Sindikoa edo Herritarren Defendatzailearen ohiko galderak

1.  Nola aurkezten dira kexak?
Zure arazoaren beri eman diezagukezu gure bulegora etorrita, 945 16 26 90 telefono zenbakira deituta, edo e-postakosindikoa@vitoria-gasteiz.org helbidera mezu bat bidalita, eta hitzordua eskatu ahalko duzu sindikoarekin, hark zure erreklamazioa aurrez aurre eta pertsonalki jaso dezan. Jendaurreko ordutegia: 09:00tatik 14:00etara, astelehenetik ostiralera.

Bulegora joan nahi ez baduzu, badituzu beste bide hauek ere zure erreklamazio guri helarazteko:
• Posta arruntez, helbide berberera idatzita: Floridako ibilbidea z.g. (Uraren Ezkutuko Lorategia), 01005 Gasteiz.
• Posta elektroniko bidez, kexa-formularioa bete eta sindikoa@vitoria-gasteiz.org helbidera bidalita.
Kexaren tramitazioarekin lotutako jarduera guztiak doakoak izango dira.


Kexak jaso beharrekoak:
• Kexa eragin duen gertaera eta horren inguruko xehetasunak.
• Sindikoari zehazki egiten zaion eskaria.
• Egoki iritzitako agiri osagarriak.
• Kexa aurkezten duen pertsonaren izen osoa, helbidea, telefonoa eta izenpea.

Jakinarazi nahi dizugu kexua aurkezteak ez duela administrazioaren eta epaitegien ebazpenen egikaritza eteteko indarrik, ezta errekurtsoak aurkezteko epeak ere.
2.  Nola tramitatzen dira kexak?
Aurrez aurre aurkezten baduzu zure kexua, haren kopia zigilatua emango dizugu, eta hartutzat joko dug. Beste bideren bat baliatzen baduzu, hartu izanaren adierazpena bidaliko dizugu, eta kexua jaso dugula jakinaraziko dizugu.

Horrek esan nahi du erreklamazioa ebazteko beharrezko izapideei ekingo diegula. Lehen urratsa, aurkeztu dituzun idazkia eta gainerako agiriak aztertu ondoren, informazioa kontrastatzea da –Udalarekin, edo dena delako udal-enpresa publiko eta erakunde autonomoarekin–, arazoaren arrazoiak eta irtenbide posibleak argitze aldera.

Erakunde horri eskatuko diogun informazioa jaso ondoren, informazio hori, indarreko legedia eta jurisprudentzia berriena aztertuko ditugu, bai eta jardunbide posibleak ere. Batzuetan informazio osagarria eskatu behar izaten da, ilun geratu den alderdiren bat argitze aldera, edo baita hasiera batean kontuan hartu ez dugun zerbitzuren batengana jo ere.

Kexa aurkeztu duen pertsonak uneoro eska dezake kasuaren nondik norakoen inguruko informazioa; horretarako, nahikoa izango du Herritarren Defendatzailearen Bulegora jotzea, eta bere kexa-dosierraren tramitazioaren berri eskatzea, edo berari buruzko kontsultak egitea.

Bukatzeko, kexa aurkeztu zuen pertsonari zein eragindako sailari idatziz jakinaraziko zaizkie tramitazioaren emaitza edo lortutako irtenbidea, eta –halakorik egonez gero– baita sindikoak Udalari edo eskumenak dituen erakundeari haren jarduera hobetzeko egin dizkion gomendio edo iradokizunak ere.

Kexa ez bada onartzen, sindikoak horren arrazoiak azalduko dizkio interesdunari, eta arazoa konpontzen saiatzeko egon litekeen beste bideren berri emango dio.

Kexak tramitatzeko urrats guztiak diskrezio eta konfidentzialtasun osoz egingo dira.
Edozein kasutan, Udalaren zerbitzuko langileak sindikoaren eskakizunei erantzutera behartuta daude, idatziz, eta ahalik eta epe laburrenean.
3.  Lotesleak al dira Herritarren Defendatzailearen Bulegoaren erabakiak?
Ez. Gogorarazi beharra dago sindikoak ez duela epaile gisa jokatzen eta, beraz, ez duela epairik ematen, ez duela kexa eragin duten administrazio-egintzak baliogabetzeko indarrik. Hitz batean esanda, sindikoak ez du ahalmen betearazlerik.

