Maskotak adoptatzeko aholkuak

"Erosi beharrean, adopta ezazu! Animaliak arduraz zaindu" kanpainako bideoa.

Txakur helduak adoptatzea

Txakur adoptatu berria ondo egokitu dadin aholku hauei jarraitzea komeni da:

Etxera iristea

  • Giro berria aurkeztu (etxea, familia, beste animalia batzuk eta abar).
  • Ingurua lasaia izan dadin saiatu. Ez da komeni gehiegizko poza adieraztea edo espantuka hastea, estresa sor baitiezaioke.
  • Txakurrari bere ingurua erakutsi (manta, atseden hartzeko txokoa, jolas txokoa, jateko txokoa eta abar), ahalik eta era atseginean.

Albaitariarengana joatea

Albaitariak ezarriko ditu txertatzeko jarraibideak, bai eta bisita egutegia ere.

Elikadura

  • Lehenengo bi egunetan proteina gutxiko eta karbono hidrato ugariko dieta gomendatzen da, estresa kontrolatzearren.
  • Janaren ontziarekiko ariketak. (Janari gehiago botatzean datza, gu haren janlekuaren ondoan egotera ohitu dadin).
  • Hirugarren egunetik aurrera, mantentze pentsua emango zaio.

Ibilaldiak

  • Uhala era atseginean aurkeztuko zaio.
  • Egunean gutxienez 3 aldiz ateratzea aholkatzen da, ahal dela ordu beretan, eta uhalari zakar tira egin gabe.
  • Beste txakurrekin jarduten utzi.
  • Txakurrarentzat paseoa atsegina izan dadin saiatu, haren unea baita.

Atsedenaldia

Garrantzitsuena haren atsedena errespetatzea da, beraz, horretarako leku egokia jarriko zaio.

Banatzeak sortzen duen ezinegona kontrolatzea

Bakarrik egoten irakatsi, jostailu interaktiboekin entretenituta. Komeni da ikas prozesu hori asteburuan edo opor garaian hastea.

Zigorra

Ez da komeni zigorra heziketaren zati izatea. Horretarako, "ez zigortu, irakatsi baizik" lemari jarraitzea gomendatzen da.

Azkenik, une oro txakur batekin ari garela gogoratzea komeni da. Jatea, lo egitea, paseatzea eta maitasuna nahikoa ditu ZORIONTSU izateko.

Txakurkumeak adoptatzea

Lehena, eta inportanteena, gurekin denbora luzez egongo direla gogoan izatea da.

Higienea

Etxera iristean, txakurkumea garbitzea komeni da, apar lehorrez edo urez eta xaboi neutro batez. Oso garrantzitsua da ondo-ondo lehortzea, aire beroz.

Albaitariarengana joatea

Ahalik eta azkarren albaitariarengana eramatea komeni da, gune zoologiko batetik atera berria baita. Osasun txartela ere eraman behar da, txertatzeko eta bizkarroiak kentzeko jarraibideak zehazteko.

Etxe berria aurkeztea

  • Etxe berrira iristean garrantzitsua da bizilekua aurkeztea, bai eta bertako bizilagunak ere.
  • Komeni da harentzako esparru itxia prestatzea, bertan edateko eta jateko ontziak, ohea eta gainerakoak (jostailuak) dituela.
  • Komeni da eskueran ezer arriskutsurik ez izatea, hala nola leihoak, kableak eta abar.

Ibilaldiak

  • Kalean ematen diren paseoak laburrak izango dira, baina maiz aterako da, ahal dela ordu beretan, pixa kontrolatzeko.
  • Kalera ateratzen dugunean lotuta eramango dugu; gomendagarria da atera aurretik lotzea.

Elikadura

Elikadura pisuaren eta tamainaren araberakoa izango da; horretarako ordutegi eta leku bereziak zehaztuko dira.

Aholkuak

  • Ez da komeni zigorra heziketaren zati izatea.
  • Saihestu indarkeriazko jolasak, tiratzea eta abar. Hartara ez dugu etxebizitza hondatuko.
  • Ez enbarazu egin lo dagoenean, kumea izanik atsedena behar baitu.
  • Eguneroko zaratak entzun ditzala, ohitzeko eta sustorik ez hartzeko.
  • Jaten ari den bitartean, janari gehiago bota ontzira, gerora eraso egin ez diezagun.
  • Saritu albaitariarengana, ile-apaindegira eta abarretara joatean zintzoa bada.
  • Maitasunez hitz egin, zaindu, garbitu, baina ez ahaztu txakur bat dela.
  • Animaliari beste pertsona eta animaliekin egoten uztea komeni da, jabearen zaintzapean.
  • Ez da komeni kumea helduekin lo egiten uztea, animaliak ohikoa dela uste izango baitu eta gero lekuz aldatzeak trauma bat eragin baitiezaioke; horren ondorioz, zaunka, harramazka has daiteke, edo portaera aldatu dakioke.

Txakurren eta katuen ugalketa: antzutzea

Konpainiako animaliak antzutzea oso tresna egokia da nahi gabeko sabelaldiak eta horren ondoriozko animaliak abandonatzeko joera galarazteko.

Gainera, antzutzeak "balio erantsia" ematen diete ebakuntza izan duten animaliei; izan ere, ar eta emeen artean sexu-hormonak urritzeak murriztu egiten dituela baita beren agresibitatea eta hainbat jokaera deseroso (esaterako usain sakona), eta emeen kasuan, baita bularreko tumoreen arriskua.

Berez ez dago nahitaez animaliak antzutu beharrik, baina Armentiako Animaliak Babesteko Zentroan biziki gomendatzen dugu, Europa eta Estatu Batuetako zentro gehienetan bezala.

Armentiako Animaliak Babesteko Zentroaren erabiltzaileek bertan dauden animaliak egoki irizten dion unean antzutzeko eskubidea duela; gainera, pixkanaka antzutzeko ebakuntzen kopurua handitu egin nahi da.

Konpainiako animalia antzutuak animalia osasuntsuak dira, antzutzeak ez diete okerreko aldaketarik eragiten, eta bai, aldiz, pertsonekiko elkarbizitzara egokitzen laguntzen.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.