CEA: Ingurugiro Gaietarako Ikastegia

Edozein erakundek, elkartek, taldek edo banakakok landareak jaso ahal izango ditu bertako landareen baso mintegian, Olarizuko baratzeetan, landareak doan eskainiz CEAk urtero antolatzen duen kanpainaren baitan.

Ekimen honen helburuak honako hauek dira:

• Ingurumenarekiko begirunea sustatzea landare espezie autoktono nagusien ezagutzaren bidez (identifikazioa, garrantzia eta erabilgarritasuna).
• Herritarrek ingurumenaren kontserbazio eta hobekuntzan parte har dezaten bultzatzea, landare autoktono hauekin ohianeztatze txikiak edo lorategi apainketak eginez.
• Landareak modu ekologikoan landatu eta zaintzeko tekniken inguruko oinarrizko ezagutza sustatzea.

Hasteko, jendeak eskaera orria bete eta landareak hautatu behar ditu. CEAk aholkularitza zerbitzu bat izango du landareen inguruko informazioa emateko: zein espezie botaniko erabil daitekeen, zein diren beren ezaugarriak eta landatu nahi diren tokirako egokiak diren ala ez. Honez gain, laborantza ekologikoari eta landatze teknikei buruzko azalpenak emango dira. Azkenik, eskatzaileak bere landareak jasoko ditu.

Kanpaina hau bertako landareen baso mintegian egingo da (Olarizuko baratzeetan), 2007ko abenduaren 3tik 2008ko otsailaren 29ra, Gabonetan eta jaiegunetan salbu. Landareak jasotzeko ordutegia astelehenetik ostiralera izango da, 16:00etatik 17:30era. Kanpainan parte hartzeko, hitzordua eskatu behar da aurretiaz azaroaren 26tik aurrera, 945 162696 telefonora deituz.

Urtero katalogo bat argitaratzen da ekimen honetan eskaintzen diren espezieen zerrendarekin. Katalogoa ondoko helbidetik deskargatu daiteke (PDF, 1 MB):
http://www.vitoria-gasteiz.org/anilloWeb/documentos/1595eu.pdf

Beste urte batez, CEAk "Adopta ezazu zuhaitz bat eta hazi berarekin" kanpaina antolatu du. Aurten ere kanpainaren helburua Eraztun Berdeko beste espazio bat leheneratzea izango da, seguraski Zadorra ibaiaren ingurukoren bat. Beti bezala, kanpainak bi hartzaile mota izango ditu: eskoletako ikasleak eta herritar guztien multzoa. Aurtengoan, eskola mailako kanpainan 17 ikastetxetako 1.000 ikaslek hartuko dute parte, eta jende ororentzako kanpainan 2.000 landare banatuko dira.

Jende ororentzako landare banaketa Plaza Berrian egingo da, abenduaren 20an (osteguna), Gabonetako nekazaritza azokarekin batera, goizeko 10etatik arratsaldeko 3etara.

Ekimen honen asmoa herritarrak erabilera publikoko lorategien diseinu, mantenimentu eta zainketan inplikatzea da. Bigarren fasea azaroaren hasieran jarri zen martxan. Jardueraren bultzatzaile nagusia Vitoria-Gasteizko Udala da, eta bertan Mitxoleta elkarte botanikoak, Hiri Paisaiaren Bulegoak, Hegoalde gizarte etxeak eta CEAk hartzen dute parte.

Bigarren fase honetan parte hartzaileen jomuga Trikitixa kalean (Txirula eta Txalaparta kaleen artean) dauden bi lorategiren diseinu eta mantenimendua izango da. Lan honetan Udaleko zerbitzuen laguntza izango dute prestakuntzaren, tekniken zein diruaren aldetik.

Lanekin hasteko eta lorategien hasierako egoera hobetzeko, pinu tratatuz egindako zurezko kanpo estalki bat jarri da hormigoizko kanpoko perimetroa estaltzeko. Bestalde, 72 lore aska jarri dira lorategien gainazala egokitzeko eta lorategien barruan landatuko diren landare usaintsuak, apaingarriak eta sasoiko loredunak jartzeko.

Jarduera hau Olarizuko baratzeen esparruan egiten diren ekintzak ezagutzera emateko asmoz sortu zen. Ibilbide, hitzaldi eta lantegi sorta baten bidez, jendearentzat interesgarriak izan daitezkeen hainbat gai azalduko dira, hala nola, etnografia, frutagintza ekologikoa, fruta eta barazkien artisau kontserba, sendabide fitoterapeutikoen prestaketa eta aplikazioa, lorategietarako landareak, edo Arabako baso autoktonoak.

Jarduerak asteartero egingo dira (jaiegun eta oporretan salbu), 16:00etatik 18:00etara, Olarizuko baratzeetan. Lantegi bakoitzean 15 lagunentzako tokia dago, eta parte hartzeko aukera izena ematen den ordena berean emango da. Lantegiak doanekoak dira.

Hiruhileko honetako egitaraua ondokoa da:

• Urriaren 30ean eta azaroaren 6, 13, 20 eta 27an: Landare kontserbak.
• Abenduaren 4, 11 eta 18an eta urtarrilaren 8an: Lorategiko landare eder eta erabilgarriak.
• Urtarrilaren 15ean: Bitxikeria botanikoak.
• Urtarrilaren 22 eta 29an eta otsailaren 5 eta 12an: Lore lehorrak.

Informazioa eta izen ematea, 945 162696 telefonoan.

"Periscopio, prentsa-argazkilaritzari begira" izeneko jaialdi hau urriaren 18an inauguratu zen eta bere baitan aldibereko hainbat erakusketa programatu dira Vitoria-Gasteiz hiriko hainbat lekutan.

