Index Anillo Verde de Vitoria-Gasteiz

Atxa-Landaberdeko tartea Ibaiondo auzoaren iparraldean dago, Zadorra ibaiaren ezkerraldean, Ihurre eta Gobeuren artean. Parkeak oinarri dituen muinoen toponimoetatik hartu du izena; Arabako Lautadako paisaian tipikoak diren tuparrizko muinoak dira horiek.

Inguru horrek badu berezitasun bat: Atxa herrixkako arkeologia aztarnategia, Atxa II. Burdin Aroko herrixka indigena baten (K. a. IV. eta III. mendeak) eta erromatarren kanpamentu militar baten (K. o. I. mendea) kokalekua izan zena. Indusketa 1988an bukatu zuten.

Zerrenda itxura nabarmena du zati honek; 170.000 m²-ko azalera eta 1.170 m-ko luzera du. Duela gutxi arte leku hau kontrolik gabeko zabortegia izan da, eta baratzeak eta legez kanpoko beste jarduera batzuk jartzeko erabili izan da. Orain egin den ingurumen eta paisaia lehengoratzeari esker, ordea, gune horrek hemendik gutxira zein itxura izango duen ikus daiteke. Parkearen sarrera talaia zabal batean dago, zeinetatik ikuspegi ederra baita iparralderantz. Goialdeetako belardi eta pre-txilardiko eremuetatik behealdeetako baso misto eta erkameztietara igarotzeko aukera dago. Ibai aldera belardi natural batzuk egokitu dira bertan egoteko eta begiratzeko; dena den, Zadorra ibai osoan zehar ur-bazterra lehengoratu eta zaintzeari eman zaio lehentasuna.

Azken eguneratzea: 2007/10/04

Hiperestekak

• Zadorrako parkearen egokitze ekologiko eta paisajistikoa Atxa-Landaberdeko tartean