Index Anillo Verde de Vitoria-Gasteiz

Armentiako parkearen eta Zadorra ibaiaren arteko konektagarritasuna hobetzeko proiektua

Helburuak
Proiektuaren asmoa Eraztun Berdeko mendebaldeko berdeguneak konektatzea da, beren jarraitutasun fisiko eta ekologikoa bermatuz eta, hortaz, bere funtzionamendu egokia eta etorkizuneko mantenimendua. Hain zuzen, Armentiako basoa (hegomendebaldean dagoena), Zabalganeko parkea (mendebaldean), eta Zadorra ibaia (iparmendebaldean) konektatu nahi dira. Proiektuak zenbait gune hedatu eta hobetzea ere jaso du.

Parkeen arteko trantsizio guneak, Vitoria-Gasteiz mendebaldetik jasaten ari den hiritartzearen ondorioz, hiriari eta azpiegiturei lotuta ageri dira. Azken hirigintza sektoreen exekuzioa amaituta, hiria Zabalganeko eta Armentiako parkeen ateetara iritsi da eta, beraz, naturgune hauek lotzeko auzo berriak eta errepide asko gainditu behar dira.

Hortaz, helburua eremu hauek ekologikoki leheneratzea da, bai eta beren integrazio paisajistikoa eta erabilera publikora egokitzapena. Oinezkoen eta txirrindularien joan-etorriak modu seguruan egin daitezen ahalbidetzeko, proiektuak garrantzi berezia eman dio galtzaden gurutzaguneei, automobilek abiadura murriz dezaten eta zirkulazioak eragiten duen zarata maila txikitzeko.

Zonak
Lan hauek 103,5 hektareako azalera baten gainean egingo dira, Armentiako parkearen sarreratik (Eskibelerako bidean), Zadorra ibairaino (Zurrupitieta kaleak eta Oto hiribideak bat egiten duten tokian), Zabalganeko parkea barne hartuz. Lanen eremuaren hedadura handia eta konplexutasuna ikusirik, proiektuaren egikaritzea hainbat fasetan egitea aurreikusi da, ondoko zonifikazioa erabiliz:

• 1. ZONA: Armentiako parkeak Eskibelgo errepidean duen sarreraren eta N-102 errepidearen arteko tartea da. Azken errepide honen zeharkatzea zaldain baten bidez konpontzea planteatu da.
• 2. ZONA: N-102 gaineko zaldainaren eta Zabalganeko parkeko hegoaldearen artean dagoen zatia da. Ibilbide honetan Zabalganeko basoaren hegoaldean, hiriaren ertzean, jada zuhaitzez landatu diren espazioak integratuko dira.
• 3. ZONA: Zabalganeko parkeari dagokiona da, eta bi fasez osaturik egongo da:
  - I. FASE: parkearen egungo espazioetan egin beharreko lanak barne hartzen ditu.
  - II. FASE: parkea inguruetan dituen espazioetara hedatzeko ekintzak barne hartzen ditu. Lursail hauek bi dira: parkean barneratzen den soroa eta ekialdetik muga egiten duen zerrenda.
• 4. ZONA: Zabalganeko parkearen iparraldeko irteeratik Zadorra ibaira iristen den tarteari dagokio.

Azken eguneratzea: 2007/10/05

Hiperestekak

• Armentiako parkearen eta Zadorra ibaiaren arteko konektagarritasuna hobetzeko proiektua 4. zonan, Zabalganeko parkearen eta Zadorra ibaiaren artean