Index Anillo Verde de Vitoria-Gasteiz

Eraztun Berdea eremu hondatuak lehengoratzeko ingurumen proiektua da. Halaber, hezkuntza eta gizarte proiektua ere bada, erabilera publikoa eta ingurumenaren gaineko hezkuntza sustatzen dituelako. Baina, funtsean, lurralde eta hiri garapenerako proiektua da, hiriarentzako eta hiritarrentzako sortua.

Ingurugiro Gaietarako Ikastegia (CEA) da Eraztun Berdearen ideiaren, diseinuaren eta gauzatzearen erakunde arduraduna. Dena den, ekimen hori gauzatzen laguntzen dute -teknika, finantza, administrazio eta politika alorretan- bai beste udal sailek bai beste erakunde pribatu zein publiko batzuek, hala nola Europar Batasunak, Fedenaturrek, Espainiako Ingurumen Ministerioak, Eusko Legebiltzarrak edo Gasteizko eta Arabako Aurrezki Kutxak.

Proiektuaren garapenaren mugarriak:

• 1992: Lehenbiziko lanak Eraztunean. Zabalganeko legar hobiaren oneratze ekologikoa
• 1996: Ingurumen hezkuntzari lotutako lehenbiziko jarduerak. 1.400 parte hartzaile
• 1999: Eraztun Berdea Vitoria-Gasteizko Hiri Antolamenduko Planean sartu zen
• 2000: Espainiako Habitat batzordeak "Best" Jardunbide Egoki gisa hautatu zuen Eraztun Berdea
• 2002: Ramsarreko Hitzarmenak nazioarteko hezegune garrantzitsu izandatu zuen Salburuko hiri inguruko parkea
• 2002: Espainiako Ingurumen Ministerioak Zadorra ibaia hidrologiaren aldetik egokitzeko eta ingurumenaren aldetik oneratzeko proiektua finantzatu zuen, betiere, Zadorrako ibai parkeari lotuta
• 2004: Eraztun Berdean zehar doazen ibilbideak eta hirizidorrak egokitzeko proiektua egin zen, erabilera publikoa sustatzearren
• 2007: Salburuko hezeguneen interpretazio zentroaren (Ataria) eraikuntza

Eraztun Berdearen proiektua "BEST" gisa izendatu zuten Jardunbide Egokien Nazioarteko III. Lehiaketan, Dubain. Halaber, Tercer Catálogo Español de Buenas Prácticas. Ciudades para todos katalogoan nabarmendu dute. Katalogo hori Sustapen Ministerioak eta Espainiako Probintzien eta Udalerrien Federazioak (FEMP) argitaratzen dute, eta Vitoria-Gasteizko Eraztun Berdea han azaltzearen arrazoia da "hiritarren bizi baldintzak hobetzen dituela garapen jasangarriaren ikuspegitik".

Azken aipamen hori da proiektu horren benetako garrantzia eta esanahia laburbiltzen dituena. Izan ere, bai ideiak eta diseinuak, bai parke guztietako kudeaketak eta mantentzeak oinarrizko jasangarritasun printzipioak dituzte abiapuntu.

Azken eguneratzea: 2007/10/02

Hiperestekak

• Jardunbide Egokien lehiaketa, Dubain 2000an antolatutakoa