10:00etatik 20:30era. Txirristak 20:00etan ixtea.

Igerileku olinpikoa

• Maiatzaren 23tik uztailaren 27ra: 10:00etatik 21:00etara.
• Uztailaren 28tik irailaren 7ra: 10:00etatik 20:30era.

• Bainu-txanoa: nahitaezkoa da igerilekuak erabiltzeko.
• Kirol-pisten erabilera: futbito, saskibaloi, hondartzako boley eta mahai-teniseko pistak erabil daitezke. Gamarraren kasuan, mini-golf espazioa ere erabil daiteke.
• Tenis eta padel pistak: aldez aurretik erreserbatuta.
• Norberaren aulkiak edo hamakak: Gamarrara aulkiak eta hamakak eraman daitezke; Mendizorrotzera, aulkiak (ez hamakak). Batzuk zein besteak eremu berdeetan eta solariumean baino ezin dira jarri. Gogorarazten da erabilera publikoko hamakak eta aulkiak ere erabili daitezkeela.
• Kaiola-armairuak: kaiola zerbitzua dago Gamarrako parkean aulkiak, eguzkitakoak edo mahaiak gordetzeko. Zerbitzu honi buruz gehiago.
• Barbakoak: baimenduta dago barbakoak Gamarrako parkean prestatutako eremuetan erabiltzea.
• Irisgarritasun neurri berriak: Eraikin Sozialean hainbat lan egin dira, hala nola igogailu berria jarri, kanpoko sarbideko arrapala handitu eta ebakuazio eskailera berria eraiki, komunak eta fatxada begetala berritzeaz gain.
• Kerik gabe, hobeto: Mendizorrotza eta Gamarrako kirolguneetan ez erretzea gomendatzen da.
• Adingabeak: zure seme-alabak zure erantzukizuna dira: ez begirik kendu. Jarraibideak eta gomendioak

1.Itotzeak eta lesioak

Iritsi da uda, eta udal-instalazioak prest daude milaka erabiltzaile hartzeko. Urtero, sorosleek hainbat gorabeherari erantzuten diete, igerilekuez gozatzean egiten diren arduragabekerien ondorioz. Maiz, igerilekuetara jauzi desegoki eta arriskutsuak egiteagatik, jokabide arriskutsuak izateagatik edo adingabeak zaintzen dituzten helduek une batez deskuidu bat izateagatik gertatzen dira horrelakoak.

2. Fotobabesa

Eguzkitan zaudenean, neurriak hartu behar dira eguzki-erradiazioaren aurrean. Eguzkiaren eraginpean egoteak gure osasunean izan ditzakeen kalteen artean daude eguzki-erredurak, orbanak, larruazala lehenago zahartzea edo larruazaleko minbiziaren intzidentzia areagotzea; horregatik, beharrezkoa da beti eguzki-babes eraginkorra eta egokia erabiltzea.

Zure osasuna zaintzeko, hona hemen jarraitu beharreko gomendioetako batzuk: zure azal-motarentzako fotobabes egokia duen eguzkitako krema sarritan ematea, eguerdiko orduetan (12:00-17:00) eguzkia saihestea eta itzaletan jartzea, eta mahuka luzeko arropa lasaia eta kolore argikoa erabiltzea, baita osagarriak ere, hala nola eguzkitako betaurrekoak eta txanoa.

3. Tenperaturak igotzea

Tenperaturak igotzeak kalte egiten dio biztanleriaren osasunari (batez ere haurtxoei, adinekoei, gaixotasun kronikoak dituzten pertsonei...), eta ondorio desatseginak ditu: deshidratazioa, karranpak, akidura eta bero-kolpeak, heriotza ere eragin dezaketenak.

Hala ere, prebenitu egin daitezke, Gasteizko Bero Planaren gomendioei jarraituta: ura maiz edatea, egarri ez izan arren; fruta eta barazki gehiago jatea; eguerdian (12:00-17:00) eguzkitan ez egotea eta itzaletan dauden eremuak bilatzea; dutxan freskatzea edo, besterik gabe, bustitzea; eta jarduera fisiko neketsuak murriztea.

Informazio gehiago: www.vitoria-gasteiz.org/kontuzberoa

4. Mendizorrotza eta Gamarra, kerik gabeko guneak

Hemen ere, hobe tabakorik gabe. Izan gaitezen eredugarri.

5. Gogoan izan

Udal igerilekuetara joaten zarenean:

• indarrean dagoen erabilera-araudia eta sorosleen jarraibideak betetzea.
• osasun-agintariek adierazitako neurriak hartzea.
• Gasteizko Bero Planeko gomendioak jarraitzea.