Ohiko galderak: nola jokatu arratoirik ikusiz gero

Bide publikoan arratoiak izatearekin lotutako kontsultak eta erreklamazioak telefonoz egin daitezke,010 edo 945 16 11 00 zenbakietan, baita Herritarrentzako Postontziaren bitartez ere.

Udalak enpresa pribatuekin du kontratatuta arratoiak desagerrarazteko zerbitzua. Abisua jasotzen duenetik 24 eta 48 ordu arteko epean, zerbitzuaren esleipena duen enpresak salaketa eragin duen lekua ikuskatzen du eta, beharrezkoa bada, esku hartzen du. Oinarrizko esku-hartzea rodentizida baliatzea da, salaketa eragin duen arazoa kontrolatzeko. Kontrolpean eta karraskariak dauden tokietan botako da hori, eta beharrezko diren prebentzio-neurriak hartuko dira, pertsonek, animaliek zein ingurumenak kalterik izan ez dezaten.
Lana egin ondoren teknikariek egiturarekin zerikusia duten gabeziak antzematen badituzte, Osasun Publikoaren Zerbitzuari jakinaraziko dizkiote, bertatik horien berri eman diezaioten dagokion sailari. Karraskariak daudelako aurkezten den salaketa gune pribatu batekin lotutakoa bada, teknikariek arazoa kontrolatzeko hartu behar dituzten neurriez aholkatuko dituzte auzokideak.

Oro har, Udalak bide publikoan jarduten du, baina ez jabego pribatuetan eta etxejabeen erkidegoetan. Horrelakoetan, arratoiak agertu diren lekuko komunitateari berari dagokio arazoa konpontzea, edo aretoaren zein etxebizitzaren jabeei.

Badira modu profesionalen horretan diharduten hainbat enpresa —"desinfektatzea, eta intsektuak eta arratoiak hiltzea" epigrafean sartuta daude—, eta horiek behar diren neurri fisikoak hartzen dituzte arratoiak desagerrarazteko.

Funtsezko neurrietako bat Garbiketari eta hondakinen bilketa eta garraioari buruzko udal ordenantza betetzea da, edukiontziak egoki erabiltzeari dagokionez (behar den edukiontzia, ordutegiak...). Jakina, komeni da hondakinik (batez ere organikorik) ez uztea edukiontzien edo bilketa pneumatikorako buzoien kanpoan; ordenantzaren arau-hauste horrek osasungarritasun arazoak sor ditzake, eta zigorra ekar dezake.