Zure iritziak axola digu
Nahi baduzu, iruzkinak egin ditzakezu. Nahitaezkoa da identifikatzea.
Izaskun Arrue Kulturgunea – Gasteiz Antzokia
Izaskun Arrue – Gasteiz Antzokia, Alde Zaharreko Ruiz de Bergara Jauregian kokatua (Errementari kalean) euskarazko aisialdirako, kulturarako eta sorkuntzarako topagunea da.2024ko uztailean ireki zituen ateak.
Erreferentziazko gune euskalduna
Antzokiak hizkuntzaren erabilera normalizatzen lagunduko du Gasteizen, kulturaren bidez. Horretarako, hainbat formatutan antolatuko ditu jarduerak:
- Kultur jarduerak: kontzertuak, antzerkia, bertsoak, dantza…
- Prestakuntza-jarduerak: ikastaroak, tailerrak, jardunaldiak…
- Ezagutza sustatzeko beste proposamen batzuk: hitzaldiak, erakusketak.
Herri-ekimena
Gasteiz Antzokia sortzeko lehenengo haziak 90eko hamarkadan jartzen hasi ziren euskal kulturaren inguruan lan egiten zuen hainbat herritarrek, euskal kultura-azpiegitura gabeziari aurre egiteko. Harrezkero, elkarte euskaltzaleek bultzatutako ekimena izan da, bereziki Lazarraga Kultur Elkarteak sustatuta, Gasteizko Udalaren eskutik.
Lan honen lehen fruitua, eta Gasteiz Antzokia proiektuaren oinarrietako bat, Oihaneder Euskararen Etxea izan zen. Montehermoso Jauregian kokatua, 2014tik 2022ra 50.000 pertsona baino gehiagok parte hartu zuten jardueretan, eta euskaldunen erreferentziazko topaleku izan zen.
Gasteiz Antzokia irabazi-asmorik gabeko Lazarraga elkarteak kudeatzen du , Udalarekin sinatutako hitzarmen baten bidez.
Eraikina: XVI. Mendeko jauregia, zaharberritua
Beheko solairua: erakusketak eta hitzaldiak
Beheko solairuan funtzio anitzeko gela bat dago, eta bertan erakusketak, hitzaldiak edo proiekzioak antolatu ahal dira. Halaber, kabina teknikoak, proiekziokoak eta itzulpenekoak daude bertan; biltegiak, komunak eta kamerinoak.
Azalera: 213 m².
Lehenengo solairua: agertokia eta taberna
Lehenengo solairuan espazio eszeniko nagusia dago: 130 metro karratu altuera bikoitzean, kontzertuak, antzerki-emanaldiak eta bestelako ikuskizunak egiteko, bai zutik, bai eserlekuetan.
Ostalaritza-gunea ere bertan dago, sukaldearekin.
Azalera: 349 m².
Bigarren solairuan: lantegiak eta bulegoak
Bigarren solairuan tailerrak, lanerako guneak eta komunak daude. Horrez gain, erabilera anitzeko espazio bat ere badu, balkoi gisa balio duena, eta bertatik lehen solairuko agertokian egiten diren ikuskizunak ikusi ahal dira.
Azalera: 243 m²
Hirugarren solairua: bilera-gelak
Hirugarren solairua jauregiko gunerik argitsuena da eta lanerako erabiliko da. Kristalezko bilera-gelak, lantegi-gune bat eta instalazioetarako gela daude bertan (klimatizazioa, exutorioak).
Azalera: 292 m²
Izaskun Arrueri buruz (1927-2016)
