AMVISA - Bezeroarentzako informazioa - Etxebizitzetan dauden biltegiak

Kutsadura iturri ote?

- HELBURUAK

Populazioa biltegiak taxuz erabiltzeari buruz sentikortzea, alferrikako arriskuak ez izateko eta osasun kutsadura saihestearren

- APLIKAZIO ESPARRUA

Edateko ura biltzeko etxebizitzetan dauden biltegiak

- GOMENDIOAK

Egungo banaketa sareak dakarren presioa dela eta, oso gutxi dira biltegiaren beharrik duten etxebizitzak.

Bi biltegi mota daude:

1. Biltegi atmosferikoak.

2. Presiopeko biltegi hermetikoak.

Biltegi atmosferikoak uraren kalitatea hondatzeko gune aparta dira, eta etxearen jabeen erantzukizun den mantenimendu etengabea eskatzen dute honako lanak egiteko

1. Urteroko gutxieneko garbiketa egitea presiopeko ur mangerak, isipuak eta hipokloritoa erabilita, eta ondoren, ondo txukatuta eta hustuta

2. Estalki egokia ipintzea.

3. Zartadura eta zirrikuak zaintzea (kanpotiko iragazpenak gerta litezke eta).

4. Hustubideek ez dute estoldekin konexio zuzenik izan behar

5. Urez hornitzeko puntua gehienezko gainezka mailaren gainetik egon behar du ipinita

6. Gainezkabideak behar ez diren elementuak sartzea ekiditeko halako sareta batek babestua behar du izan, eta ez du estoldekin konexio zuzenik izan behar.

Biltegiak beharrik gabe erabiltzeak osasunerako arriskua, hornitzen den urak kalitatea galtzea eta gehiegizko kostu ekonomikoa dakar. Udaletxe honek funtsezkoa jotzen du mota honetako instalazioak etxebizitzetan edateko ura biltzeko, ez erabiltzeko.

Biltegia erabiltzea ezinbesteko suertatzen denean, jokabide honi heldu beharko zaio:

1. Erabilerak etengabea izan behar du, bestela, aldika edo erregulartasunik gabe erabiliz gero, ura kutsatzeko arriskua handia izaten baita

2. Halaber biltegi atmosferikoak presiopeko hermetikoez ordeztea gomendatzen da, indarrean dauden Udal Ordenantzei jarraiki.

AZKEN OHARRA:

Beharrik ez duten etxeetan gaur egun dauden biltegi eta instalazioak erreserban gorde daitezke jabeek hala nahi izanez gero, aurrerantzean beharrezko suertatuz gero erabiLi ahal izateko. Horretarako, baina, hutsik eta garbi mantendu behar dira, eta instalazio osoa noiz nahi erabiltzeko moduan.

- URA GORDE ETA PONPATZEKO DEPOSITUAK ERABILTZEARI UZTEKO GOMENDIOAK

1. Ura gorde eta ponpatzeko instalazioak erabiltzeari uzteak abantaila hauek ditu:

1. Zuzenean hartzen den urak osasun berme handiagoa du deposituan gordetakoak baino
2. Depositua garbitzeak, ponpak mantentzeak eta energia elektrikoak sortutako gastuak aurrez daitezke.
3. Zerbitzuaren kalitatea hobea da, sare publikoaren presioa ponpaketa ekipoena baino konstanteagoa baita; gainera, elektrizitate etenek eta ponpen matxurek ez dute eraginik sarean.
4. Ura saretik zuzenean hartzearen desabantaila bakarra hauxe izan daiteke: AMVISAk mantentze-lanak egiteko kaleko ura eteten duenean hornidurarik gabe geratzea. Azken urteetan AMVISAk zenbatetan eten dizuen ura gogoratu eta atera kontuak horrek nolako enbarazua sortuko dizuen.

2. Sare publikoaren presioa solairu altuenetan dauden etxebizitzak urez hornitzeko gauza ez denean baino ez dira erabili behar depositu eta ponpaketa sistemak. Izan ere, deposituetan dagoen uraren kalitatea txarragoa da eta mantentze egokirik ez badute ura kutsatu ere egin daiteke, eta hori arriskutsua izan daiteke pertsonen osasunarentzat

3. Beharrezkoak badira, depositoek etengabe funtzionatzen egon behar dute; ez da komeni depositoak eta ponpak ordu batzuk egunean edo kaleko presioa nahiko ez denean bakarrik erabiltzea

1. Lehenengo kasuan, ura deposituan geldi dagoen denbora luzatu egiten da; horren ondorioz, uraren osasungarritasuna bermatzen duen kloroa desagertzen da eta kutsatzeko arriskua dago.
2. Bigarren kasuan, ez dago jakiterik zenbat denbora dagoen ura gordeta eta kutsatuta egoteko arriskua oso handia da.

4. Deposituak eta ponpaketak erabiltzeari uzteko pausu hauek eman behar dira

1. Ponpaketaren kasuan, deposituaren ur sarrera eta irteera itxi eta etxebizitzetarako lotura zuzena ireki.
2. Ura etxebizitza guztietara ondo iristen dela egiaztatu eta gero, depositua erabat hustu eta garbitu. Izan ere, batetik, ur geldia eta hormetako hezetasuna leku ezin hobeak dira mikroorganismoak ugaltzeko, eta bestetik, berriro erabili beharko bagenitu errazagoa litzateke abian jartzea.
3. Ponpak ikuskatu eta deskonektatuta, koipeztatuta eta estalita utzi, ahal den neurrian honda ez daitezen. Azkenik, egoki iritziz gero, ponpaketa mantentzeko, depositua garbitzeko eta ponpa energiaz hornitzeko kontratuak baliogabetu.

Amvisak 2 programa finko ditu:

- Kontrol analitikoa kontsumitzailearen txorrotan (140/03 E.D)

- Finketako biltegi zein ponpatze instalazioen berrikusketa, jabeei jakinarazteko zein neurri hartu behar dituzten uraren kalitatea mantentzeko.

Gomendio horien inguruko argibiderik nahi izanez gero, AMVISAko bulegoetara deitu (945161030 tel.) eta guk atsegin handiz argituko dizkizuegu zalantzak.

Lotutako informazioa

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.