Adineko pertsonak zaintzen dituzten familiei laguntzeko programa
Zertarako balio du?
Adineko pertsonak zaintzen dituzten familiei laguntzeko programak familia zaintzaileei jardun horretan laguntzeko asmoa du; adinekoa familiartean zaintzen jarraitzerik izan dezaten ahalbidetzen du, ahaliketa baldintzarik hoberenetan, eta familia zaintzaileek edo hori osatzen duten kideek izan ditzaketen disfuntzioei aurre eginez.
Pertsonak zaintzen dituzten pertsonentzako gida 
Helburuak
- Adineko pertsonen arretan familiek eta zaintzaile informalek betetzen duten zeregin garrantzitsuaren aitorpena sustatzea.
- Adinekoak beren kargura dituzten pertsonei familia bizitza, laneko bizitza eta bizitza soziala bateratzeko aukera ematea, adinekoak ohiko ingurunean jarrai dezan.
Programak bi atal ditu: arnasa hartzeko zerbitzuak eta programa psikosozialak.
-
ARNASA HARTZEKO ZERBITZUAK beretzako denbora izateko aukera eskaintzen diete adineko pertsona zaintzen dutenei, horrek dakarren gainkarga fisiko eta psikologikoa arinduz. Baliabide hauek osatzen dute:
- Laguntza eta zaintza profesionala: zaindu behar den pertsonaren etxebizitzan bertan -edo ospitalean beharrezkoa bada- gizarte laguntzaileek ematen duten laguntza; egoera konkretuetan laguntzen zaio adineko pertsonari, zaintzaileek egiteko hori familia, lan edo gizarte bizitzarekin bateratzerik izan dezaten.
- Asteburuetarako eguneko zentroa: asteburuetan adinekoen beharrizan pertsonalak betetzeko arreta integrala eskaintzen du, egunez. San Prudentzio eguneko zentroan ematen da laguntza hori.
- PROGRAMA PSIKOSOZIALETAN hainbat baliabide eskaintzen da:
- Informazio eta formazio-jarduerak: formatu ezberdinetan (hitzaldiak, mintegiak, lantegiak eta beste) familia zaintzaileentzat interesgarri izan daitezkeen gaiak lantzen dira (legeria, adinekoen eboluzioa, zaintzeko eta nork bere burua zaintzeko estrategiak, eta abar).
- Elkarri laguntzeko taldeak: senitartean adinekoak zaintzen dituzten pertsonek osatuak. Zaintza prozesuan sostengua, aholkua, babesa eta laguntza jaso eta emateko balio dute saioek, profesional batek gidaturik.
- Arreta psikosoziala, banakoentzat edo familiarentzat: psikologo batek pertsona edo familia zaintzailearekin esku hartzen du, horien estresa gutxitzeko eta baliabide instrumental eta emozionalak eskaintzeko, zaintza eta autozaintza hobetu eta orekatze aldera eta, beharrezkoa bada, senide guztien artean erantzukidetasun eta inplikazio jarraibideak ezartze aldera.
- Zaintzaileen topaketak: taldeko esku-hartzeak dira, puntualak eta gutxi irauten dutenak, formatu ezberdinetan: kafe-tertuliak, bisita gidatuak, proiekzioak... erantzukidetasuna eta zaintzan sortzen diren emozioen komunikazio eta kudeaketa lantzeko zein zaintzaileei esperientzia atsegingarriak sentiarazteko.
Nortzuk dira bere hartzaileak?
Gasteizen erroldatuta egonik, familia giroan 65 urtetik goragoko pertsonak zaintzen dituztenak.
Non eskatu ahal dut informazio gehiago?
Adinekoen Zerbitzuan eskatu behar da hitzordua (945 161 356 telefonoan), edo bizilekuari dagokion Oinarrizko Gizarte Zerbitzuan.
Zure iritziak axola digu
Nahi baduzu, iruzkinak egin ditzakezu.
Nahitaezkoa da identifikatzea.