Index Anillo Verde de Vitoria-Gasteiz

Salburuko parkearen eta Alegria ibaiko parkearen arteko oinezkoen eta txirrindularien pasealekuaren egokitzea

Helburuak

• Salburuko parkearen, Ataria eraikinaren eta Alegría ibaiko parkearen artean oinezkoentzako eta txirrindularientzako konexioa sortzea, eta korridore ekologiko gisa funtziona dezan ere ahalbidetzea.
• Fernando Buesa Arena pabilioiko aparkalekuaren eta Salburuko parkearen artean ekotono bat eratzea, natur osagaiari hiri osagaiari baino garrantzi handiagoa emanez.
• Oso urbanizatua dagoen ingurune bat (Buesa Arenako aparkalekua eta Betoñuko industrialdea) eta kalitate ekologiko eta paisajistiko altua eta naturaltasun handia daukan naturgune bat ikuspuntu paisajistikotik integratzea.
• Ingurunearen aurkako jarduera oldarkor ugariren gertaleku den gune hiritar baten eta Salburuko parkearen arteko mugagune bat konfiguratzea, bisitarien fluxuak Ataria interpretazio zentrora kanalizatzeko eta parkera kontrolik gabe eta modu sakabanatuan sartzea eragozteko.
• Jada burutu diren 15. sektoreko hiritartze lanak gainbegiratzea, hasierako konponbidea egungo beharretara moldatuta dagoen ikusteko, programatuta dauden ekipamenduak (Vital eraikina, Ataria eta Baskoniaren kirol hiria) eraiki ondoren.

Lanen deskribapena
Lanak 2007ko amaieran egin ziren Alegria ibaia eta Salburuko parkea lotzen dituen pasabidean, hain zuzen Zurbaoko atearen eta Santo Tomás errekaren ibilgu zaharraren gainean dagoen zubiaren artean. Proiektuaren zati bat Salburuko 15. sektorearen hiritartzearen esparruan egin zen.

Gune honek ibai izaera nabarmena dauka, Santo Tomás eta Errekaleor errekak Alegría ibaira desbideratzeko ibilgutik oso hurbil baitago. Hala ere, hiritartze eta azpiegitura lan ugari jasan dituenez eta lurrak maila freatikotik pixka bat altxatuta daudenez, ibaiak eragiten dituen baldintza ekologikoak murritzak dira. Baldintza hauek desbideratze ibilguaren alboan dagoen terrazan soilik somatzen dira, hau da, lanak egin ziren eremuaren ekialdean, Zurbaoko zubitik Larreganeko ibiraino dagoen zatian.

Proiektuan ingurunearen moldaketa orografikoa gauzatu zen, betiere paisaia baldintzei kasu eginez. Zehazki, harrizko murruen ilarak eta lurrezko betelanak egin ziren, oinezkoentzako eta txirrindularientzako bideak sortu ziren, jada existitzen ziren bideak moldatu eta zabaldu ziren, landare lurra ekarri eta hainbat gune estaltzeko erabili zen, larreak erein ziren eta zuhaiskak eta zuhaitz handiak landatu ziren.

Zonifikazioa
Jarduera hau lau zonatan egin zen:

• 1. zona. Desbideratze ibilguaren paralelo dagoen ibai terraza, Zurbaoko zubiaren eta Larreganeko ibiaren artean. Lehendik existitzen zen eta neurri handiko zuhaitzak dituen plataforma lau bat da.
• 2. zona. Lehen zonaren paralelo dagoen plataforma, Fernando Buesa Arena pabilioiaren alboan. Gune honetatik oinezkoen eta txirrindularien bideak egin ziren. Horrez gain, baso landaketa sendoa egin zen eta neurri handiko zuhaitzak jarri ziren bideetan zehar. Vital eraikinetik hurbil mendixka bat eratu zen landare lurrak erabiliz. Muino hau harrizko murruekin mugatu zen.
• 3. zona. Larreganeko ibiaren eta Vital eraikinaren artean bidegurutze bat osatu zen, bai Salburuko parkeko bihotzera joan ahal izateko Larreganeko ibia gurutzatuz, bai Salburuko parkeko interpretazio zentroa den Ataria eraikinera joateko, bai Alegría ibaiko parkera hurbiltzeko. Landare lurrez osatutako eta harrizko murruez mugatutako hainbat muinotxo sortu ziren, baso landaketa intentsiboz eratutako bi masa egin ziren eta neurri handiko zuhaitzak landatu ziren bideetan zehar.
• 4. zona. Santo Tomás errekaren ibilgu zaharraren gainean dagoen zubiaren iparraldean eta Durantzarreko urmaeletik hurbil lursail handi bat dago. Leku honetan harrizko murruak jarri ziren, iparretik hegora ilaran kokatuta. Lehendik existitzen ziren bideen alboetan neurri handiko hainbat zuhaitz landatu ziren eta larreetan heskaiak sortu ziren.

Azken eguneratzea: 2008/06/12