Index Anillo Verde de Vitoria-Gasteiz

Zadorrako parkearen egokitze proiektua Abetxuku eta Gamarra Nagusia arteko tartean

Aurrekariak
Proiektu hau Vitoria-Gasteizko hirigunean Zadorra ibaiaren uholdeen aurkako babes planaren bigarren fasea osatzeko prestatu da. Plana Vitoria-Gasteizko hirigunean Zadorra ibaiak eragiten dituen uholde arriskuak murriztera zuzenduta dago. Plan honen lehen fasea, Gamarra Nagusitik gora egin zena, 2005eko maiatzean amaitu zen. Lehen fasean ondoko lanak egin ziren, besteak beste: uholde ubide bat eraiki zen A-1 autobidearen zubiaren eta Gamarra Nagusiko zubiaren artean, eta ibaiaren ubide naturalaren sekzioa zabaldu zen Gamarra Nagusiko zubitik behera dagoen 80 metroko tarte batean. Lan hauek Zadorra ibaiaren ahalmen hidraulikoa handitzea izan zuten jomugatzat.

Bigarren faseak Gamarra Nagusitik Abetxukuko zubiraino doan tartea moldatuko du.

Helburuak

• Zadorra ibaiaren eurite garaiko hazkuntzak hirigunean eragiten duten uholde arriskua murriztea.
• Ibaiaren eta bere ibaiertzen leheneratze ekologikoa sustatzea.
• Zadorra ibaiaren parkean integratuko den espazio berde bat erabilera publikorako egokitzea, hiriko Eraztun Berdea osatzen duten oinezkoen eta txirrindularien bideei jarraikortasuna emanez.

Proiektuaren deskribapena. Egokitze prozesua
Ondoren, proiektuak jaso dituen ekintzak deskribatzen dira modu laburrean:

• Ubidea egokitzeko lanak. Uholdeentzako ubide artifizial bat proiektatu da Gamarra Nagusiko zubitik behera. Ubide berriak 50 metroko oinarria eta 6H:1B proportzioetako ezpondak izango dituen sekzio trapezoidala izango du eta bere luzera 734 metrokoa izango da. Bere xedea hustutze sekzioa handitu eta tarte honetako uholde maila jaistea da, handik gora uholde arriskua txikiagoa izan dadin.
• Babes lubeten eraikuntza. Zadorra ibaiaren ezkerraldeko uholde ordokian zehar banatutako sekzio sinusoidaldun muinotxoen sorrera, bi helburu betetzeko asmoz: alde batetik hidraulikoa, etorrera aldi luzea duten uholdeetan (500 urte) ur xaflari eusteko, eta bestetik ingurumenekoa, Zadorrako hiribideko ibilgailuen joan-etorriek alboko berdegunean eragiten dituzten ikusizko eta entzunezko inpaktuak ezabatzeko.
• Berdegune baten sorrera ibilguaren eskuinaldean, gaur egun kontrolik gabeko isurketen ondorioz narriatua dagoen espazio baten egokitzapenaren bitartez, eta oinezkoentzako bide baten sorrera.
• Oinezko bideen sarea. Berdegunera sartzeko bideak egokituko dira eta oinezkoen eta txirrindularien erabilera mistoa izango duten bi bide eraikiko dira bi ibaiertzetan zehar. Horrez gain, 2 metro zabalerako bidegorri zati txiki bat sortuko da gorri koloreko asfaltozko aglomeratua erabiliz.
• Aparkalekuak. Zadorra hiribidean dagoen aparkaleku eskasia ikusita, bi espazio erreserbatu dira berdegunean autoak aparkatzeko. Bata Abetxukuko pasabidearen ondoan dago eta automobilentzako izango da soilik, eta bestea, aipatu pasabidearen eta Gamarrako zubiaren artean, autobusak eta automobilak aparkatzeko prestatuko da.
• Pasabideak ur hartuneen eta erretenaren gainean, proiektatutako bideen jarraitutasuna konpontzeko. Ur hartuneen gaineko pasabideetarako zubi brankak proiektatu dira, eta horien gainean aurrefabrikatutako plaka albeolardun harlazuak jarriko dira. Erretenetan 1.000 mm-ko diametroko hormigoizko hodiak jarriko dira, eta hodien muturretan harri lubetak eraikiko dira betetze materialari euts diezaioten hodiaren goiko aldearen eta proiektatutako zoru sekzioaren artean.
• Abetxukuko oinezkoen pasabidea. Jada existitzen den zaldainari luzera handiagoa eman nahi zaio, alde batetik uholde ibarreko puntu honetan sekzio hidraulikoa handitzeko, eta bestetik oinezkoen bide proiektatuak bertatik pasatu ahal izan daitezen ahalbidetzeko. Lan nagusia, Zadorra ibaiaren ezkerreko ertzean zaldain berri bat eraikitzea izango da.
• Arrainentzako eskailera baten sorrera Michelingo presa txikian. Arrain eskailera honek Michelin, Arregui eta Sidenor industrien parean dagoen presaren oztopoa gainditzeko helburua du. Presak ibaiko arrain faunaren migrazio ahalmena murrizten du.
• Ingurumen eta paisaia egokitzea. Ikusizko inpaktua murrizteko landare pantailak landatuko dira, uholde ibarraren ezkerraldean zuhaitz multzoak sortuko dira bertako espezieak erabiliz, eta eskuin ertzeko ibaiertzeko basoa eraberrituko da.
• Hiri altzarien instalazioa. Informazio oholesiak, zurezko bankuak, bizikletentzako euskarriak, argi baliza autonomoak, eta altzairuzko eta zurezko pibotak ibilgailuen sarbidea eragozteko.
• Hari elektrikoen lurperatzea. Zadorra hiribidearen paralelo doan linea guztiz lurperatuko da, eta azpiegitura berria egungo galtzadaren ertzarekiko paralelo jarriko da. Zadorra ibaiaren gainean egun dauden bi gurutzatzeetatik bakarra utziko da, Abetxukuko zaldainetik zintzilik.

Azken eguneratzea: 2008/06/11