Index Anillo Verde de Vitoria-Gasteiz

Eraztun Berdea herritarren artean aisialdiko jarduerak eta naturaz gozatzeko aukerak sustatzeko egokitu da. Haatik, naturgunea izaki, ezinbestekoa da hemen ere bioaniztasuna babestea eta zaintzea.

Jendea hiriaren inguruko parkeetara hurbil dadin sustatzeko seinale egokiak jarri dira, ibilbide sare zabala prestatu da, eta atseden hartzeko eta egonaldiak egiteko guneak egokitu dira. Halaber, parke horiek guztiak ingurumen ekipamenduz hornitu dira; batetik, bisitariei harrera egiteko eta argibideak emateko, eta, bestetik, Eraztun Berdearen hezkuntza eta prestakuntza eskaintza osatzen duten jarduera guztiak gauzatzen laguntzeko.

Zer eskaintzen dio Eraztun Berdeak bisitariari?

• Egonaldi segurua eta atsegina
• Landaretza, fauna, paisaiak, inguruneak eta naturaren eta kulturaren aldetik interesa duen hainbat toki
• Ibilbide eta bidezidor sare zabala oinezkoentzako eta txirrindularientzako
• Eraztun Berdea eta hango parkeak ezagutzea eta gozatzea sustatzeko ekipamenduak eta zerbitzuak

Zer egin daiteke Eraztun Berdean?

• Ikasteko, esperimentatzeko, ezagutzeko... prestatu dugun hainbat ekimen eta jardueratan parte hartzea
• Aire zabaleko kirolak egitea
• Atseden hartzea
• Ingurumenari lotutako boluntario programetan parte hartzea (esaterako, hegaztiei eraztuna jartzea)...

Azken finean, izadiaz gozatzea hiritik hurbil

Azken eguneratzea: 2007/10/03