Vitoria-Gasteiz Hiri Hezitzailea 2023-2030 Hezkuntza Plana
Vitoria-Gasteiz Hiri Hezitzailea 2023-2030 Hezkuntza Plana Vitoria-Gasteizko Udalak hiria Hiri Hezitzailea izaten sendotzeko duen konpromisoa adierazten du. Planak gure udalerrian hezkuntza alorrean diren beharrei eta erronkei era kolektiboan erantzuna emateko gauza izango den inguru hezitzaile bat, era ordenatu eta planifikatuan, eraikitzen joateko borondatea biltzen du.
Bere lan-helburuak arau eta programen esparru batean eta 2020ko Hiri Hezitzaileen Gutunak –Udalak hori idazten lagundu zuen– lanerako ezarritako printzipioetan oinarritzen dira.
Egikaritzeko 2023-2030 aldia Vitoria-Gasteiz 2030 Hiri Agenda osatzen duten programetako bat delako ezarri da. Agenda horrek izan nahi du, hain zuzen, Udala atxikita dagoen Garapen Iraunkorrerako Helburuak (GIH 2023) betetzeko ezarritako bide-orria.
Bina urte irauten duten hiru programazioren (2023-2025, 2025-2027, 2027-2029) bidez planifikaturik dago. 2029-2030 aldia, berriz, Planaren amaierako ebaluazioa egiteko gorde da. Horren helburuak eta programak honako esku-hartze ildo hauen bidez antolatzen dira:
- Lehen Haurtzaroaren Hezkuntza.
- Hezkuntzaren eremu formaleko eta ez-formaleko hezkuntza-jarduketa.
- Ekitatea eta kalitateko hezkuntza inklusibo baterako bermea.
- Hezkuntza eta espazioaren eta denboraren erabilerak.
- Hezkuntza alorreko gaikuntza, laguntza eta parte-hartzea.
- Udalen, erakundeen zein gizarte eta hezkuntza arloko eragileen arteko lankidetza.
Plan honekin, Udalak gure udalerrian bizi den pertsona bakoitzaren eta guztien bizialdi osoa hartuko duen kalitateko hezkuntzaren, formalaren zein ez-formalaren, eskubidea garatzen lagundu nahi du. Berdintasunerako eta justizia sozialerako bidean urratsak ematen lagunduko du horrek, ezbairik gabe, eta beraz, gure gizartearen kohesioa areagotuko du.
Lantzeko prozesua
Plana egiteko prozesuan, besteak beste, beste udal-zerbitzu batzuk, beste instituzio eta erakunde batzuk, gizarte- zein hezkuntza-eragileek, Udal Eskola Kontseiluak, Udal Haur Eskolen Sareko Eskola Kontseiluak eta herritarrek hartu dute parte.
Ekarpenak
Hezkuntzako Planaren garapenerako berebiziko garrantzia du hezkuntzarekin edota hezkuntza eremuarekin engaiatutako sailen arteko eta beste instituzio, erakunde eta gizarte- eta hezkuntza-eragileen eta, oro har, herritarren arteko lankidetzak. Hori dela eta, bururatzen zaizkizun ekarpenak edo iruzkinak guri bidaltzera gonbidatzen zaitugu.
Aurreko Planak
- Hezkuntza Zerbitzuko Plan Estrategikoa 2016/2022 (1. aldia)
- Hezkuntza Zerbitzuaren Plan Estrategikoa (2. eta 3. aldiak)
- 2012ko Hezkuntzako plan estrategikoa
Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.