Vitoria-Gasteizko Udalaren web-orria - Bisitan etortzeko 7 arrazoi

Ezagut ezazu zortzi mende baino gehiagoko historia, biztanleko 42 metro koadro berdegune eta tradizio enogastronomiko aparta dituen hiri hau. Hona hemen Gasteizez gozatzeko zazpi txoko eta proposamen.

1. Andre Maria Zuriaren plaza

Lehen aldiz bazatoz edo hiria berriro ikusi nahi baduzu, ezin dezakezu erdialdeko plaza hau galdu, ezta plazak biltzen dituenak ere: Gasteizko Guduari egindako monumentua (gure historiako gertakari nazioartekoena), San Migel eliza, merkataritza- eta ostalaritza-lokalak... Eta selfie bat egiteko landare-eskultura!

2. Santa Maria Katedralerako bisita gidatuak

Bertako zaharberritze-lanak bisitatzen badituzu, tenpluaren txoko guzti-guztietatik ibili ahalko zara, zimenduetatik hasi eta dorreraino. Gainera, hiri osoaren panoramikarik onena eskaintzen du dorreak. Iparraldeko Donejakue Bidearen barrualdeko ibilbidearen testuinguruan, gizadiaren ondare izendatu zuten.

3. Erdi Aroko hirigunea

Hiriak Erdi Aroko hirigunea dauka, eta Espainian hoberen kontserbatutakoen artean dago. Kaleen antolaketak almendra-itxura gordetzen du oraindik ere, eta, bertatik ibiliz gero, harresia eta tenplu gotiko nagusiak behatu, Bibat arkeologia- eta karta-museo bitxia bisitatu, edo horma-irudien ibilbidea egin ahalko dituzu.

4. Hiri jasangarria

Parke handi batzuek eratzen duten Eraztun Berdeak inguratzen du hiria, eta, parkeen artean, Salburuako hezegunea eta bertako interpretazio-zentroa (Ataria) nabarmentzen dira. Gasteiz etorbidearen barrualdeko Eraztun Berdean, berriz, Europa Biltzar Jauregia dago, lorategi bertikala eta guzti. Eta aipamen berezia egin behar zaio Florida parkeari, 1820an sortu baitzen eta Europako Hiriburu Berdea nahiz mundu-mailako Hiri Berdea izendatutako hiri honen ikonoa izaten jarraitzen baitu.

5. Berezko zaporedun enogastronomia

Pintxoei, plater tradizionalei eta proposamen sofistikatuei esker, hiria bisitatzeko funtsezko arrazoietako bat da tokiko gastronomia. Halaber, ezin ditzakegu albo batera utzi Arabako Errioxako ardoak eta Arabako txakolina, gozogintzan dugun tradizioa eta Azoka plaza, hiriaren bihotzean tokiko produktuak, tailerrak eta gastrotabernak biltzen dituen erreferentea.

6. Artium Arte Garaikidearen Euskal Zentro-Museoa

Artista ugariren 3.000 artelanek eratzen dute Artiumen bilduma, eta Salvador Dali, Pablo Picasso, Joan Miro eta Eduardo Txillida bezalako izenak topa ditzakegu bertan. Hala ere, gaurko artisten lanak ere aurkituko ditugu; hala nola, Cristina Iglesiasenak, Elena del Riverorenak eta Miquel Barcelorenak. Zentro-museoak aldi baterako erakusketak ikusteko bisita gidatuak eta "nahierako" bestelako aukerak eskaintzen ditu.

7. Kirola green hiriburuan

Hiria kirolerako egina dago, berdegune ugari eta instalazio-sare osoa dauzka-eta: padel-pistak, tenis-pistak, golf-zelaiak, izotz-pista... Bestalde, merezi du tokiko saskibaloi- edo futbol-taldeen partidak ikustera joatea, eta sekulako ideia da hiriko jaietan gure kulturako benetakoena bizitzea: zoaz herri kirolen erakustaldietara.