Egitura juridikoa aukeratzea - Sozietate zibilak eta ondasun erkidegoak

Sozietate zibila Kode Zibilaren arabera arautzen dena da. Hala ere, gauzatzen duen jardueraren arabera, Merkataritza Kodean ezarritako egiturak hartu ahalko ditu, eta horren arauak aplikatu ahalko dira, baldin eta Kode Zibilean xedatutakoaren kontra ez badoa.

Sozietate hauek izaera juridikoa izan dezakete sozietatearen baldintzak eskritura publikoan jasotzen badira, baina horrek eragiten duen kostua dela eta, ez da sarritan egiten. Ondasun higiezinezko ekarpena egiten bada soilik bete behar da prozedura hori derrigorrez.

Hemen enpresa jarduera bat garatzeko interesgarriak diren sozietate zibil mota bi hauetan kontzentratuko gara: sozietate zibila, berez, eta ondasun erkidegoa.

Sozietate zibila

Sozietate zibila sozietate kontratu bat da eta bertan, bi pertsonak edo gehiagok dirua, ondasunak edo industria komunean jartzen dituzte, irabaziak euren artean partekatzeko. Ezaugarri nagusiak:

  • Sozietate kontratu bat da, hau da, agiri pribatu baten bidez eratzen da.
  • Bazkideen ekarpenak sozietatean sartzen dira.
  • Bazkideek euren artean erantzukizun solidario eta mugatua dute.
  • Ez dauka izaera juridikorik, bazkideen artean itunak sekretuak baitira; hau da, eraketa agiriaren edukiak ez dira inolako erregistrotan inskribatzen. Bazkide bakoitzak bere izenean dihardu hirugarren pertsonen aurrean.
  • Ondasun eta eskubideen ekarpenak inolako mugarik gabe egin daitezke.
  • Galderak eta irabaziak eraketa agirian hitzartutakoaren arabera banatzen dira.

Ondasun erkidegoa

Ondasun erkidegoa gauza edo eskubide indibiso baten jabetza edo titulartasuna duten pertsona batzuek osatzen dute.

Ezaugarri nagusiak:

  • Sozietate kontratu bat da, hots, agiri pribatu baten bidez eratzen da.
  • Ondasun edo eskubideena soilik izan daiteke.
  • Beren itunak sekretuak dira bazkideen artean, eta erkidegoko kide bakoitzak bere izenean dihardu hirugarren pertsonen aurrean, hortaz, ondasun erkidegoak ez dauka berezko izaera juridikorik.
  • Ondasunen ekarpena funtsezkoa da.
  • Besterik frogatzen ez bada, erkidegoko kideen parte-hartzeak berdintzat jotzen dira.
  • Erkidegoko kideen eskubide eta betebeharrak beren parte-hartze kuoten araberakoak dira.

Sozietate zibilen eta ondasun erkidegoen ezaugarri komunak:

  • Biak eratzen dira bazkideek edo erkidegoko kideek sinatutako agiri pribatuaren bidez eta agiriak merkataritza sozietateen antzeko kontzeptuak barne hartzen ditu: bazkideak, kapital soziala, administrariak, etab.
  • Eraketa agiri hau ez da derrigorrez notariotzara eraman behar, ezta inolako erregistrotara ere, beraz, eraketa gastuetan asko aurrezten da.
  • Egitura juridiko biek daukate erantzukizun araubide mugatu eta solidarioa, hau da, bazkide guztiak maila berean dira erantzule, baita beren ondasun pertsonalekin ere.
  • Ez direnez Eskritura Publiko bidez eratzen eta ez direnez inolako erregistrotan inskribatzen, egitura juridiko bi horiek ez daukate izaera juridikorik, hau da, sozietateak berak ez dihardu hirugarren pertsonen aurrean, bazkideak dira haien aurrean dihardutenak.
  • Jarduera ekonomikoaren emaitzak bazkide/erkidegoko kide bakoitzari dagokion Pertsona Fisikoen Errentaren gaineko Zergaren menpe daude, sozietatean duten parte-hartzearen ehunekoaren arabera.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.