Sindikoaren jardunak ez du administrazio-prozedura eteten, hau da, ez ditu helegiteak edo erreklamazioak aurkezteko epeak eteten.
4.  Nori zuzentzen zaio zerbitzua?
Udalak, udal-enpresa publikoek edo Udalaren erakunde autonomoek legez aitortuta duten eskubideren bat errespetatu ez dutela iritzita, kexak eta esku-hartze eskaerak aurkeztu nahi dituen pertsona, elkarte edo talde orori, udal-administrazioarekiko harremanetan izan ditzaketen arazoak konpontzen lagun diezaien.
5.  Noiz jo daiteke bertara?
  • Arazoren bat izanez gero udal-administrazioarekin edo haren menpeko zerbitzuren batekin, halakotzat hartzen direlarik Udala, haren erakunde autonomoak (Ingurugiro Gaietarako Ikastegia, Jose Uruñuela Dantza Kontserbatorioa eta Luis Aranburu Musika Eskola) eta udal-enpresa publikoak (21 Zabalgunea, TUVISA eta AMVISA).
  • Udalari erreklamatu eta erantzunik edo konponbiderik lortu ez bada.
  • Une horretatik hasita urtebeteko epean.
  • Hona hemen Sindikoarengana aholku eske joateko eta, egoki bada, kexa formala aurkezteko moduko egoeren adibide batzuk:
    -“Jakinarazpen hau iritsi zait etxera eta jakin nahi nuke zein epe dudan alegazioak aurkezteko”.
    -“Isun jakin hau jaso dut, dagoeneko errekarguarekin, baina ez dut lehen horren inguruan ezer jasotzearen errezelorik”.
    -“OHZrn ordainagiria bidali didate, eta uste dut ez dizkidatela behar bezala aplikatu hobariak”.
    -“Ixteko ordua errespetatzen ez duen ostalaritza-establezimendu bat daukat etxe azpian, eta zaratek ez didate atseden hartzen uzten”.
    -“Bizikletaz joaten naiz lanera, baina lantoki inguruan ez dago hura uzteko aparkalekurik”.
    -“Nire auzoan desorduetan biltzen dute zaborra eta ez didate atseden hartzen uzten”.
    -“Alde Zaharrean bizi naiz eta ez dakit laguntzarik jaso dezakedan etxeko fatxada konpontzeko.”

6.  Noiz ez litzateke sindikoarengana jo behar?
• Ebazpen judizial baten zain dauden edo epaitegiak jada ebatzitako kasuak diren kasuetan.
• Arartekoaren edo Espainiako Herritarren Defendatzailearen aurrean tramitatzen ari diren auzien kasuetan, horiekin elkarlan eta laguntza harremanak baititugu, bikoiztasunak ekiditeko asmoz.
• Partikularren arteko auzi pribatuen kasuetan (auzokoen arteko liskarrak, lan edo merkataritza arazoak...), non asmoa bitartekaritza lortzea ez den.
• Interesdunak fede txarrez jokatzen duela antzematen bada eta oinarririk gabeko kexak badira.
• Oinarririk gabeko kexak badira.
• Auzi baten tramitazioak besteri kalte ekar badiezaioke.
• Artean eskaerak Udalean aurkeztu EZ badira.
• Gasteizko menpeko toki-erakundeen eskumeneko auzien kasuetan.
7.  Zer egin dezake sindikoak zure alde?
Gasteizko Udalaren inguruan edozein zalantza duzula ere, eta hark behar bezala erantzuten ez dizula ikusten baduzu, sindikoak lagundu egin zaitzake:
• Kezkatzen zaituen auziari buruz orientatu, aholku eman eta informatzen.
• Gasteizko Udalaren jarduera esparruari dagokionean, zure eskubide eta interes zilegi eta bidezkoak artatzen.
• Gomendioak eta iradokizunak egiten (baita legez bete beharrekoak gogoratzen ere) Gasteizko Udaleko zerbitzu orori, bai eta haren menpeko enpresa publiko ea erakunde autonomoei ere, zure egoera konpondu dezaten edo aurrerantzean beste inork halakorik pairatu ez dezan.
• Udala eta zu zeu zerbait adostera iritsi zaitezten.
• Beste norbaitekin arazoren bat baduzu, sindikoak bitartekari lana egin dezake, baldin eta alde biek baimentzen baduzue.
8.  Ezer ordaindu behar da zerbitzuarengatik?
Sindikoaren esku-hartzeak beti doakoak dira interesdunentzat.
9.  Zer da Sindikoa?
Udalerri esparruko herritarren babeslea da, zeinak, Gasteizko Udalaren Osoko Bilkurak hala aginduta, xede baitu udal-administrazioaren, udal-enpresa publikoen ea erakunde autonomoen jarduna gainbegiratzea, hartara herritarrei dagozkien eskubideen urraketa galarazteko. Horretarako, herritarren arazoak entzuten ditu eta aholku ematen die udal-zerbitzuen inguruan izan ditzaketen erreklamazioen inguruan, eta, behar izatera, zerbitzu horiek hobetzeko gomendioak ematen ditu. Doako zerbitzua da.

