Index Anillo Verde de Vitoria-Gasteiz

Eraztun Berdea eratzeko ideia XX. mendeko 90eko hamarkadaren hasieran sortu zen, Vitoria-Gasteizko ingurumariko arazoei eta eremu horrek, oro har, zuen degradazio egoerari konponbide bateratua eman ahal izateko.

Proiektua abian jarri zenean baziren hiriko kanpoaldean ekologiaren aldetik balio handia zuten eremuak, Armentiako eta Zabalganeko basoak kasu (higadura arazoak edo suteak pairatzen bazituzten ere, Vitoria-Gasteizko hiri eta industria zabaltzeari aurre egitea lortu zuten); bestalde, gelditzen ziren naturguneen biziraupen hauskorra mehatxatzen zuen hainbat legar hobi, zabortegi eta bestelako gune hondatu zegoen. Inguru honetako baldintzak kaskarrak ziren bai bertan egoteko bai inguruetatik paseatzeko; finean, hiria eta bere landa eremua lotzeko oztopo fisiko eta soziala zen.

Arazo hauei aurre egiteko eta hain modu nabarmenean gutxietsita zeuden gune hauek oneratzeko asmoz, Vitoria-Gasteizko Udaleko Ingurugiro Gaietarako Ikastegiak eskala handiko proiektu bat martxan jartzea erabaki zuen. Proiektu horrek hiriko kanpoalde guztia barne hartuko zuen, eta konponbidea emango zien bai esku hartze gehien jasaniko guneei bai naturguneei.
Funtsean, helburua hiri inguruko gune berdeen sare bat osatzea izan zen. Halaber, 1986ko Hiri Antolamenduko Planak ideia hori babestu eta gorpuztu zuen. Izan ere, plan horrek proposatu zuen hiriko gune berdeen sistema hiringuruko eremuetara ere zabaldu behar zela.

Helburuak eta estrategiak

• Hiri inguruko naturguneak zaintzea eta lehengoratzeko moduan dauden beste eremu batzuk ekologiaren aldetik oneratzea sustatzea. Horrela, hiriaren inguruan natur continuum bat osatuko da
• Hiri inguruko parkeak hiriko egituran txertatzea eta, aldi berean, ingurune naturalari lotzea, Vitoria-Gasteizko eremu berdeen eta naturguneen arteko lotura fisikoak eta ekologikoak hobetuz
• Hiri inguruko guneak egokitzea haien erabilera publikoa sustatzeko. Horrekin, batetik, estalpetik kanpoko aisialdi tokiak izateko hiritarrek egiten duten eskaerari erantzun nahi zaio, eta, bestetik, hauskorragoak diren naturguneen gaineko presioa leundu nahi da
• Eremu berri horien lehengoratzea eta egokitzea ingurumenari buruz sentikortzeko eta hezteko aprobetxatzea, betiere, hiritar guztiek ingurumena zaintzen parte har dezaten asmoarekin

Azken eguneratzea: 2007/10/02