Index Anillo Verde de Vitoria-Gasteiz

Eraztun Berdeak oso tamaina handia du, bai hartzen duen eremu zabalagatik zein haren helburu eta zeregin ugariengatik. Hori dela eta, sortzen hasi eta 15 urte igaro ondoren proiektua, hasierako aldietan ez badago ere, oraindik bukatzetik urrun dago.

Ikuspuntu fisikotik proiektua oso aurreratua dago; izan ere, hainbat gune dagoeneko finkatuta dago, nahiz eta oraintik hondaturiko gune batzuk oneratu behar diren. Etorkizunean 1.010 hektarea inguru izango ditu.

Haatik, Eraztun Berdera iristeko baldintzak oraindik zailak dira toki batzuetan, eta parkeak elkarrekin lotzeko sarea zein hiriarekin eta mendiekin lotzeko sarea ez dago erabat eratua.

Erabilera publikoari dagokionez, nahiz eta Eraztun Berdera joaten direnak, oro har, pixkanaka gehitu egin diren, gune batzuetan bisitak "gutxi samar" edo "urriak" dira eta kopuru hauek hobetzeko ekintzak egin behar dira lehentasunez.

Egiteko asko dagoela ahantzi gabe, etorkizuna ilusioz beterik dago, ideiaz, proposamenez eta ekimenez beterik, gune honen izaera fisikoa eta soziala finkatzeko; izan ere, Eraztun Berdea lurraldearen kudeaketa integratuaren eredu izatea nahi da, erabilera publikoa, hirigintza erabilera eta balio naturalen kontserbazioa uztartzea posible dela erakusteko.

Helburuak, erronkak eta proposamenak

Epe labur eta ertainean helburua Eraztun Berdearen izaera fisiko eta funtzionala finkatzea da, eta horretarako honako ekimen zehatz hauek gauzatu behar dira:

• Finkatzeko fasean diren guneen zabaltze eta egokitzea bukatzea
• Proiektuetan dauden guneak, loturak eta korridoreak oneratu eta egokitzea
  Parke berriak egokitzeko egingo diren lanez gain, hiri inguruko guneak bata besteari lotzeko proiektua dago; hala, Eraztun Berdea funtsezko korridore ekologikoa izango da udalerriko bi sistema natural nagusien artean: Gasteiz mendien eta Zadorra ibaiaren artean, hain zuzen. Horiek, era berean, bigarren eraztun natural zabalago bati (Badaia eta Arrato mendilerroak, Gorbeiako parke naturala eta Zadorrako urtegiak) loturik egongo dira
• Sustapena, heziketa eta erabilera publikoak areagotzea, ingurumenari buruzko jarduketa eta ekipamendu gehiagoren bidez
  Hona hemen horren inguruko ekimen batzuk: Salburuko parkean Ataria natura interpretatzeko gunea eraikitzea eta Olarizun lorategi botanikoa sortzea.
• Gizarteko eragileak eta, oro har, biztanle guztiak Eraztun Berdearen kontserbazioari atxikitzea
  Ingurumeneko boluntarioen sistema bat abian jarriko da, eta egun den ingurumen heziketako jardueren programa zabalduko da. Datozen urteetako ildo estrategikoen artean parkeen balioak ezagutaraztea dago, jende guztiari, oro har, zein zientzialariei, kontserbazionistei...
• Guneen eta erabileren etengabeko segimendua egitea, eta guneak gehiago ezagutzea
  Datozen urteetan Salburua zientzia ikerketako eremutzat finkatu nahi da, eta gainerako parkeetan azterketa eta ikerketa lerroak abian jarriko dira, parkeok ezagutzeko eta kudeatzeko lagungarriak izan daitezen
• Eraztun Berdea antolatzeko eta kudeatzeko laguntza tresnak hobetzea
  Eraztun Berdea zaintzea eta babestea ziurtatzeko moduko lege figurak aplikatzea aztergai dago
• Hirigintza lanak baldintzapean jartzea eta mugatzea
  Aurreko puntuari loturik, Eraztun Berdeak azpiegitura eta auzo berrien diseinu eta sorrera baldintzatu beharko du hiriaren hedatze prozesuetan. Urbanizatze berri hauetan ingurumen irizpideak eta Eraztun Berdeko ingurunea, haren izaera eta funtzioak errespetatzeko moduko irizpideak sartu beharko dira

Azken eguneratzea: 2007/10/03