Birding Araban - Turismoa Vitoria-Gasteizen

Arabako probintziak sei behatoki ditu, lehen mailako turismo zerbitzuekin. Hots, erabilera publikoko ekipamenduak, hegazti behatokiak, interpretazio-zentroak eta seinaleztatutako ibilbideak...
Behaketarako gomendioak.

Hegaztiei behartzeko tokiak

Salburua - Ramsar Hezegunea- Natura 2000 Sarea- Hiri-inguruko Parkea

Salburua hezegune bat da, zenbait urmaelek osatua eta belardi hezeek, makaldiek eta harizti txiki batek inguratua. Sartzeko erraza da, eta, bertako bidezidor eta behatokiei esker, bisitarientzat oso erosoa da hegaztien mundura hurbiltzea. Urte osoan hainbat hegazti ikus ditzakegu, urtarrak, anatidoak, lohietako espeziak eta zangaluzeak.

Ibilbide ornitologikoak

• Arkautiko Urmaela (5,4 kilometro).
• Betoñuko Urmaela (3,1 kilometro)

Abiapuntua: Ataria, Salburuko Hezeguneen Interpretazio Zentroa. Biosferaren pasealekua, 4. Vitoria-Gasteiz. Telefonoa: 945 25 47 59.

Valderejo - Natura 2000 Sarea- Parke Naturala

Puron ibaiak Valderejoko Parke Naturala zeharkatzen du, arroila sakon eta ederra zulatuz. Euskadiko hegazti harkaiztarren bilgune konplexuenetako bat da, eta besteak beste, sai arrea, sai zuria, arrano beltza, belatz handia, malear sorbeltza edo belatxinga mokohori eta mokogorria ikus ditzakegu bertan.

Ibilbide ornitologikoak

• San Lorentzorako igoera (7 kilometro).
• Purón Ibaiaren arroila (5,9 kilometro)

Abiapuntua: Valderejoko parketxea, Lalastra. Telefonoa: 945 35 31 46.

Ullibarri Gamboako Urtegia - Ramsar Hezegunea- Natura 2000 Sarea- Parke Ornitologikoa

Urtegiko ertzetatik oso erosoa da hegaztiak ikustea, sarbide asko daudelako eta eremua 45 km-ko perimetroko berdegune batek inguratuta dagoelako. Hegoaldea hainbat kopetazuri, murgil, txilinporta eta basahate bikoterentzat eta espezie bakanago batzuentzat (koartza gorria, ipar-ahatea edo ahate mokozabala) haztoki ezin hobea da. Gainera, migrazio-garain eta negupasan, hezegunea aterpetxe eta jantokia da anatido, zangaluze eta lohietako espezie ugarirentzat.

Ibilbide ornitologikoak

• Mendixurreko Parke Ornitologikoa (3,5 kilometro). Mendixur (Araba).
• Uribarri-Ganboako urtegiko bira (44 kilometro). Abiapuntua: Garaio Parke Probintziala (Araba).

Izki - Natura 2000 Sarea - Parke Naturala

Izkiko eremuan basoak dira nagusi, eta ametz arruntaren (Quercus pyrenaica) Europako formaziorik esanguratsuenetako bat aurkitzen dugu bertan.

Okil ertaina da Izki parke naturaleko hegazti nagusia, eta benetako erronka suposatzen du bai hura behatuz gozatzen dutenentzat bai haren kontserbazioaren ardura dutenentzat, haren hazkuntza-eremuen lasaitasuna babestu eta zaindu behar duten heinean. Espezie harkaiztarrak, sai arrea edo arrano beltza adibidez, errazago ikus ditzakegu, eta alternatiboa on bat izan daitezke basoko zidorretan barrena okilekin topatzeko zortea izan ez dutenentzat.

Ibilbide ornitologikoak

• Izkiko Urmaelak (6,1 kilometro). Abiapuntua: Urturi (Araba).
• Izkiko Erreka-zuloak (5,5 kilometro) eta Ameztiko Ibilbidea (14,1 kilometro). Abiapuntua: Izki Parketxea, Korres (Araba). Telefonoa: 945 41 05 02.

Arabako hegoaldeko mendilerroak - Natura 2000 Sarea

Toloño, Kantauriar, Kodes eta Lokiz mendilerroek mendebaldetik ekialdera zaharkatze dute Arabako hegoaldea, eta hesi moduko bat osatzen dute, mundu mediterraneoa eta atlantikoa argi eta garbi bereizten dituena.

Laiotza pagadi eta erkamezti trinkoez estaltzen da, eta Euskadiko hegoaldeko banaketa-mugan, Europako liztorjalea edo kaskabeltz txikia aurkitzen ditugu, beste espezie batzuen artean. Hegoaldean, besteak beste, sai arre, sai zuri, hontz handi eta arrano beltzek egiten dute habia, baita beste espezie harkaiztar batzuek ere, maskar sorbeltzak eta harkaitz-zozo gorriak adibidez. Belatxinga mokogorria ere oso ugaria da.

Ibilbide ornitologikoak

• Kontrastako Erreka-zuloak (8,8 kilometro). Abiapuntua: Kontrasta (Araba).
• Ioar Zidorra (13,4 kilometro). Abiapuntua: Santa Cruz de Campezo (Araba).
• Zezenaren Mendatea (11,1 kilometro). Abiapuntua: Lagrán (Araba).
• Lobera Pasabidea (5 kilometro). Abiapuntua: Salinillas de Buradón (Araba)

Informazio gehiago: Izki Parketxea, Korres (Araba). Telefonoa: 945 41 05 02.

Guardiako Aintzirak - Ramsar Hezegunea- Natura 2000 Sarea- Biotopo Babestua

Guardiako hezeguneak basahate, kopetazuri, txilinporta, murgil, uroilanda handi eta zingira-mirotzen ugalketarako guneak dira, eta amiltxori eta koarza gorri eta hauskaren kolonia bat ere finkatu da bertako lezkadietan.

Migrazio-pasoetan eta negupasan hainbat espeziek, anatidoek eta lohietako espezieek batik bat, bertan hartzen dute atseden, eta txori zezen arraroa ere agertzen da noizbehinka.

Aintziren inguruan Arabako Errioxako berezko pasaia ageri da: mahastiak, arbendolondo-unadak eta sastraka mediterraneoko eremuak, non banaketa mediterraneoko hegaztiek habiak egiten dituzten, hala nola buztanzuri horiak, txoriandre arruntak edo erlejaleak.

Ibilbide ornitologikoak

• Guardiako Aintzirak. (8,7 kilometro).
• Prao de la Paul urtegiko bira (3,7 kilometro).

Informazio gehiago: Laguardiako Turismo Bulegoa. Kale Nagusia, 52. Guardia (Araba). Telefonoa: 945 60 08 45.

Lotutako informazioa

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.