Hiria eta ekonomia
Gasteiz Euskal Autonomia Erkidegoko eta Arabako hiriburua da.
Tamaina ertaineko hiria da, 250.000 biztanle inguru baititu; hiri trinkoa da, biologia eta paisaia aberastasun handiko ingurune batean kokatua, eta bizi-kalitate altukoa. Bizitoki, merkataritza, hezkuntza, osasun, kultura eta kirol eskaintza zabala du. Hiriak berak eta inguruneak natura, historia edo aisialdiarekin lotutako leku interesgarri ugari dute, puntako helmuga turistiko bilakatuz.
Kokapena, konexioa eta merkatu potentziala
Lurraldearen ikuspuntutik, enpresa gure hirian kokatuz gero abantaila hauek izango lituzke:
- Kokapen geografikoa, Madril-Paris europar ardatzaren eta Bartzelona-Oporto iberiar ardatzaren arteko bidegurutzean.
- Kokapen horren abantailak ezin litezke baliatu enpresen zerbitzura jarritako azpiegitura logistiko egokirik gabe: 24 orduz irekita dagoen nazioarteko kargarako aireportua hirian bertan, lehorreko portua, trenbidearen eta garraio hiriaren arteko konexio intermodala, Europa barneko trenbide eta autobide sarea, eta Bilbo, Pasaia eta Santanderreko portuekiko hurbiltasuna.
- Beste alderdi aipagarri bat, Gasteizen kokapen geografikoarekin lotutakoa neurri batean, lurzoruen eta higiezinen eskuragarritasuna da, oso prezio lehiakorrean, jarduera eta tamaina guztietako negozioak berehala ezarri ahal izateko.
- Gure kokapen geografikoak 1 eta 1,5 ordutara kokatutako gertuko merkatuaren potentziala maximizatzen du, 3 milioi biztanletik gora, 143.945 enpresa eta 1.316.084 enplegu baititu. Eremu handiago batean (300 km-ko erradioa), merkatu potentziala 15 milioi biztanle, 700.000 enpresa eta 6 milioi enplegutik gorakoa da.
Era berean, enpresen sostengu sarea kontutan hartuta Gasteiz enpresentzako aukera bikaina da.
Bizi-kalitatea
Euskal Autonomia Erkidegoa Espainiako 17 autonomia erkidegoen arteko lehena da Giza Garapenaren Indizean -2015an 0,916koa zen, Estatu Batuetan, Suedian eta Erresuma Batuan bezala (GGIan munduko laugarren postuan dago)- eta erkidegoko hiru probintziak lehenengo hiru postuetan daude Espainiar Estatuko 52 probintzien artean (1).
Bizi-itxaropena EBko altuenetako bat da, bai eta munduko altuenetako bat ere, eta horrek badu zerikusirik bizi-kalitatearekin eta baliabide ekonomiko, sozial eta sanitarioekin.
Hala hiri ingurunearen eta espazio naturalaren kalitate handia nola herritarrek, enpresek eta erakundeek hura zaindu eta hobetzeko duten kezka hiriaren ezaugarri nagusietako bat bihurtu dira, eta horri esker European Green Capital 2012 titulua lortu zuen, hiriak jaso dituen aintzatespen zerrenda luzean garrantzitsuena. Hori aukera bat da ekonomia eta ingurumen bikaintasuna lortu nahi duten enpresentzat.
Gasteizko ekitaldi nagusiak
Urtetik urtera, bakoitza bere esparruan erreferente bilakatu diren kultura- zein gastronomi-ekitaldi garrantzitsuak ospatu ohi dira Gasteizen.
Gainera, zerbitzuen hiriburu eta negozioen eta bileren gune operatiboa den aldetik, Vitoria-Gasteizek duen kokaleku estrategikoa eta bere azpiegiturak kontuan izanik, leku ezin aproposagoa da kongresuak edo MICE jarduerak bertan egiteko.
Bikaintasun ekonomikoa
Arabako ekonomia Espainiako 52 probintzien arteko lehena da biztanle bakoitzeko BPGd-ari dagokionez (EBko batez bestekoaren % 131 baino gehiago), eta hamar urte baino gehiago iraun du postu horretan. 2017an kopuru hori 37.000 eurora iritsi zen, Espainiako batez bestekoa halako bat eta erdi ia.
Hona hemen emaitza globaletan lortutako leku goren hori azaltzen duten ezaugarrietako batzuk:
| Indizea | Balioa |
|---|---|
| Produktibitate handia | EAEn, enplegatu bakoitzeko produkzioa EBko batez bestekoaren % 121koa da (2019). (2) |
| Energia intentsitate txikia | EAEn 86,6 kilogramo petrolio baliokidetan, EBko 119,5koaren aldean (2019), industriak pisu handia izan arren. (3) |
| Kualifikazio handiko giza kapitala | 30 eta 34 urte bitarteko populazioaren % 50,4k unibertsitate-ikasketak ditu, EBko % 39,2aren aldean. (4) |
| I+Gko gastua | BPGd-aren % 1,85, Espainiakoa (% 1,24) baino handiagoa (2018). (5) |
| Enplegu tasa handia | 15 eta 64 urte bitarteko populazioaren % 67 inguru, EBko batez bestekoaren oso antzekoa (2017). (6) |
| Esportazio bolumena | BPGd-aren % 32tik gorakoa (2017). (7) |
Ekonomia jarduera
Industriak pisu handia du Arabako ekonomian (BPGd-aren eta enpleguaren % 25etik gora), eta zerbitzu aurreratuak ere -askotarikoak eta maila bikainekoak- oso garatuta daude. Duten tradizioa eta azken urteetako garapena kontuan izanik, bizi-kalitatearekin lotutako zerbitzuen garrantzia ere nabarmendu beharra dago, hala nola osasuna, hezkuntza, kultura, kirola, ikuskizunak, merkataritza, ostalaritza eta turismoa.
Hauek dira industria jarduerak garrantzitsuenak:
- metalaren eta mekanikaren arlokoa
- automobil-industria
- kautxua eta plastikoa
- makinagintza, aeronautika
- trenetako materialaren fabrikazioa
- nekazaritzako elikagaien industria
Puntako zenbait enpresak -Mercedes Benz eta Michelin- gure hiria aukeratu dute kokatzeko, eta hartara enpresa sare lokal aberats eta dinamikoa sustatu eta osatu dute.
Informazio gehiago
Hiriaren errealitatea eta bilakaera hobeto ezagutzeko agiri mota ezberdinak eskuragarri ditu Ikerlan eta estatistikak
--
Erreferentziak
- Desarrollo humano en España. 1980-2011 (2013) Fundación Bancaja e Ivie - Instituto Valenciano de Investigaciones Económicas-.
- Lanaren produktibitatea langile, herrialde eta urteen arabera (2018-2019). Eustat.
- Energia-intentsitatea, herrialdeka. 2010-2019. Eustat.
- Europa Batasuneko eta Euskal AEko giza baliabideen adierazleak herrialdearen arabera. 2020. Eustat.
- I+Gko gastua (BPGdaren %), herrialdearen arabera. 2007-2019. Eustat.
- "Economía y Mercado de Trabajo (Vitoria-Gasteiz 2017)" txostena
- Eustat.
Zure iritziak axola digu
Nahi baduzu, iruzkinak egin ditzakezu.
Nahitaezkoa da identifikatzea.