Elurra Gasteizen

Elurteei aurre egiteko planean honako lehentasunak ezartzen dira:

• Herritarrei egoeraren eboluzioa jakinaraztea, argitasunez zein maiztasunez, une bakoitzean behar diren oharrak eta aholkuak emanez.
• Leku publiko eta pribatu berezietarako sarbidea erraztea, bertako zereginak ohi bezala bete ahal izateko: ospitaleak, egoitzak, udal zerbitzuak eta zerbitzu publikoak (autobusak, hilerria, zabortegia, araztegiak, etab.).
• Larrialdietan edo ezbehar kasuetan laguntzea, arriskuan dauden pertsonak eta ondasunak salbatu eta babestuz.
• Industria jarduera atzeratu eta gelditzea eragoztea, eremu horietako bideetan garaiz esku hartuz.
• Bide nagusietan eta ibilbide erabilienetan zirkulazioa egokia izan dadin ahalbidetzea, erdialdean zein aldirietan, alde urrunenak isolaturik gera ez daitezen.
• Lehentasunezkotzat jotzen diren gainerako egoerak konpontzea.

Kontuan hartu behar dugu eguneroko bizitzako bestelako zereginetarako ohi baino denbora gehiago beharko dugula:

Oinez bazoaz

• Etxetik atera behar izanez gero, arropa eta oinetako egokiak jantzi behar dira.
• Saia zaitez hiriko parke eta zuhaiztietatik ez igarotzen. Izan ere, zuhaitzetako adarretan metatzen den elurra dela eta, horiek erortzeko arriskua dago.
• Elurra urtzen denean kontuan hartu behar da elur jauzien arriskua. Teilatu-hegaletatik eta erlaitzetatik elur zatiak erortzeko arriskua dagoenez, saia zaitez leku horietatik ez igarotzen.
• Adineko pertsonei eta mugitzeko zailtasunak dituztenei espaloi bereziki elurtu edo gerizpean daudenetan ez ibiltzeko gomendatzen diegu, erori eta min hartzeko arriskua handia delako.
• Kalea gurutzatzerakoan kontu egin datozen ibilgailuei, eta erakutsi gidariei gurutzatzeko asmoa duzula, bat-batean frenatzera behartu gabe.

Bizikletaz bazoaz

• Ez da gomendagarria bi gurpileko ibilgailurik erabiltzea (motozikleta, ziklomotor eta bizikletak).
• Bizikletan ibiltzen bazara, erabil ezazu kontu handiz, eta ez ezazu bortizki frenatu, ezta norabide aldaketa bortitzik egin ere.

Kotxez bazoaz

• Ez erabili, ezinbestekoa ez bada. Erabili garraio publikoa.
• Ibilgailu pribatua erabili beste aukerarik ez baduzu, kontuz gidatu, poliki, segurtasun tartea zainduz.
• Frenatu behar izanez gero, poliki egin, ibilgailuaren kontrola galtzeko arriskua duzu eta.
• Erabil itzazu neguko neumatikoak edo, horren ezean, kateak. Jarraitu itzazu neguan ibilgailuak gidatzeko gomendioak
• Garaje pribaturik baduzu, sar ezazu autoa bertan, ez utzi kalean aparkatuta.
• Hiri arteko errepideetara atera aurretik, adi entzun segurtasun aholkuak eta eguraldi iragarpenak. Erabil itzazu garraio publikoa.

Garbiketarekin istripuak eragotz daitezke, esaterako, oinezkoen erorikoak. Denok batera ekin diezaiogun:

• Funtsezkoa da kaleetan zaborrik ez metatzea.
• Jabeen erkidegoek eta garajeen jabeek elurra garbitu beharra dute beren etxeen aurreko espaloi zatian eta garaje partikularretako sarreran.
• Ibilgailuentzako pasabideak dituzten enpresa edo bestelako instalazioen titularrek horiek garbitzeaz arduratu beharko dute, bai eta beren jabegoen barruan dauden aparkalekuak edo maniobra eremuak garbitzeaz ere.
• Gatza neurriz erabili:
  • Hirian zehar 33 gune daude herritarren eskura, gatza eta/edo palak hartzeko.
  • Dena dela, gatza eta urgarriak neurriz erabili behar dira, gatza ingurumenerako kaltegarria baita.
  • Gatza erabiltzeko argibideak.