Sindikoaren zeregina udal-zerbitzuen jardunaren (edo jardun ezaren) ondorioz babesgabe daudela uste duten pertsonei arreta, informazioa eta orientazioa ematea da. Toki-administrazioaren funtzionamendu egokia zaintzeko helburua duelarik, Gasteizko Udalaren gainbegirale eta laguntzaile dihardu, haren jarduna hobetze aldera.

Osoko Bilkurak izendatzen du, eta haren aurrean eman behar izaten du kontu urtero,urte horretan izan duen jardunaz. Sindikoaren agintaldia 5 urtekoa da, eta karguan berriztatu daiteke, gehienez ere bi agintalditan. Gainera, hiru hilean behin Iradokizun eta Erreklamazio Batzorde Bereziaren, aurrean agertzen da, aurreko hiru hilabeteetan Herritarren Defendatzailearen Bulegoak izan duen jardunaz informatzeko.

Sindikoaren Bulegoaren ezaugarri dira gertutasuna, independentzia, objektibotasuna eta neutraltasuna . Sindikoaren bulegoa izate hutsa kalitate demokratikoaren eta gobernu onaren zantzuak dira. Sindikoak ez du ahalmen betearazlerik, eta ezin du prozesu judizial baten menpe dauden auzietan jardun.

Udalaren jarduna gainbegiratzeaz gain, aritzen da baita udal-enpresa publikoen eta erakunde autonomoena ere gainbegiratzen: 21 Zabalgunea, AMVISA, TUVISA, Jose Uruñuela Dantza Kontserbatorioa, Luis Aranburu Musika Eskola eta Ingurugiro Gaietarako Ikastegia.

Gaur egun, sindikoa Gasteizko Udalerriko Gizarte Kontseiluko eta Udalaren Gardentasun Kontseiluko kidea da.

Informazio gehiagorako, kontsultatu daiteke Vitoria-Gasteizko udaleko herritarren defendatzailearen araudia.

Lotutako informazioa

  

Zure iritziak axola digu

Lagun iezaguzu hobetzen. Informazio hau baliagarria gertatu zaizu?            

Nahi baduzu, iruzkinak egin ditzakezu.
Nahitaezkoa da identifikatzea.

Gaia publikoa izatea aukeratzen baduzu, gainontzeko herritarrek zuk idatzitakoa eta udalak emandako erantzunak irakurri ahalko dituzte; baita iruzkinak egin ere. Gaia pribatutzat jotzen baduzu, zuk bakarrik izango duzu gai horretarako sarbidea eta udalak emandako erantzunak irakurtzeko aukera. Gaia idaztean identifikazio kodea emango zaizu.

Aldartea

Harremanetarako beste kontaktu bat: