Eskola-patioak naturalizatzea: zer den, helburuak eta esku-hartzeak

1. Zer da naturalizazioa?

Espazio batean natura sartzeko prozesua da. Hasteko, lur emankorra berreskuratzen da; gero, landaredia eta fauna birsartzen dira, eta prozesu naturalak bultzatzen dira.

Naturalizazioak klima-aldaketara egokitzen lagunduko du, ingurumen-baldintzak erregulatzen eta bizigarritasuna hobetzen duen eraginaren bidez.

Hezkuntza-komunitateen partaidetza aktiboarekin eta hezkidetzaren, inklusioaren eta iraunkortasunaren ikuspegiak txertatuta, patioen naturalizazioak aukera ematen die ikastetxeei biodibertsitatea irabazteko, klima-aldaketaren ondorioetara egokitzeko eta hezkuntza-jardunerako baliabideak sortzeko.

2. Zer helburu du naturalizatzeko proiektuak?

Proiektuak Gasteizko ikastetxeetako kanpoaldeko espazioak eraldatu nahi ditu, klima-aldaketara egokitzeko eta hiriko azpiegitura berdearen sisteman txertatzeko, hezkuntza-komunitateen partaidetza aktiboarekin, eta esku-hartzerako printzipio gisa hezkidetzaren, inklusioaren eta iraunkortasunaren ikuspegiak txertatuz.

Hauek dira helburu zehatzak:

• Eskola-jolastokiak naturan oinarritutako irtenbideak baliatuz eraldatzea klima-aldaketara egokitzeko, klima-politiken eta azpiegitura berdearen estrategiaren testuinguruan.
• Espazio inklusiboagoak sortzea.
• Aukera-espazioak sortzea Gasteiz Hiri Hezitzailea programaren testuinguruan hezkuntza-proiektu integralak egiteko.
• Gizarte-kohesioa hobetzea, ekintza komunitarioko eta sozialerako eta herritarren partaidetza sustatzeko proiektuen bidez.

Zerbitzu publikoko ekipamendu gisa, ikastetxeak laborategi bikaina dira irtenbide berritzaileak aplikatzeko eta klima-aldaketaren aurkako borrokarekin lotutako jardunbideak ezagutarazi eta zabaltzeko.

3. Aurreikusitako esku-hartzeak

• Gainazalen eraldaketa: zoladura iragazgaitzen ordez gainazal drainatzaileak eta/edo lorategi itxurakoak jartzea.
• Topografia aldatzea: lurrarekin bolumenak eta gainak sortzea.
• Landaketak eta ereiteak: ingurunera egokitutako landare-multzoak sortzea, belarrak, zuhaixkak eta zuhaitzak sartuz.
• Landare-edukiontziak instalatzea, horietan lurra sartzeko landaretzaren euskarri gisa.
• Ureztatzeko eta urak biltzeko sareak behar berrietara egokitzea eta aldatzea.
• Haur-jolasak eta kirol-pistak espazio-eskema berrira egokitzea eta aldatzea.
• Nitxo ekologiko berriak sortu eta sustatuko dituzten elementuak instalatzea, hala nola urmael txikiak, hegazti edo saguzarrentzako habia-kutxak, intsektu-hotelak, hegaztientzako janlekuak, etab.

Lotutako informazioa

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.