Aurten CEA "Ummah, Islam pluralaren irudiak" erakusketa babesten ari da. Erakusketako argazkiek Islamaren bestelako ikuspegia ematen dute, musulmanen komunitateaz jendeak duen irudi estereotipatutik urruti. Komunitate honen egunerokotasuna eta gizarte aldea ikus daitezke, hedabideek erakusten duten eta ikustera ohitu garen aurpegi odoltsuena bazter utziz.

Informazio gehiago:
http://www.vitoria-gasteiz.org/w24/eu/html/20/624.shtml

Caja Madrid-en Gizarte Ekintzak babesturik, "Planeta Amazonia" bizitza amazonikoari buruzko erakusketa da. Nahiz eta erakusketa zientifikoa izan, edozeinek ulertzeko moduko hizkera darabil. Kontzientziazio esparru bat ere izan nahi du, jendea ingurumenaren babesak duen garrantziaz ohar dadin eta munduko bioaniztasunaren %50 biltzen duen leku honen garapen jasangarriaren aldeko apustua uler dezan, are gehiago biopirateria, espezieen trafikoa edo baso soiltzea bezalako mehatxuak jasaten dituen aro honetan.

Erakusketa hau Olarizuko etxaldeko erakustaretoan bisitatu ahal izango da 2007ko azaroaren 30etik 2008ko urtarrilaren 6ra.

Pasa den urrian TVEko La 2 telebista kateak ekoizten duen "Víve la Vía" saioaren bigarren denboraldia hasi zen, lehen denboraldiak ikusleen aldetik harrera beroa jaso ondoren.

Saio honetan oinezkoen eta txirrindularien bide gisa zaharberritu diren trenbide zahar nagusiak bisitatzen eta erakusten dira. Saioaren kapitulu bat Bergara-Lizarra trenbideari buruzkoa izango da, hain zuzen Murieta (Nafarroa) eta Vitoria-Gasteiz (Araba) artean dauden 48 kilometroei buruzkoa. Kapitulu hau abenduaren 4an emango da, 22:45ean.

Lan honek Arabako Foru Aldundiaren, Lizarrerriko Partzuergoaren eta Vitoria-Gasteizko Udalaren laguntza izan du.

Erregimen irekian dauden hogeita lau presok ingurumenaren aldeko ekintza bat egin zuten abuztuan. Lagun hauek Arabako SIDAren aurkako Batzordeak kudeatzen dituen etxebizitzetan bizi dira. Jarduera honetan, presoek hondakinak eta zaborra bildu zuten Eraztun Berdeko hainbat parkeetan eta udalerriko zenbait ibaitan: Alegría, Errekaleor, Batán eta Zadorran, azken honetan Eskalmendi eta Abetxuku arteko tartean eta Aztegietako zubiaren inguruetan.

Guztira 7.000 kilo hondakin baino gehiago bildu ziren, eta kontrolik gabeko isurketa guneak aurkitu ziren zenbait ibilgutik hurbil. Gune hauek geroago, tresneria egokiagoarekin biltzeko utzi ziren. Parte hartzaileei esperientzia hau oso positiboa iruditu zaie eta, beraz, SIDAren aurkako Batzordearen ekimen honen gizarte eta hezkuntza eraginkortasuna nabarmen geratu da.

Abuztuan eta irailaren lehen hamabostaldian zehar ikerketa bat egin da udazkeneko migrazioetan Salburua erabiltzen duten hegazti txikiak aztertzeko. Ez da ikerketa hau egiten den lehen aldia, azken bost urteetan urtero-urtero egin baita. Jarduera honetan hegaztiak minik gabe harrapatzen dira sare bereziekin, identifikazio eraztun bat jartzen zaie eta zenbait datu fisiko hartzen dira (sexua, adina, etab.). Ondoren askatu egiten dira ingurune naturalean. Ikerketa hauei esker, hegaztien migrazio bideen ezagutza osatzen da, beren joan-etorrietarako garrantzitsuak diren tokiak identifikatzen dira, gazte eta helduen arteko erlazioa bezalako datu demografikoak ezagutzen dira, etab.

Aurten eraztun jartze kanpainak 30 jardunaldi iraun du, eta denbora horretan zehar 51 espezietako 4.452 ale harrapatu dira. Horietatik 529k gure taldearen eraztuna jarrita zeukaten jadanik, batzuk aurreko urteetan. Horrez gain, 18 hegaztik beste herrialde batzuetako eraztunak zeuzkaten (Belgika, Holanda, Suedia, Frantzia, Txekia eta Erresuma Batua). 12 alek Espainiako beste toki batzuetako eraztuna zeramaten.

Aurreko urteekin alderatuz, aurten askoz txori gehiago harrapatu da, gehien bat harrapaketa ahalegina handiagoa izan delako eta eraztun jartze guneak dibertsifikatu egin direlako. Kontuan izan behar da aurten Arkautiko urmaelean lan egin ahal izan dela; 2006an hori ezinezkoa izan zen, hegazti gripeak sortutako alarma indarrean baitzegoen eraztun jartze sasoian.

Bestalde, ur-benarrizaren harrapaketak (7 ale harrapatu dira) mantendu egin dira aurreko urteekin alderatuta, eta beraz, sendotu egin da iraungitze arrisku larrian dagoen hegazti honen migrazioa babesteko Salburua gune garrantzitsua dela dioen tesia.

Berriro ere, aurten boluntarioen parte hartzea sustatu da jarduera honetan. Espainiako toki askotatik etorritako 32 lagunen lana oso baliotsua izan da talde ikertzailearentzat. Jarduerak iraun duen denboran zehar pertsona hauek Otazuko etxe batean ostatatuta egon dira, eraztun jartzeko gunetik oso hurbil. Etxe hau Udaleko Erdu Agentziaren laguntzari esker erabili ahal izan da.