Informazio publikoa eskuratzeko eskubidea

Legezko betebeharrak betetze aldera, Gasteizko Udalak administrazio-prozedura bat sortu du eskubide horretaz baliatu ahal izateko, aurrez aurrekoa (herritarrei laguntzeko bulegoetan) eta elektronikoa (erregistro elektronikoaren bidez).

Eskubidearen tramitazio elektronikoan, gaur egun sinadura digitalerako baliatu daitezkeen bitartekoak erabiliz sinatu beharra dago. Edozein zalantza argitzeko, helbide elektroniko hau dago eskuragarri: transparencia@vitoria-gasteiz.org.

Izapide hau ezin da udalaren Herritarren Postontzia edo sare sozialak baliatuz egin, beraz, bide horietatik aurkezten diren eskabideak ez dira inolako administrazio-prozeduraren barruan sartuko.

Herritarrentzako Arretaren eta Gardentasunaren Zerbitzua arduratzen da Udalak duen informazio publikoa eskuratzeko eskabideak kudeatzeaz, Gardentasunari, informazio publikoa eskuratzeko bideari eta gobernu onari buruzko abenduaren 9ko 19/2013 Legeak,Euskadiko Toki Erakundeei buruzko apirilaren 7ko 2/2016 Legeak eta Administrazio Prozeduraren urriaren 1eko 39/2015 Legeak agindutakoa betez xedatutako prozedurari jarraituz. Oro har, eskabideak hilabeteko epean tramitatuko dira; isiltasunak eskabidea ezetsi egin dela esan nahiko du.

Informazio publikoa eskuratzeko eskubide horretatik kanpo geratuko dira lantzen ari diren edukiak edo dokumentuak, bai eta osorik edo partzialki sarbidea mugatua duten dokumentuak ere, dela interes publikoa babestu behar delako edo beste pertsona batzuen eskubidea bermatu behar delako. Sarbiderako eskubidea mugatu egin liteke eskuratu nahi denak datu pertsonalen babesarekin, jabetza intelektual edo industrialarekin, segurtasun publikoarekin, edo arauetan jasotako beste muga batzuekin zerikusirik badu. Hala ere, babestu nahi den interesa neurtu ondoren, litekeena da informazioaren zati bat eskuratzeko aukera ematea, baldin eta horrek ez badu emandako informazioa desitxuratzen edo zentzugabetzen.

Informazioa eskuratzeko eskabidea egin duen pertsona batek hura zertan den jakin nahi badu, Herritarrentzako Arretaren eta Gardentasunaren Zerbitzu hartara jo dezake, eskabidearen erregistro zenbakia zehaztuz, bide hauetakoren batetik:

• Posta elektronikoa: transparencia@vitoria-gasteiz.org
• Telefonoa: 010 (945 16 11 00)
• Herritarrei laguntzeko bulegoak

Kexak, iradokizunak eta erreklamazioak

Izaera publikoa duen informazioren bat udalaren web-orrian argitaratu dadin nahi izanez gero, kexa edo iradokizunik egin edo informazioa eskuratzeko eskabidearekin lotutako alderdiren bat argitu, bide hauek erabil daitezke:

• Herritarren Postontzia,
• 010 telefonoa (945 16 11 00) edo
• herritarrei laguntzeko bulegoak.

Hilabete baten buruan eskatzaileak Udalaren erantzunik jasotzen ez badu (epea luzatzeko arrazoi justifikatutarik gabe), edo eskatutakoarekin bat ez datorrela iritzita jasotako erantzunarekin ados ez badago, erreklamazioa aurkeztu ahalko du Informazio Publikoaren Sarbiderako Euskal Batzordean. Erreklamazio horren helburua da Udalaren administrazio-egintza berrikusi eta zuzentzea; administrazio-errekurtsoaren ordezkoa da, eta administrazioarekiko auzi-bidean egin daitekeen aurkaratzearen aurretikoa.

Erreklamazioa hilabeteko epean egin ahalko da, aurkaratutako egintzaren jakinarazpena egiten den egunetik edo administrazioaren isiltasunaren ondorioak sortzen diren egunaren biharamunetik kontatzen hasita. Informazioa eskuratzeko eskabidea isiltasunaren bidez ezesten bada, ez dago eperik erreklamazioa aurkezteko.