Udaltzaingoa - Lapurretei buruzko aholku eta gomendioak

Lapurretarik gertatuz gero nola jokatu jakitea garrantzitsua da ondorioak ahalik eta txikienak izan daitezen. Egoera horiek ez gertatzeko aholkuak ematen dizkizugu, eta lapurtzen badizute nola jokatu behar duzun adierazten.

Lapurretaren biktima ez izateko zenbait jokaera hartu behar da kontuan. Gasteizko Udaltzaingoak zenbait aholku ematen digu gaizkileen jarduna eragotz dezagun.

Aholkuak

Nola saihestu lapurreta bat bide publikoan

  • Ahal dela, ez ibili leku bakarti edo argitasun gutxikoetan.
  • Behar duzun dirua baino ez ezazu eraman, eta hainbat sakelatan banatuta.
  • Ez itzazu bistatik galdu zeure gauzak.
  • Poltsa aurrealdean gurutzatuta eraman ezazu.
  • Saia zaitez kutxazain automatikoak bulego orduetan erabiltzen; erabil itzazu bulego barruko kutxazainak, eta ez ahaztu atea blokeatzeaz barruan zauden bitartean.
  • Eska ezazu laguntza oihuka erasotzailea beldur dadin eta beste pertsona batzuen arreta erakartzeko.
  • Ez ezazu kaleko salmenta onartu, ez eta saltokietatik kanpo eskaintzen dizkizuten loreak edo bestelako objektuak. Horien jatorria eta kalitatea zalantzazkoak dira, eta iruzurra dira.

Nola saihestu lapurreta bat etxebizitzan

  • Etxetik kanpo irteten zaren guztietan itxi ezazu atea giltzaz.
  • Saia zaitez etxean objektu baliodunik ez metatzen, eta halakorik baduzu egin ezazu inbentarioa.
  • Ezkuta ezazu dokumentazio garrantzizkoa, batez ere zure sinadura duena (aurrezki-libretak, ordain-txartelak...).
  • Ez utzi ezezagunei sartzen; zerbitzu teknikoen kasuan, eska iezaiezu ziurtagiria eta egiazta ezazu horren balioa enpresara telefonoz deituz.
  • Etxetik irteten zarenean, denbora gutxirako bada ere, egiazta ezazu ate guztiak (baita garajekoa ere) eta leihoak ondo itxita daudela.
  • Alda ezazu sarraila etxebizitza berri batera aldatzen zaren bakoitzean, giltzak galdu dituzunean edo etxean lanak egin eta langileren batek giltzak erabili dituenean.
  • Bizilagun baten etxean ezer arrarorik antzemanez gero dei ezazu Udaltzaingora.
  • Etxera iristean sarraila bortxatu dutela ikusten baduzu, ez zaitez sar: hatz markak ezaba zenitzake, edo lapurrak barruan aurkitu. Dei ezazu Udaltzaingora berehala.
  • Ez ezazu jendaurrean aipatu oporrak egitekotan zarela eta etxea hutsik geratuko dela.

Nola saihestu lapurreta bat ibilgailuan

  • Ez ahaztu ateak, maletategia eta kapota behar bezala itxita eta leihoak igota uztea.
  • Saiatu zure ibilgailua argiztatutako guneetan eta aparkatzeko egokitutako lekuetan uzten.
  • Komunitatearen garajean aparkatuz gero, egiaztatu, sartu eta irtetean, atea zuzen itxita dagoela. Zerbait susmatuz gero, deitu 092ra.
  • Inoiz ez utzi etxeko giltzak edo garajeko agintea ibilgailuaren barruan.
  • Badaukazu irratirik? Finkoa baldin bada, estali. Atera badaiteke, kendu segurtasun handiagoa izateko.
  • Inoiz ez utzi baliozko gauzak begien bistan ezta atzeko erretiluan ere: poltsak, ordenagailuak, pda gailuentzako euskarriak, nabigatzaileak, sakelako telefonoak…
  • Izan zuhurra baliozko gauzak maletategian sartzen dituzunean.
  • Erosketa azkarra eginez gero, saiatu autoa martxan jarrita eta ateak irekita ez uzten.
  • Erne egon beti semaforo, gasolindegi edo beste leku batzuetan gelditzean. Saiatu leihoak igota eta ateak blokeatuta izaten.
  • Bidaian edo denboraldi baterako kanpoan izanez gero, ez utzi autoa denbora luzean leku berean aparkatuta. Eskatu norbaiti mugitzeko, abandonatuta dagoela eman ez dadin.

Nola saihestu lapurreta bat establezimenduan

  • Jar itzazu ixteko sistema ziurrak, baina larrialdirik gertatuz gero pertsonak irtetea ahalbidetzen dutenak.
  • Instala ezazu kanpotik ikus daitekeen zaintza sistema bat.
  • Itxi aurretik egiazta ezazu aretoaren barruan ez dela inor geratzen.
  • Konekta itzazu alarma sistemak.
  • Eduki itzazu fatxadako argiak piztuta ixteko orduan, sarrailak eta pertsianak manipula ditzaten eragotziko duzu.
  • Establezimenduak aukera ematen badu, sarreran txirrina edo irekitzeko kontrola jartzea komeni da.
  • Alarma isileko pultsadorea jartzea komeni da.
  • Baliteke komeni izatea kamerak jartzea, zaintza errazteaz gain erasotzeko asmoa ken baitezake horrek.
  • Salgai dauden artikuluei babes sistemak jartzea komeni da.
  • Ez da komeni azken ordura arte itxarotea kutxa egiteko, hobe da egitea jendea oraindik lanean ari denean, eta publikoaren ikusmenetik kanpo.
  • Dendaren ezaugarrien arabera, baliteke komeni izatea irekitzeko sistema kodifikatu eta geroratua duten segurtasun kutxak jartzea, eta ikusteko moduko leku batean adieraztea establezimenduko langileek ez dutela hori irekitzerik.
  • Ebakuazio plano bat jartzea komeni da, beharrezkoa bada, suhiltzaileek edo Udaltzaingoak esku hartzea erraztuko baitu.

Zer egin lapurretarik izanez gero

  • Ohartarazi berehala Udaltzaingoa, eta helbide zehatza eta telefono bat adierazi.
  • Beharrezkoa bada, eska ezazu laguntza medikoa 112 larrialdietarako telefonoan.
  • Ez ezazu ezer ukitu, Udaltzaingoaren ikerketa zailduko baitzenuke.
  • Ez iezaiozu inori sartzen utzi lapurreta izan den lekuan.
  • Ez hartu jarrera heroikorik, pertsonen segurtasuna da garrantzitsuena.
  • Errepara iezaiezu erasotzailearen ezaugarriei: adina, garaiera, ilearen kolorea, azentua, janzkera, norantz egin duen ihes eta abar.
  • Informazioa zenbat eta zehatzagoa izan, handiagoak izango dira gaizkilea aurkitzeko aukerak.

Web orrialde honetan erakutsitako informazioak zeure informazio-beharrak betetzen ez baditu, eskatu behar dituzun argibideak Herritarren Postontziaren bidez.