Vitoria-Gasteiz 2030 Hiri-Agenda: Etorkizunak hiri-eredu berriak behar ditu

Gasteizko Udalak herritarrak sentsibilizatzeko kanpaina jarri du abian udalerriko pertsona guztiek hobeto ezagutu ditzaten GJHak (Garapen Jasangarrirako Helburuak). Gainera, helburua da gero eta herritar gehiagok lotzea GJH horiek Udalak aurrera eramaten dituen ekintzekin, eta NBEk abiarazitako 2030 Agendarekin bat datorren hiria eraikitzeko beharra azaltzea.

Lehen fasean, 2022ko ekain-uztailean, hainbat komunikazio- eta sentsibilizazio-ekintza egin dira Gasteizko herritarrei GJHak ezagutzera emateko eta gure hiriaren egunerokoan duten eragina azaltzeko.

Kanpainak hainbat euskarri ditu, hala nola bideoak, sare sozialetan egiten den kanpaina eta haurrentzako tailerrak hiriko bi kirolgune nagusietan, Gamarran eta Mendizorrotzan, kolektibo horri agenda horren garrantzia erakusteko, sormenaz baliatuz. Bestalde, lau horma-irudi iraunkor egin dira kiroldegiaren alboetan eta Mendizorrotzako frontoietan. Horma-irudi horietan 17 GJHak irudikatu dira eta Gasteizen dagoeneko martxan dauden hainbat ekintzarekin eta programarekin lotu dira.

Bigarren fasean, 2022ko irailean, hainbat komunikazio-ekintza jarri dira martxan, Gasteiz 2030 Hiri Agendaren ekintza-plan berria bultzatzen duten hiri-eredu berriak aurkezteko. Hainbat herritarren adibidearekin lotu dira eredu horiek, beren lanaren, proiektuen, filosofiaren, sorkuntzen eta jardueraren bidez, gure udalerrian GJHak ezartzen eta etorkizuneko Gasteizen zutabeak eraikitzen lagundu dutenak, hain zuzen ere. Hiri-eredu berri horiek ezagutzera emateko, publizitate-kanpaina bat egin da hainbat irudi eta bideoren bidez, eta irailaren erdialdean amaituko da azken ekintza batekin.