Index Anillo Verde de Vitoria-Gasteiz

Olarizuko parkea egokitzea

Hasierako egoera
Laurogeita hamarreko hamarkadaren erdialdean Olarizuko parkeak larreak hartzen zituen soilik, eta Vitoria-Gasteizko Udaleko Parke eta Lorategien Zerbitzuak kudeatzen zuen beste edozein hiri parke bezala, horixe izateko sortu baitzen hasieran. Ingurunean nekazaritza zen nagusi, eta bidezidor ugari zegoen hiria, herriak eta mendiak lotuz. Eremuaren egoera, oro har, ez zen guztiz ona, hiria hain gertu egonik, jendeak eta ibilgailuek kontrolik gabe jotzen baitzuten hara. Kontrolik gabeko jarduera hauek bertako ingurumena eta paisaia hondatu eta hainbat arazo sortzen zituzten.

Egokitze prozesua
1995ean Olarizuko parkea Eraztun Berdean sartu zen. Orduz geroztik egin diren egokitze lanek honako helburu hauek izan dute: ingurunea egokitzea, erabilera publiko ordenatua bultzatzea eta, bereziki, ingurumenaren inguruko prestakuntza eta heziketa sustatzea.

Hona hemen parkean egin diren lanak:

• Olarizuko etxaldea eraberritzea eta egokitzea, Ingurugiro Gaietarako Ikastegiaren egoitza izan dadin. Eraztun Berdeko Informazio Zentro nagusia bilakatu da, eta askotariko erabilera dituen gunea da, bere xede nagusia ingurumenari buruzko heziketa eta prestakuntza ematea delarik. Hainbat ekipamenduz horniturik dago: gelategia, erakusketa aretoa, Ingurumen Informazio eta Dokumentazio Zentroa...
• Hegoaldean beste esparru bat sortu da, Olarizuko baratzeak alegia. Gune berri hau 5.877 metro koadro labore lur eta larre hondatu okupatuz sortu zen. Hainbat sailetan banaturik dago, eta barruan hainbat eraikin eta instalazio du, baratzezaintza eta nekazaritza ekologikoei buruzko heziketa jarduerak egiteko: mintegiak, baratze ekologikoak, arboretuma, urmaela, kristalezko berotegia....
• Larreak egokitzea egonaldietarako gune gehiago sortzeko
• Sarbideak, bideak eta seinaleak hobetzea
• Landatzeak
• Guneak eta ekipamenduak mantentzeko lan integralak

Etorkizuneko planak
Etorkizunean honako lan hauek egin nahi dira:

• Parkea zabaltzea. Lur gehiago erantsirik, baratze ekologikoetarako sailak gehitu, udal mintegiak bertan jarri, eta arboretum bat sortu nahi da, hots, hainbat landare komunitatetako espezieen bilduma bat. Ekimen horiekin guztiekin, Olarizuko parkea landareen munduari buruzko heziketa gune bihurtzea lortu nahi da
• Olarizuko muinoaren ingurumena hobetzeko eta oneratzeko lanak, batez ere inguru aldapatsuenetan jasaten duen hondamena konpontzeko
• Lorategi botanikoa sortzea